൧൦. സീലവന്തസുത്തവണ്ണനാ

൧൨൨. ദസമേ അനിച്ചതോതിആദീസു ഹുത്വാ അഭാവാകാരേന അനിച്ചതോ, പടിപീളനാകാരേന ദുക്ഖതോ, ആബാധട്ഠേന രോഗതോ, അന്തോദോസട്ഠേന ഗണ്ഡതോ, തേസം തേസം ഗണ്ഡാനം പച്ചയഭാവേന വാ ഖണനട്ഠേന വാ സല്ലതോ ദുക്ഖട്ഠേന അഘതോ, വിസഭാഗമഹാഭൂതസമുട്ഠാനആബാധപച്ചയട്ഠേന ആബാധതോ, അസകട്ഠേന പരതോ, പലുജ്ജനട്ഠേന പലോകതോ, സത്തസുഞ്ഞതട്ഠേന സുഞ്ഞതോ, അത്താഭാവേന അനത്തതോ. ഏവമേത്ഥ ‘‘അനിച്ചതോ പലോകതോ’’തി ദ്വീഹി പദേഹി അനിച്ചമനസികാരോ, ‘‘സുഞ്ഞതോ അനത്തതോ’’തി ദ്വീഹി അനത്തമനസികാരോ, സേസേഹി ദുക്ഖമനസികാരോ വുത്തോതി വേദിതബ്ബോ. സേസമേത്ഥ ഉത്താനമേവ. ദസമം.