൨൪. ഉദകാസനവഗ്ഗോ

൧. ഉദകാസനദായകത്ഥേരഅപദാനം

൧. ‘‘ആരാമദ്വാരാ നിക്ഖമ്മ, ഫലകം സന്ഥരിം അഹം;

ഉദകഞ്ച ഉപട്ഠാസിം, ഉത്തമത്ഥസ്സ പത്തിയാ.

൨. ‘‘ഏകത്തിംസേ ഇതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, ആസനേ ചോദകേ ഫലം.

൩. ‘‘ഇതോ പന്നരസേ കപ്പേ, അഭിസാമസമവ്ഹയോ;

സത്തരതനസമ്പന്നോ, ചക്കവത്തീ മഹബ്ബലോ.

൪. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉദകാസനദായകോ ഥേരോ ഇമാ ഗാഥായോ അഭാസിത്ഥാതി.

ഉദകാസനദായകത്ഥേരസ്സാപദാനം പഠമം.

൨. ഭാജനപാലകത്ഥേരഅപദാനം

൫. ‘‘നഗരേ ബന്ധുമതിയാ, കുമ്ഭകാരോ അഹം തദാ;

ഭാജനം അനുപാലേസിം, ഭിക്ഖുസങ്ഘസ്സ താവദേ.

൬. ‘‘ഏകനവുതിതോ കപ്പേ, ഭാജനം അനുപാലയിം;

ദുഗ്ഗതിം നാഭിജാനാമി, ഭാജനസ്സ ഇദം ഫലം.

൭. ‘‘തേപഞ്ഞാസേ ഇതോ കപ്പേ, അനന്തജാലിനാമകോ;

സത്തരതനസമ്പന്നോ, ചക്കവത്തീ മഹബ്ബലോ.

൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഭാജനപാലകോ [ഭാജനദായകോ (സീ. സ്യാ.)] ഥേരോ ഇമാ ഗാഥായോ അഭാസിത്ഥാതി.

ഭാജനപാലകത്ഥേരസ്സാപദാനം ദുതിയം.

൩. സാലപുപ്ഫിയത്ഥേരഅപദാനം

൯. ‘‘അരുണവതിയാ നഗരേ, അഹോസിം പൂപികോ തദാ;

മമ ദ്വാരേന ഗച്ഛന്തം, സിഖിനം അദ്ദസം ജിനം.

൧൦. ‘‘ബുദ്ധസ്സ പത്തം പഗ്ഗയ്ഹ, സാലപുപ്ഫം അദാസഹം;

സമ്മഗ്ഗതസ്സ ബുദ്ധസ്സ, വിപ്പസന്നേന ചേതസാ.

൧൧. ‘‘ഏകത്തിംസേ ഇതോ കപ്പേ, യം പുപ്ഫമഭിദാസഹം [യം ഖജ്ജകമദാസഹം (സീ.), യം ഖജ്ജമഭിദാസഹം (ക.) സാലപുപ്ഫനാമകം ഖജ്ജകം വാ ഭവേയ്യ];

ദുഗ്ഗതിം നാഭിജാനാമി, സാലപുപ്ഫസ്സിദം ഫലം.

൧൨. ‘‘ഇതോ ചുദ്ദസകപ്പമ്ഹി, അഹോസിം അമിതഞ്ജലോ;

സത്തരതനസമ്പന്നോ, ചക്കവത്തീ മഹബ്ബലോ.

൧൩. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സാലപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

സാലപുപ്ഫിയത്ഥേരസ്സാപദാനം തതിയം.

൪. കിലഞ്ജദായകത്ഥേരഅപദാനം

൧൪. ‘‘തിവരായം പുരേ രമ്മേ, നളകാരോ അഹം തദാ;

സിദ്ധത്ഥേ ലോകപജ്ജോതേ, പസന്നാ ജനതാ തഹിം.

൧൫. ‘‘പൂജത്ഥം ലോകനാഥസ്സ, കിലഞ്ജം പരിയേസതി;

ബുദ്ധപൂജം കരോന്താനം, കിലഞ്ജം അദദിം അഹം.

൧൬. ‘‘ചതുന്നവുതിതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, കിലഞ്ജസ്സ ഇദം ഫലം.

൧൭. ‘‘സത്തസത്തതികപ്പമ്ഹി, രാജാ ആസിം ജലദ്ധരോ [ജുതിന്ധരോ (സീ.)];

സത്തരതനസമ്പന്നോ, ചക്കവത്തീ മഹബ്ബലോ.

൧൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ കിലഞ്ജദായകോ ഥേരോ ഇമാ ഗാഥായോ അഭാസിത്ഥാതി.

കിലഞ്ജദായകത്ഥേരസ്സാപദാനം ചതുത്ഥം.

൫. വേദികാരകത്ഥേരഅപദാനം

൧൯. ‘‘വിപസ്സിനോ ഭഗവതോ, ബോധിയാ പാദപുത്തമേ;

പസന്നചിത്തോ സുമനോ, കാരേസിം വേദികം അഹം.

൨൦. ‘‘ഏകനവുതിതോ കപ്പേ, കാരേസിം വേദികം അഹം;

ദുഗ്ഗതിം നാഭിജാനാമി, വേദികായ ഇദം ഫലം.

൨൧. ‘‘ഇതോ ഏകാദസേ കപ്പേ, അഹോസിം സൂരിയസ്സമോ;

സത്തരത്തനസമ്പന്നോ, ചക്കവത്തീ മഹബ്ബലോ.

൨൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ വേദികാരകോ ഥേരോ ഇമാ ഗാഥായോ അഭാസിത്ഥാതി.

വേദികാരകത്ഥേരസ്സാപദാനം പഞ്ചമം.

൬. വണ്ണകാരത്ഥേരഅപദാനം

൨൩. ‘‘നഗരേ അരുണവതിയാ, വണ്ണകാരോ അഹം തദാ;

ചേതിയേ ദുസ്സഭണ്ഡാനി, നാനാവണ്ണം രജേസഹം [രജിം അഹം (ക.), രജേമഹം (സ്യാ.)].

൨൪. ‘‘ഏകത്തിംസേ ഇതോ കപ്പേ, യം വണ്ണം രജയിം തദാ;

ദുഗ്ഗതിം നാഭിജാനാമി, വണ്ണദാനസ്സിദം ഫലം.

൨൫. ‘‘ഇതോ തേവീസതികപ്പേ, വണ്ണസമ [ചന്ദുപമ (സീ.), ചന്ദസമ (സ്യാ.)] സനാമകോ;

സത്തരതനസമ്പന്നോ, ചക്കവത്തീ മഹബ്ബലോ.

൨൬. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ വണ്ണകാരോ ഥേരോ ഇമാ ഗാഥായോ അഭാസിത്ഥാതി.

വണ്ണകാരത്ഥേരസ്സാപദാനം ഛട്ഠം.

൭. പിയാലപുപ്ഫിയത്ഥേരഅപദാനം

൨൭. ‘‘മിഗലുദ്ദോ പുരേ ആസിം, അരഞ്ഞേ കാനനേ അഹം;

പിയാലം പുപ്ഫിതം ദിസ്വാ, ഗതമഗ്ഗേ ഖിപിം അഹം.

൨൮. ‘‘ഏകനവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൨൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പിയാലപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

പിയാലപുപ്ഫിയത്ഥേരസ്സാപദാനം സത്തമം.

൮. അമ്ബയാഗദായകത്ഥേരഅപദാനം

൩൦. ‘‘സകേ സിപ്പേ അപത്ഥദ്ധോ, അഗമം കാനനം അഹം;

സമ്ബുദ്ധം യന്തം ദിസ്വാന, അമ്ബയാഗം അദാസഹം.

൩൧. ‘‘ഏകനവുതിതോ കപ്പേ, യം ദാനമദദിം തദാ;

ദുഗ്ഗതിം നാഭിജാനാമി, അമ്ബയാഗസ്സിദം ഫലം.

൩൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ അമ്ബയാഗദായകോ ഥേരോ ഇമാ ഗാഥായോ അഭാസിത്ഥാതി.

അമ്ബയാഗദായകത്ഥേരസ്സാപദാനം അട്ഠമം.

൯. ജഗതികാരകത്ഥേരഅപദാനം

൩൩. ‘‘നിബ്ബുതേ ലോകനാഥമ്ഹി, അത്ഥദസ്സി നരുത്തമേ;

ജഗതീ കാരിതാ മയ്ഹം, ബുദ്ധസ്സ ഥൂപമുത്തമേ.

൩൪. ‘‘അട്ഠാരസേ കപ്പസതേ, യം കമ്മമകരിം തദാ;

ദുഗ്ഗതിം നാഭിജാനാമി, ജഗതിയാ ഇദം ഫലം.

൩൫. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ജഗതികാരകോ ഥേരോ ഇമാ ഗാഥായോ അഭാസിത്ഥാതി.

ജഗതികാരകത്ഥേരസ്സാപദാനം നവമം.

൧൦. വാസിദായകത്ഥേരഅപദാനം

൩൬. ‘‘കമ്മാരോഹം പുരേ ആസിം, തിവരായം പുരുത്തമേ;

ഏകാ വാസി മയാ ദിന്നാ, സയമ്ഭും അപരാജിതം [സയമ്ഭുമ്ഹിപരാജിതേ (?)].

൩൭. ‘‘ചതുന്നവുതിതോ കപ്പേ, യം വാസിമദദിം തദാ;

ദുഗ്ഗതിം നാഭിജാനാമി, വാസിദാനസ്സിദം ഫലം.

൩൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ വാസിദായകോ ഥേരോ ഇമാ ഗാഥായോ അഭാസിത്ഥാതി.

വാസിദായകത്ഥേരസ്സാപദാനം ദസമം.

ഉദകാസനവഗ്ഗോ ചതുവീസതിമോ.