൧. പഠമവഗ്ഗോ

൧. മാരസുത്തവണ്ണനാ

൧൬൦. രാധസംയുത്തസ്സ പഠമേ മാരോ വാ അസ്സാതി മരണം വാ ഭവേയ്യ. മാരേതാ വാതി മാരേതബ്ബോ വാ. യോ വാ പന മീയതീതി യോ വാ പന മരതി. നിബ്ബിദത്ഥന്തി നിബ്ബിദാഞാണത്ഥം. നിബ്ബാനത്ഥാതി ഫലവിമുത്തി നാമേസാ അനുപാദാനിബ്ബാനത്ഥാതി അത്ഥോ. അച്ചയാസീതി അതിക്കന്തോസി. നിബ്ബാനോഗധന്തി നിബ്ബാനേ പതിട്ഠിതം. ഇദം മഗ്ഗബ്രഹ്മചരിയം നാമ നിബ്ബാനബ്ഭന്തരേ വുസ്സതി, ന നിബ്ബാനം അതിക്കമിത്വാതി അത്ഥോ. നിബ്ബാനപരിയോസാനന്തി നിബ്ബാനം അസ്സ പരിയോസാനം, നിപ്ഫത്തി നിട്ഠാതി അത്ഥോ. പഠമം.

൨-൧൦. സത്തസുത്താദിവണ്ണനാ

൧൬൧-൧൬൯. ദുതിയേ സത്തോ സത്തോതി ലഗ്ഗപുച്ഛാ. തത്ര സത്തോ തത്ര വിസത്തോതി തത്ര ലഗ്ഗോ തത്ര വിലഗ്ഗോ. പംസ്വാഗാരകേഹീതി പംസുഘരകേഹി. കേളായന്തീതി കീളന്തി. ധനായന്തീതി ധനം വിയ മഞ്ഞന്തി. മമായന്തീതി ‘‘മമ ഇദം, മമ ഇദ’’ന്തി മമത്തം കരോന്തി, അഞ്ഞസ്സ ഫുസിതുമ്പി ന ദേന്തി. വികീളനിയം കരോന്തീതി ‘‘നിട്ഠിതാ കീളാ’’തി തേ ഭിന്ദമാനാ കീളാവിഗമം കരോന്തി. തതിയേ ഭവനേത്തീതി ഭവരജ്ജു. ചതുത്ഥം ഉത്താനമേവ. പഞ്ചമാദീസു ചതൂസു ചത്താരി സച്ചാനി കഥിതാനി, ദ്വീസു കിലേസപ്പഹാനന്തി. ദുതിയാദീനി.

പഠമോ വഗ്ഗോ.