൪. പഞ്ചസീലസമാദാനിയത്ഥേരഅപദാനം

൧൩൪. ‘‘നഗരേ ചന്ദവതിയാ, ഭതകോ ആസഹം തദാ;

പരകമ്മായനേ യുത്തോ, പബ്ബജ്ജം ന ലഭാമഹം.

൧൩൫. ‘‘മഹന്ധകാരപിഹിതാ, തിവിധഗ്ഗീഹി ഡയ്ഹരേ;

കേന നു ഖോ ഉപായേന, വിസംയുത്തോ ഭവേ അഹം.

൧൩൬. ‘‘ദേയ്യധമ്മോ ച മേ നത്ഥി, വരാകോ ഭതകോ അഹം;

യംനൂനാഹം പഞ്ചസീലം, രക്ഖേയ്യം പരിപൂരയം.

൧൩൭. ‘‘അനോമദസ്സിസ്സ മുനിനോ, നിസഭോ നാമ സാവകോ;

തമഹം ഉപസങ്കമ്മ, പഞ്ചസിക്ഖാപദഗ്ഗഹിം.

൧൩൮. ‘‘വസ്സസതസഹസ്സാനി, ആയു വിജ്ജതി താവദേ;

താവതാ പഞ്ചസീലാനി, പരിപുണ്ണാനി ഗോപയിം.

൧൩൯. ‘‘മച്ചുകാലേ ച സമ്പത്തേ, ദേവാ അസ്സാസയന്തി മം;

‘രഥോ സഹസ്സയുത്തോ തേ, മാരിസായം [മാരിസസ്സ (ക.)] ഉപട്ഠിതോ’.

൧൪൦. ‘‘വത്തന്തേ ചരിമേ ചിത്തേ, മമ സീലം അനുസ്സരിം;

തേന കമ്മേന സുകതേന, താവതിംസം അഗച്ഛഹം.

൧൪൧. ‘‘തിംസക്ഖത്തുഞ്ച ദേവിന്ദോ, ദേവരജ്ജമകാരയിം;

ദിബ്ബസുഖം [ദിബ്ബം സുഖം (സീ.)] അനുഭവിം, അച്ഛരാഹി പുരക്ഖതോ.

൧൪൨. ‘‘പഞ്ചസത്തതിക്ഖത്തുഞ്ച, ചക്കവത്തീ അഹോസഹം;

പദേസരജ്ജം വിപുലം, ഗണനാതോ അസങ്ഖിയം.

൧൪൩. ‘‘ദേവലോകാ ചവിത്വാന, സുക്കമൂലേന ചോദിതോ;

പുരേ വേസാലിയം ജാതോ, മഹാസാലേ സുഅഡ്ഢകേ.

൧൪൪. ‘‘വസ്സൂപനായികേ കാലേ, ദിപ്പന്തേ [ദിബ്ബന്തി (ക.)] ജിനസാസനേ;

മാതാ ച മേ പിതാ ചേവ, പഞ്ചസിക്ഖാപദഗ്ഗഹും.

൧൪൫. ‘‘സഹ സുത്വാനഹം സീലം, മമ സീലം അനുസ്സരിം;

ഏകാസനേ നിസീദിത്വാ, അരഹത്തമപാപുണിം.

൧൪൬. ‘‘ജാതിയാ പഞ്ചവസ്സേന, അരഹത്തമപാപുണിം;

ഉപസമ്പാദയി ബുദ്ധോ, ഗുണമഞ്ഞായ ചക്ഖുമാ.

൧൪൭. ‘‘പരിപുണ്ണാനി ഗോപേത്വാ, പഞ്ചസിക്ഖാപദാനഹം;

അപരിമേയ്യേ ഇതോ കപ്പേ, വിനിപാതം ന ഗച്ഛഹം.

൧൪൮. ‘‘സ്വാഹം യസമനുഭവിം, തേസം സീലാന വാഹസാ;

കപ്പകോടിമ്പി കിത്തേന്തോ, കിത്തയേ ഏകദേസകം.

൧൪൯. ‘‘പഞ്ചസീലാനി ഗോപേത്വാ, തയോ ഹേതൂ ലഭാമഹം;

ദീഘായുകോ മഹാഭോഗോ, തിക്ഖപഞ്ഞോ ഭവാമഹം.

൧൫൦. ‘‘സംകിത്തേന്തോ ച [പകിത്തേന്തോവ (സീ.), പകിത്തേന്തേ ച (സ്യാ.)] സബ്ബേസം, അഭിമത്തഞ്ച പോരിസം;

ഭവാഭവേ സംസരിത്വാ, ഏതേ ഠാനേ ലഭാമഹം.

൧൫൧. ‘‘അപരിമേയ്യസീലേസു, വത്തന്താ ജിനസാവകാ;

ഭവേസു യദി രജ്ജേയ്യും, വിപാകോ കീദിസോ ഭവേ.

൧൫൨. ‘‘സുചിണ്ണം മേ പഞ്ചസീലം, ഭതകേന തപസ്സിനാ [വിപസ്സിനാ (സീ.)];

തേന സീലേനഹം അജ്ജ, മോചയിം സബ്ബബന്ധനാ.

൧൫൩. ‘‘അപരിമേയ്യേ ഇതോ കപ്പേ, പഞ്ചസീലാനി ഗോപയിം;

ദുഗ്ഗതിം നാഭിജാനാമി, പഞ്ചസീലാനിദം ഫലം.

൧൫൪. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ പഞ്ചസീലസമാദാനിയോ ഥേരോ ഇമാ ഗാഥായോ അഭാസിത്ഥാതി.

പഞ്ചസീലസമാദാനിയത്ഥേരസ്സാപദാനം ചതുത്ഥം.