൨. അരതീസുത്തവണ്ണനാ

൨൧൦. ദുതിയേ നിക്ഖമതീതി വിഹാരാ നിക്ഖമതി. അപരജ്ജു വാ കാലേതി ദുതിയദിവസേ വാ ഭിക്ഖാചാരകാലേ. വിഹാരഗരുകോ കിരേസ ഥേരോ. അരതിഞ്ച രതിഞ്ചാതി സാസനേ അരതിം കാമഗുണേസു ച രതിം. സബ്ബസോ ഗേഹസിതഞ്ച വിതക്കന്തി പഞ്ചകാമഗുണഗേഹനിസ്സിതം പാപവിതക്കഞ്ച സബ്ബാകാരേന പഹായ. വനഥന്തി കിലേസമഹാവനം. കുഹിഞ്ചീതി കിസ്മിഞ്ചി ആരമ്മണേ. നിബ്ബനഥോതി നിക്കിലേസവനോ. അരതോതി തണ്ഹാരതിരഹിതോ.

പഥവിഞ്ച വേഹാസന്തി പഥവിട്ഠിതഞ്ച ഇത്ഥിപുരിസവത്ഥാലങ്കാരാദിവണ്ണം, വേഹാസട്ഠകഞ്ച ചന്ദസൂരിയോഭാസാദി. രൂപഗതന്തി രൂപമേവ. ജഗതോഗധന്തി ജഗതിയാ ഓഗധം, അന്തോപഥവിയം നാഗഭവനഗതന്തി അത്ഥോ. പരിജീയതീതി പരിജീരതി. സബ്ബമനിച്ചന്തി സബ്ബം തം അനിച്ചം. അയം ഥേരസ്സ മഹാവിപസ്സനാതി വദന്തി. ഏവം സമച്ചാതി ഏവം സമാഗന്ത്വാ. ചരന്തി മുതത്താതി വിഞ്ഞാതത്തഭാവാ വിഹരന്തി.

ഉപധീസൂതി ഖന്ധകിലേസാഭിസങ്ഖാരേസു. ഗധിതാതി ഗിദ്ധാ. ദിട്ഠസുതേതി ചക്ഖുനാ ദിട്ഠേ രൂപേ, സോതേന സുതേ സദ്ദേ. പടിഘേ ച മുതേ ചാതി ഏത്ഥ പടിഘപദേന ഗന്ധരസാ ഗഹിതാ, മുതപദേന ഫോട്ഠബ്ബാരമ്മണം. യോ ഏത്ഥ ന ലിമ്പതീതി യോ ഏതേസു പഞ്ചകാമഗുണേസു തണ്ഹാദിട്ഠിലേപേഹി ന ലിമ്പതി.

അഥ സട്ഠിനിസ്സിതാ സവിതക്കാ, പുഥൂ ജനതായ അധമ്മാ നിവിട്ഠാതി അഥ ഛ ആരമ്മണനിസ്സിതാ പുഥൂ അധമ്മവിതക്കാ ജനതായ നിവിട്ഠാതി അത്ഥോ. ന ച വഗ്ഗഗതസ്സ കുഹിഞ്ചീതി തേസം വസേന ന കത്ഥചി കിലേസവഗ്ഗഗതോ ഭവേയ്യ. നോ പന ദുട്ഠുല്ലഭാണീതി ദുട്ഠുല്ലവചനഭാണീപി ന സിയാ. സ ഭിക്ഖൂതി സോ ഏവംവിധോ ഭിക്ഖു നാമ ഹോതി.

ദബ്ബോതി ദബ്ബജാതികോ പണ്ഡിതോ. ചിരരത്തസമാഹിതോതി ദീഘരത്തം സമാഹിതചിത്തോ. നിപകോതി നേപക്കേന സമന്നാഗതോ പരിണതപഞ്ഞോ. അപിഹാലൂതി നിത്തണ്ഹോ. സന്തം പദന്തി നിബ്ബാനം. അജ്ഝഗമാ മുനീതി അധിഗതോ മുനി. പടിച്ച പരിനിബ്ബുതോ കങ്ഖതി കാലന്തി നിബ്ബാനം പടിച്ച കിലേസപരിനിബ്ബാനേന പരിനിബ്ബുതോ പരിനിബ്ബാനകാലം ആഗമേതി. ദുതിയം.