൩-൫. യോധാജീവസുത്താദിവണ്ണനാ

൩൫൫-൩൫൭. തതിയേ യോധാജീവോതി യുദ്ധേന ജീവികം കപ്പനകോ ധമ്മസങ്ഗാഹകത്ഥേരേഹി ഏവം ഗഹിതനാമോ. ഉസ്സഹതി വായമതീതി ഉസ്സാഹം വായാമം കരോതി. പരിയാപാദേന്തീതി മരണം പടിപജ്ജാപേന്തി. ദുക്കടന്തി ദുട്ഠു കതം. ദുപ്പണിഹിതന്തി ദുട്ഠു ഠപിതം. പരജിതോ നാമ നിരയോതി അയമ്പി ന വിസും ഏകോ നിരയോ, അവീചിസ്സേവ പന ഏകസ്മിം കോട്ഠാസേ പഞ്ചാവുധസന്നദ്ധാ ഫലകഹത്ഥാ ഹത്ഥിഅസ്സരഥേ ആരുയ്ഹ സങ്ഗാമേ യുജ്ഝന്താ വിയ പച്ചന്തി, തം സന്ധായേതം വുത്തം. ചതുത്ഥപഞ്ചമേസുപി ഏസേവ നയോ.