൪. അനാദരിയസിക്ഖാപദവണ്ണനാ

൩൪൨. ചതുത്ഥേ – കഥായം നസ്സേയ്യാതി കഥം അയം ധമ്മോ തന്തി പവേണീ നസ്സേയ്യ. തം വാ ന സിക്ഖിതുകാമോതി യേന പഞ്ഞത്തേന വുച്ചതി, തം പഞ്ഞത്തം ന സിക്ഖിതുകാമോ. അപഞ്ഞത്തേനാതി സുത്തേ വാ അഭിധമ്മേ വാ ആഗതേന.

൩൪൪. ഏവം അമ്ഹാകം ആചരിയാനം ഉഗ്ഗഹോതി ഏത്ഥ ഗാരയ്ഹോ ആചരിയുഗ്ഗഹോ ന ഗഹേതബ്ബോ; പവേണിയാ ആഗതോ ആചരിയുഗ്ഗഹോവ ഗഹേതബ്ബോ. കുരുന്ദിയം പന ‘‘ലോകവജ്ജേ ആചരിയുഗ്ഗഹോ ന വട്ടതി, പണ്ണത്തിവജ്ജേ പന വട്ടതീ’’തി വുത്തം. മഹാപച്ചരിയം ‘‘സുത്തം സുത്താനുലോമഞ്ച ഉഗ്ഗഹിതകാനംയേവ ആചരിയാനം ഉഗ്ഗഹോ പമാണം, അജാനന്താനം കഥാ അപ്പമാണന്തി വുത്തം. തം സബ്ബം പവേണിയാ ആഗതേസമോധാനം ഗച്ഛതി. സേസം ഉത്താനമേവാതി.

തിസമുട്ഠാനം – കായചിത്തതോ വാചാചിത്തതോ കായവാചാചിത്തതോ ച സമുട്ഠാതി, കിരിയം, സഞ്ഞാവിമോക്ഖം, സചിത്തകം, ലോകവജ്ജം, കായകമ്മം, വചീകമ്മം, അകുസലചിത്തം, ദുക്ഖവേദനന്തി.

അനാദരിയസിക്ഖാപദം ചതുത്ഥം.