൬. സൂരിയപേയ്യാലവഗ്ഗവണ്ണനാ

൪൯-൬൨. സൂരിയപേയ്യാലേ അരുണുഗ്ഗം വിയ കല്യാണമിത്തത്താ, കല്യാണമിത്തതായ ഠത്വാ നിബ്ബത്തിതോ സവിപസ്സനഅരിയമഗ്ഗോ സൂരിയപാതുഭാവോ വിയാതി ഏവം സബ്ബത്ഥ അത്ഥോ വേദിതബ്ബോ. സീലസമ്പദാതി ചതുപാരിസുദ്ധിസീലം. ഛന്ദസമ്പദാതി കുസലകത്തുകമ്യതാഛന്ദോ. അത്തസമ്പദാതി സമ്പന്നചിത്തതാ. ദിട്ഠിസമ്പദാതി ഞാണസമ്പത്തി. അപ്പമാദസമ്പദാതി കാരാപകഅപ്പമാദസമ്പത്തി. യോനിസോമനസികാരസമ്പദാതി ഉപായമനസികാരസമ്പത്തി. പുന കല്യാണമിത്തതാതിആദീനി സമ്മാദിട്ഠിആദീനം അഞ്ഞേനപി ആകാരേന ഭാവദസ്സനത്ഥം വുത്താനി. സബ്ബാനേവ ചേതാനി സുത്താനി പാടിയേക്കം പുഗ്ഗലജ്ഝാസയവസേന വുത്താനീതി.

സൂരിയപേയ്യാലവഗ്ഗോ.