൪. സക്കച്ചവഗ്ഗവണ്ണനാ

൬൦൬. സക്കച്ചന്തി ഏത്ഥാപി അസക്കച്ചം പടിഗ്ഗഹണേയേവ ആപത്തി, പടിഗ്ഗഹിതം പന സുപടിഗ്ഗഹിതമേവ. സക്കച്ചന്തി ച പത്തസഞ്ഞീതി ചാതി ഉഭയം വുത്തനയമേവ.

൬൦൮. സപദാനന്തി തത്ഥ തത്ഥ ഓധിം അകത്വാ അനുപടിപാടിയാ. സമസൂപകേ വത്തബ്ബം വുത്തമേവ.

൬൧൦. ഥൂപകതോതി മത്ഥകതോ; വേമജ്ഝതോതി അത്ഥോ.

൬൧൧. പടിച്ഛാദേത്വാ ദേന്തീതി മാഘാതസമയാദീസു പടിച്ഛന്നം ബ്യഞ്ജനം കത്വാ ദേന്തി. വിഞ്ഞത്തിയം വത്തബ്ബം നത്ഥി.

൬൧൪. ഉജ്ഝാനസഞ്ഞീസിക്ഖാപദേപി ഗിലാനോ ന മുച്ചതി.

൬൧൫. നാതിമഹന്തോ കബളോതി മയൂരണ്ഡം അതിമഹന്തം, കുക്കുടണ്ഡം അതിഖുദ്ദകം, തേസം വേമജ്ഝപ്പമാണോ. ഖജ്ജകേതി ഏത്ഥ മൂലഖാദനീയാദി സബ്ബം ഗഹേതബ്ബം.

ചതുത്ഥോ വഗ്ഗോ.