൨-൫൦. പണീതതരസുത്താദിവണ്ണനാ

൩൪൩-൩൯൧. ദുതിയാദീസു വോസ്സട്ഠകായാതി അഹിതുണ്ഡികപരിബുദ്ധം അഗണേത്വാ വിസ്സട്ഠകായാ. ദ്വയകാരിനോതി ദുവിധകാരിനോ, കുസലാകുസലകാരിനോതി അത്ഥോ. സചജ്ജ മയന്തി സചേ അജ്ജ മയം. സഹബ്യതം ഉപപജ്ജതീതി സഹഭാവം ആപജ്ജതി. തത്രസ്സ അകുസലം ഉപപത്തിയാ പച്ചയോ ഹോതി, കുസലം ഉപപന്നാനം സമ്പത്തിയാ. അന്നന്തി ഖാദനീയഭോജനീയം. പാനന്തി യംകിഞ്ചി പാനകം. വത്ഥന്തി നിവാസനപാരുപനം. യാനന്തി ഛത്തുപാഹനം ആദിം കത്വാ യംകിഞ്ചി ഗമനപച്ചയം. മാലന്തി യംകിഞ്ചി സുമനമാലാദിപുപ്ഫം. ഗന്ധന്തി യംകിഞ്ചി ചന്ദനാദിഗന്ധം. വിലേപനന്തി യംകിഞ്ചി ഛവിരാഗകരണം. സേയ്യാവസഥപദീപേയ്യന്തി മഞ്ചപീഠാദിസേയ്യം ഏകഭൂമികാദിആവസഥം വട്ടിതേലാദിപദീപൂപകരണഞ്ച ദേതീതി അത്ഥോ. തേസഞ്ഹി ദീഘായുകതായ ച വണ്ണവന്തതായ ച സുഖബഹുലതായ ച പത്ഥനം കത്വാ ഇമം ദസവിധം ദാനവത്ഥും ദത്വാ തം സമ്പത്തിം അനുഭവിതും തത്ഥ നിബ്ബത്തന്തി. സേസം സബ്ബത്ഥ ഉത്താനമേവാതി.

നാഗസംയുത്തവണ്ണനാ നിട്ഠിതാ.