൯. പിണ്ഡപാതപാരിസുദ്ധിസുത്തവണ്ണനാ

൪൩൮. ഏവം മേ സുതന്തി പിണ്ഡപാതപാരിസുദ്ധിസുത്തം. തത്ഥ പടിസല്ലാനാതി ഫലസമാപത്തിതോ.

വിപ്പസന്നാനീതി ഓകാസവസേനേതം വുത്തം. ഫലസമാപത്തിതോ ഹി വുട്ഠിതസ്സ പഞ്ചഹി പസാദേഹി പതിട്ഠിതോകാസോ വിപ്പസന്നോ ഹോതി, ഛവിവണ്ണോ പരിസുദ്ധോ. തസ്മാ ഏവമാഹ. സുഞ്ഞതവിഹാരേനാതി സുഞ്ഞതഫലസമാപത്തിവിഹാരേന. മഹാപുരിസവിഹാരോതി ബുദ്ധപച്ചേകബുദ്ധതഥാഗതമഹാസാവകാനം മഹാപുരിസാനം വിഹാരോ. യേന ചാഹം മഗ്ഗേനാതിആദീസു വിഹാരതോ പട്ഠായ യാവ ഗാമസ്സ ഇന്ദഖീലാ ഏസ പവിട്ഠമഗ്ഗോ നാമ, അന്തോഗാമം പവിസിത്വാ ഗേഹപടിപാടിയാ ചരിത്വാ യാവ നഗരദ്വാരേന നിക്ഖമനാ ഏസ ചരിതബ്ബപദേസോ നാമ, ബഹി ഇന്ദഖീലതോ പട്ഠായ യാവ വിഹാരാ ഏസ പടിക്കന്തമഗ്ഗോ നാമ. പടിഘം വാപി ചേതസോതി ചിത്തേ പടിഹഞ്ഞനകിലേസജാതം കിഞ്ചി അത്ഥി നത്ഥീതി. അഹോരത്താനുസിക്ഖിനാതി ദിവസഞ്ച രത്തിഞ്ച അനുസിക്ഖന്തേന.

൪൪൦. പഹീനാ നു ഖോ മേ പഞ്ച കാമഗുണാതിആദീസു ഏകഭിക്ഖുസ്സ പച്ചവേക്ഖണാ നാനാ, നാനാഭിക്ഖൂനം പച്ചവേക്ഖണാ നാനാതി. കഥം? ഏകോ ഹി ഭിക്ഖു പച്ഛാഭത്തം പിണ്ഡപാതപടിക്കന്തോ പത്തചീവരം പടിസാമേത്വാ വിവിത്തോകാസേ നിസിന്നോ പച്ചവേക്ഖതി ‘‘പഹീനാ നു ഖോ മേ പഞ്ചകാമഗുണാ’’തി. സോ ‘‘അപ്പഹീനാ’’തി ഞത്വാ വീരിയം പഗ്ഗയ്ഹ അനാഗാമിമഗ്ഗേന പഞ്ചകാമഗുണികരാഗം സമുഗ്ഘാടേത്വാ മഗ്ഗാനന്തരം ഫലം ഫലാനന്തരം മഗ്ഗം തതോ വുട്ഠായ പച്ചവേക്ഖന്തോ ‘‘പഹീനാ’’തി പജാനാതി. നീവരണാദീസുപി ഏസേവ നയോ. ഏതേസം പന അരഹത്തമഗ്ഗേന പഹാനാദീനി ഹോന്തി, ഏവം ഏകഭിക്ഖുസ്സ നാനാപച്ചവേക്ഖണാ ഹോതി. ഏതാസു പന പച്ചവേക്ഖണാസു അഞ്ഞോ ഭിക്ഖു ഏകം പച്ചവേക്ഖണം പച്ചവേക്ഖതി, അഞ്ഞോ ഏകന്തി ഏവം നാനാഭിക്ഖൂനം നാനാപച്ചവേക്ഖണാ ഹോതി. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

പിണ്ഡപാതപാരിസുദ്ധിസുത്തവണ്ണനാ നിട്ഠിതാ.