൯. കായഗതാസതിസുത്തവണ്ണനാ

൧൫൩-൪. ഏവം മേ സുതന്തി കായഗതാസതിസുത്തം. തത്ഥ ഗേഹസിതാതി പഞ്ചകാമഗുണനിസ്സിതാ. സരസങ്കപ്പാതി ധാവനസങ്കപ്പാ. സരന്തീതി ഹി സരാ, ധാവന്തീതി അത്ഥോ. അജ്ഝത്തമേവാതി ഗോചരജ്ഝത്തസ്മിംയേവ. കായഗതാസതിന്തി കായപരിഗ്ഗാഹികമ്പി കായാരമ്മണമ്പി സതിം. കായപരിഗ്ഗാഹികന്തി വുത്തേ സമഥോ കഥിതോ ഹോതി, കായാരമ്മണന്തി വുത്തേ വിപസ്സനാ. ഉഭയേന സമഥവിപസ്സനാ കഥിതാ ഹോന്തി.

പുന ചപരം…പേ… ഏവമ്പി, ഭിക്ഖവേ, ഭിക്ഖു കായഗതാസതിം ഭാവേതീതി സതിപട്ഠാനേ ചുദ്ദസവിധേന കായാനുപസ്സനാ കഥിതാ.

൧൫൬. അന്തോഗധാവാസ്സാതി തസ്സ ഭിക്ഖുനോ ഭാവനായ അബ്ഭന്തരഗതാവ ഹോന്തി. വിജ്ജാഭാഗിയാതി ഏത്ഥ സമ്പയോഗവസേന വിജ്ജം ഭജന്തീതി വിജ്ജാഭാഗിയാ. വിജ്ജാഭാഗേ വിജ്ജാകോട്ഠാസേ വത്തന്തീതിപി വിജ്ജാഭാഗിയാ. തത്ഥ വിപസ്സനാഞാണം, മനോമയിദ്ധി, ഛ അഭിഞ്ഞാതി അട്ഠ വിജ്ജാ. പുരിമേന അത്ഥേന താഹി സമ്പയുത്തധമ്മാപി വിജ്ജാഭാഗിയാ. പച്ഛിമേന അത്ഥേന താസു യാ കാചി ഏകാ വിജ്ജാ വിജ്ജാ, സേസാ വിജ്ജാഭാഗിയാതി ഏവം വിജ്ജാപി വിജ്ജായ സമ്പയുത്താ ധമ്മാപി വിജ്ജാഭാഗിയാതേവ വേദിതബ്ബാ. ചേതസാ ഫുടോതി ഏത്ഥ ദുവിധം ഫരണം ആപോഫരണഞ്ച, ദിബ്ബചക്ഖുഫരണഞ്ച, തത്ഥ ആപോകസിണം സമാപജ്ജിത്വാ ആപേന ഫരണം ആപോഫരണം നാമ. ഏവം ഫുടേപി മഹാസമുദ്ദേ സബ്ബാ സമുദ്ദങ്ഗമാ കുന്നദിയോ അന്തോഗധാവ ഹോന്തി, ആലോകം പന വഡ്ഢേത്വാ ദിബ്ബചക്ഖുനാ സകലസമുദ്ദസ്സ ദസ്സനം ദിബ്ബചക്ഖുഫരണം നാമ. ഏവം ഫരണേപി മഹാസമുദ്ദേ സബ്ബാ സമുദ്ദങ്ഗമാ കുന്നദിയോ അന്തോഗധാവ ഹോന്തി.

ഓതാരന്തി വിവരം ഛിദ്ദം. ആരമ്മണന്തി കിലേസുപ്പത്തിപച്ചയം. ലഭേഥ ഓതാരന്തി ലഭേയ്യ പവേസനം, വിനിവിജ്ഝിത്വാ യാവ പരിയോസാനാ ഗച്ഛേയ്യാതി അത്ഥോ. നിക്ഖേപനന്തി നിക്ഖിപനട്ഠാനം.

൧൫൭. ഏവം അഭാവിതകായഗതാസതിം പുഗ്ഗലം അല്ലമത്തികപുഞ്ജാദീഹി ഉപമേത്വാ ഇദാനി ഭാവിതകായഗതാസതിം സാരഫലകാദീഹി ഉപമേതും സേയ്യഥാപീതിആദിമാഹ. തത്ഥ അഗ്ഗളഫലകന്തി കവാടം.

൧൫൮. കാകപേയ്യോതി മുഖവട്ടിയം നിസീദിത്വാ കാകേന ഗീവം അനാമേത്വാവ പാതബ്ബോ. അഭിഞ്ഞാസച്ഛികരണീയസ്സാതി അഭിഞ്ഞായ സച്ഛികാതബ്ബസ്സ. സക്ഖിഭബ്ബതം പാപുണാതീതി പച്ചക്ഖഭാവം പാപുണാതി. സതി സതി ആയതനേതി സതിസതി കാരണേ. കിം പനേത്ഥ കാരണന്തി? അഭിഞ്ഞാവ കാരണം. ആളിബന്ധാതി മരിയാദബദ്ധാ.

യാനീകതായാതി യുത്തയാനം വിയ കതായ. വത്ഥുകതായാതി പതിട്ഠാകതായ. അനുട്ഠിതായാതി അനുപ്പവത്തിതായ. പരിചിതായാതി പരിചയകതായ. സുസമാരദ്ധായാതി സുട്ഠു സമാരദ്ധായ സുസമ്പഗ്ഗഹിതായ. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

കായഗതാസതിസുത്തവണ്ണനാ നിട്ഠിതാ.