൧. ആകാസുക്ഖിപിയത്ഥേരഅപദാനം

൧. ‘‘സുവണ്ണവണ്ണം സിദ്ധത്ഥം, ഗച്ഛന്തം അന്തരാപണേ;

ജലജഗ്ഗേ ദുവേ ഗയ്ഹ, ഉപാഗച്ഛിം നരാസഭം.

൨. ‘‘ഏകഞ്ച പുപ്ഫം പാദേസു, ബുദ്ധസേട്ഠസ്സ നിക്ഖിപിം;

ഏകഞ്ച പുപ്ഫം പഗ്ഗയ്ഹ, ആകാസേ ഉക്ഖിപിം അഹം.

൩. ‘‘ചതുന്നവുതിതോ കപ്പേ, യം പുപ്ഫമഭിരോപയിം;

ദുഗ്ഗതിം നാഭിജാനാമി, പുപ്ഫദാനസ്സിദം ഫലം.

൪. ‘‘ഇതോ ഛത്തിംസകപ്പമ്ഹി, ഏകോ ആസിം മഹീപതി;

അന്തലിക്ഖകരോ നാമ, ചക്കവത്തീ മഹബ്ബലോ.

൫. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ആകാസുക്ഖിപിയോ ഥേരോ ഇമാ ഗാഥായോ അഭാസിത്ഥാതി.

ആകാസുക്ഖിപിയത്ഥേരസ്സാപദാനം പഠമം.