൯. പഠമസുക്കാസുത്തവണ്ണനാ

൨൪൩. നവമേ രഥികായ രഥികന്തി ഏകം രഥികം ഗഹേത്വാ തതോ അപരം ഗച്ഛന്തോ രഥികായ രഥികം ഉപസങ്കമന്തോ നാമ ഹോതി. സിങ്ഘാടകേപി ഏസേവ നയോ. ഏത്ഥ ച രഥികാതി രച്ഛാ. സിങ്ഘാടകന്തി ചതുക്കം. കിം മേ കതാതി കിം ഇമേ കതാ? കിം കരോന്തീതി അത്ഥോ. മധുപീതാവ സേയരേതി ഗന്ധമധുപാനം പീതാ വിയ സയന്തി. ഗന്ധമധുപാനം പീതോ കിര സീസം ഉക്ഖിപിതും ന സക്കോതി, അസഞ്ഞീ ഹുത്വാ സയതേവ. തസ്മാ ഏവമാഹ.

തഞ്ച പന അപ്പടിവാനീയന്തി തഞ്ച പന ധമ്മം അപ്പടിവാനീയം ദേസേതി. ബാഹിരകഞ്ഹി സുമധുരമ്പി ഭോജനം പുനപ്പുനം ഭുഞ്ജന്തസ്സ ന രുച്ചതി, ‘‘അപനേഥ, കിം ഇമിനാ’’തി? പടിവാനേതബ്ബം അപനേതബ്ബം ഹോതി, ന ഏവമയം ധമ്മോ. ഇമം ഹി ധമ്മം പണ്ഡിതാ വസ്സസതമ്പി വസ്സസഹസ്സമ്പി സുണന്താ തിത്തിം ന ഗച്ഛന്തി. തേനാഹ ‘‘അപ്പടിവാനീയ’’ന്തി. അസേചനകമോജവന്തി അനാസിത്തകം ഓജവന്തം. യഥാ ഹി ബാഹിരാനി അസമ്ഭിന്നപായാസാദീനിപി സപ്പിമധുസക്ഖരാഹി ആസിത്താനി യോജിതാനേവ മധുരാനി ഓജവന്താനി ഹോന്തി, ന ഏവമയം ധമ്മോ. അയം ഹി അത്തനോ ധമ്മതായ മധുരോ ചേവ ഓജവാ ച, ന അഞ്ഞേന ഉപസിത്തോ. തേനാഹ ‘‘അസേചനകമോജവ’’ന്തി. പിവന്തി മഞ്ഞേ സപ്പഞ്ഞാതി പണ്ഡിതപുരിസാ പിവന്തി വിയ. വലാഹകമേവ പന്ഥഗൂതി വലാഹകന്തരതോ നിക്ഖന്തഉദകം ഘമ്മാഭിതത്താ പഥികാ വിയ. നവമം.