൪. വിജയാസുത്തവണ്ണനാ

൧൬൫. ചതുത്ഥേ പഞ്ചങ്ഗികേനാതി ആതതം വിതതം ആതതവിതതം ഘനം സുസിരന്തി ഏവം പഞ്ചങ്ഗസമന്നാഗതേന. നിയ്യാതയാമി തുയ്ഹേവാതി സബ്ബേ തുയ്ഹംയേവ ദേമി. നാഹം തേനത്ഥികാതി നാഹം തേന അത്ഥികാ. പൂതികായേനാതി സുവണ്ണവണ്ണോപി കായോ നിച്ചം ഉഗ്ഘരിതപഗ്ഘരിതട്ഠേന പൂതികായോവ, തസ്മാ ഏവമാഹ. ഭിന്ദനേനാതി ഭിജ്ജനസഭാവേന. പഭങ്ഗുനാതി ചുണ്ണവിചുണ്ണം ആപജ്ജനധമ്മേന. അട്ടീയാമീതി അട്ടാ പീളിതാ ഹോമി. ഹരായാമീതി ലജ്ജാമി. സന്താ സമാപത്തീതി അട്ഠവിധാ ലോകിയസമാപത്തി ആരമ്മണസന്തതായ അങ്ഗസന്തതായ ച സന്താതി വുത്താ. സബ്ബത്ഥാതി സബ്ബേസു രൂപാരൂപഭവേസു, തേസം ദ്വിന്നം ഭവാനം ഗഹിതത്താ ഗഹിതേ കാമഭവേ അട്ഠസു ച സമാപത്തീസൂതി ഏതേസു സബ്ബേസു ഠാനേസു മയ്ഹം അവിജ്ജാതമോ വിഹതോതി വദതി. ചതുത്ഥം.