൧൫. നവപുരാണവഗ്ഗോ

൧. കമ്മനിരോധസുത്തവണ്ണനാ

൧൪൬. നവപുരാണവഗ്ഗസ്സ പഠമേ നവപുരാണാനീതി നവാനി ച പുരാണാനി ച. ചക്ഖു, ഭിക്ഖവേ, പുരാണകമ്മന്തി ന ചക്ഖു പുരാണം, കമ്മമേവ പുരാണം, കമ്മതോ പന നിബ്ബത്തത്താ പച്ചയനാമേന ഏവം വുത്തം. അഭിസങ്ഖതന്തി പച്ചയേഹി അഭിസമാഗന്ത്വാ കതം. അഭിസഞ്ചേതയിതന്തി ചേതനായ പകപ്പിതം. വേദനിയം ദട്ഠബ്ബന്തി വേദനായ വത്ഥൂതി പസ്സിതബ്ബം. നിരോധാ വിമുത്തിം ഫുസതീതി ഇമസ്സ തിവിധസ്സ കമ്മസ്സ നിരോധേന വിമുത്തിം ഫുസതി. അയം വുച്ചതീതി അയം തസ്സാ വിമുത്തിയാ ആരമ്മണഭൂതോ നിരോധോ കമ്മനിരോധോതി വുച്ചതി. ഇതി ഇമസ്മിം സുത്തേ പുബ്ബഭാഗവിപസ്സനാ കഥിതാ.

൨-൫. അനിച്ചനിബ്ബാനസപ്പായസുത്താദിവണ്ണനാ

൧൪൭-൧൫൦. ദുതിയേ നിബ്ബാനസപ്പായന്തി നിബ്ബാനസ്സ സപ്പായം ഉപകാരപടിപദം. തതിയാദീസുപി ഏസേവ നയോ. പടിപാടിയാ പന ചതൂസുപി ഏതേസു സുത്തേസു സഹ വിപസ്സനായ ചത്താരോ മഗ്ഗാ കഥിതാ.

൬-൭. അന്തേവാസികസുത്താദിവണ്ണനാ

൧൫൧-൧൫൨. ഛട്ഠേ അനന്തേവാസികന്തി അന്തോ വസനകകിലേസവിരഹിതം. അനാചരിയകന്തി ആചരണകകിലേസവിരഹിതം. അന്തസ്സ വസന്തീതി അന്തോ അസ്സ വസന്തി. തേ നം സമുദാചരന്തീതി തേ ഏതം അധിഭവന്തി അജ്ഝോത്ഥരന്തി സിക്ഖാപേന്തി വാ. ‘‘ഏവം വേജ്ജകമ്മം കരോഹി, ഏവം ദൂതകമ്മ’’ന്തി ഇതി സിക്ഖാപനസങ്ഖാതേന സമുദാചരണത്ഥേനസ്സ തേ ആചരിയാ നാമ ഹോന്തി, തേഹി ആചരിയേഹി സാചരിയകോതി വുച്ചതി. സേസമേത്ഥ വുത്തനയേനേവ വേദിതബ്ബം. സത്തമം ഹേട്ഠാ കഥിതനയമേവ.

൮. അത്ഥിനുഖോപരിയായസുത്തവണ്ണനാ

൧൫൩. അട്ഠമേ യം പരിയായം ആഗമ്മാതി യം കാരണം ആഗമ്മ. അഞ്ഞത്രേവ സദ്ധായാതി വിനാ സദ്ധായ സദ്ധം അപനേത്വാ. ഏത്ഥ ച സദ്ധാതി ന പച്ചക്ഖാ സദ്ധാ. യോ പന പരസ്സ ഏവം കിര ഏവം കിരാതി കഥേന്തസ്സ സുത്വാ ഉപ്പന്നോ സദ്ദഹനാകാരോ, തം സന്ധായേതം വുത്തം. രുചിആദീസുപി രുചാപേത്വാ ഖമാപേത്വാ അത്ഥേതന്തി ഗഹണാകാരോ രുചി നാമ, ഏവം കിര ഭവിസ്സതീതി അനുസ്സവനം അനുസ്സവോ, നിസീദിത്വാ ഏകം കാരണം ചിന്തേന്തസ്സ കാരണം ഉപട്ഠാതി, ഏവം ഉപട്ഠിതസ്സ അത്ഥേതന്തി ഗഹണം ആകാരപരിവിതക്കോ നാമ, കാരണവിതക്കോതി അത്ഥോ. കാരണം ചിന്തേന്തസ്സ പാപികാ ലദ്ധി ഉപ്പജ്ജതി, തം അത്ഥേസാതി ഗഹണാകാരോ ദിട്ഠിനിജ്ഝാനക്ഖന്തി നാമ. അഞ്ഞം ബ്യാകരേയ്യാതി ഇമാനി പഞ്ച ഠാനാനി മുഞ്ചിത്വാ അരഹത്തം ബ്യാകരേയ്യ. ഇമസ്മിം സുത്തേ സേഖാസേഖാനം പച്ചവേക്ഖണാ കഥിതാ.

൯-൧൦. ഇന്ദ്രിയസമ്പന്നസുത്താദിവണ്ണനാ

൧൫൪-൧൫൫. നവമേ ഇന്ദ്രിയസമ്പന്നോതി പരിപുണ്ണിന്ദ്രിയോ. തത്ഥ യേന ഛ ഇന്ദ്രിയാനി സമ്മസിത്വാ അരഹത്തം പത്തം, സോ തേഹി നിബ്ബിസേവനേഹി ഇന്ദ്രിയേഹി സമന്നാഗതത്താ, ചക്ഖാദീനി വാ ഛ ഇന്ദ്രിയാനി സമ്മസന്തസ്സ ഉപ്പന്നേഹി സദ്ധാദീഹി ഇന്ദ്രിയേഹി സമന്നാഗതത്താ പരിപുണ്ണിന്ദ്രിയോ നാമ ഹോതി, തം സന്ധായ ഭഗവാ ചക്ഖുന്ദ്രിയേ ചേതിആദിനാ നയേന ദേസനം വിത്ഥാരേത്വാ ഏത്താവതാ ഖോ ഭിക്ഖു ഇന്ദ്രിയസമ്പന്നോ ഹോതീതി ആഹ. ദസമം ഹേട്ഠാ വുത്തനയമേവാതി.

നവപുരാണവഗ്ഗോ പഞ്ചദസമോ.

തതിയോ പണ്ണാസകോ.