൬. ഉപട്ഠാകദായകത്ഥേരഅപദാനം

൨൪. ‘‘രഥിയം പടിപജ്ജന്തം, ആഹുതീനം പടിഗ്ഗഹം;

ദ്വിപദിന്ദം മഹാനാഗം, ലോകജേട്ഠം നരാസഭം.

൨൫. ‘‘പക്കോസാപിയ തസ്സാഹം, സബ്ബലോകഹിതേസിനോ;

ഉപട്ഠാകോ മയാ ദിന്നോ, സിദ്ധത്ഥസ്സ മഹേസിനോ.

൨൬. ‘‘പടിഗ്ഗഹേത്വാ [പടിഗ്ഗഹേസി (ക.)] സമ്ബുദ്ധോ, നിയ്യാദേസി മഹാമുനി [മഹാഇസി (ക.)];

ഉട്ഠായ ആസനാ തമ്ഹാ, പക്കാമി പാചിനാമുഖോ.

൨൭. ‘‘ചതുന്നവുതിതോ കപ്പേ, ഉപട്ഠാകമദം തദാ;

ദുഗ്ഗതിം നാഭിജാനാമി, ഉപട്ഠാനസ്സിദം ഫലം.

൨൮. ‘‘സത്തപഞ്ഞാസിതോ കപ്പേ, ബലസേനസനാമകോ;

സത്തരതനസമ്പന്നോ, ചക്കവത്തീ മഹബ്ബലോ.

൨൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉപട്ഠാകദായകോ ഥേരോ ഇമാ ഗാഥായോ അഭാസിത്ഥാതി.

ഉപട്ഠാകദായകത്ഥേരസ്സാപദാനം ഛട്ഠം.