൧൦. അഗ്ഗപുപ്ഫിയത്ഥേരഅപദാനം

൩൭. ‘‘സുവണ്ണവണ്ണം സമ്ബുദ്ധം, നിസിന്നം പബ്ബതന്തരേ;

ഓഭാസയന്തം രംസേന [രംസിയാ (സ്യാ.)], സിഖിനം സിഖിനം യഥാ.

൩൮. ‘‘അഗ്ഗജം പുപ്ഫമാദായ, ഉപാഗച്ഛിം നരുത്തമം;

പസന്നചിത്തോ സുമനോ, ബുദ്ധസ്സ അഭിരോപയിം.

൩൯. ‘‘ഏകത്തിംസേ ഇതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൪൦. ‘‘പഞ്ചവീസതികപ്പമ്ഹി, അഹോസി അമിതോഗതോ [അമിതവ്ഹയോ (സീ.)];

സത്തരതനസമ്പന്നോ, ചക്കവത്തീ മഹബ്ബലോ.

൪൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ അഗ്ഗപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

അഗ്ഗപുപ്ഫിയത്ഥേരസ്സാപദാനം ദസമം.

ഥോമകവഗ്ഗോ ഛബ്ബീസതിമോ.