൫. തലസത്തികസിക്ഖാപദവണ്ണനാ

൪൫൪. പഞ്ചമേ – തലസത്തികം ഉഗ്ഗിരന്തീതി പഹാരദാനാകാരം ദസ്സേത്വാ കായമ്പി കായപടിബദ്ധമ്പി ഉച്ചാരേന്തി. തേ പഹാരസമുച്ചിതാ രോദന്തീതി തേ പഹാരപരിചിതാ പുബ്ബേപി ലദ്ധപഹാരത്താ ഇദാനി ച പഹാരം ദസ്സന്തീതി മഞ്ഞമാനാ രോദന്തീതി അത്ഥോ. ‘‘പഹാരസ്സ മുച്ചിതാ’’തിപി സജ്ഝായന്തി, തത്ഥ ‘‘പഹാരസ്സ ഭീതാ’’തി അത്ഥോ.

൪൫൭. ഉഗ്ഗിരതി ആപത്തി പാചിത്തിയസ്സാതി ഏത്ഥ സചേ ഉഗ്ഗിരിത്വാ വിരദ്ധോ പഹാരം ദേതി, അവസ്സം ധാരേതും അസക്കോന്തസ്സ പഹാരോ സഹസാ പതതി, ന പഹരിതുകാമതായ ദിന്നത്താ ദുക്കടം. തേന പഹാരേന ഹത്ഥാദീസു യംകിഞ്ചി ഭിജ്ജതി, ദുക്കടമേവ.

൪൫൮. മോക്ഖാധിപ്പായോ തലസത്തികം ഉഗ്ഗിരതീതി ഏത്ഥ പുബ്ബേ വുത്തേസു വത്ഥൂസു പുരിമനയേനേവ തലസത്തികം ഉഗ്ഗിരന്തസ്സ അനാപത്തി. സചേപി വിരജ്ഝിത്വാ പഹാരം ദേതി, അനാപത്തിയേവ. സേസം പുരിമസദിസമേവ സദ്ധിം സമുട്ഠാനാദീഹീതി.

തലസത്തികസിക്ഖാപദം പഞ്ചമം.