൬. ഏസുകാരീസുത്തവണ്ണനാ

൪൩൭. ഏവം മേ സുതന്തി ഏസുകാരീസുത്തം. തത്ഥ ബിലം ഓലഗ്ഗേയ്യുന്തി കോട്ഠാസം ലഗ്ഗാപേയ്യും, ഇമിനാ സത്ഥധമ്മം നാമ ദസ്സേതി. സത്ഥവാഹോ കിര മഹാകന്താരപടിപന്നോ അന്തരാമഗ്ഗേ ഗോണേ മതേ മംസം ഗഹേത്വാ സബ്ബേസം സത്ഥികാനം ‘‘ഇദം ഖാദിത്വാ ഏത്തകം മൂലം ദാതബ്ബ’’ന്തി കോട്ഠാസം ഓലഗ്ഗേതി, ഗോണമംസം നാമ ഖാദന്താപി അത്ഥി അഖാദന്താപി, മൂലം ദാതും സക്കോന്താപി അസക്കോന്താപി. സത്ഥവാഹോ യേന മൂലേന ഗോണോ ഗഹിതോ, തസ്സ നിക്ഖമനത്ഥം സബ്ബേസം ബലക്കാരേന കോട്ഠാസം ദത്വാ മൂലം ഗണ്ഹാതി, അയം സത്ഥധമ്മോ. ഏവമേവം ബ്രാഹ്മണാപി ലോകസ്സ പടിഞ്ഞം അഗ്ഗഹേത്വാ അത്തനോവ ധമ്മതായ ചതസ്സോ പാരിചരിയാ പഞ്ഞപേന്തീതി ദസ്സേതും ഏവമേവ ഖോതിആദിമാഹ. പാപിയോ അസ്സാതി പാപം അസ്സ. സേയ്യോ അസ്സാതി ഹിതം അസ്സ. അഥ വാ പാപിയോതി പാപകോ ലാമകോ അത്തഭാവോ അസ്സ. സേയ്യോതി സേട്ഠോ ഉത്തമോ. സേയ്യംസോതി സേയ്യോ. ഉച്ചാകുലീനതാതി ഉച്ചാകുലീനത്തേന സേയ്യോ. പാപിയംസോതി പാപിയോ. ഉച്ചാകുലീനതാ ച ദ്വീസു കുലേസു വഡ്ഢേതി ഖത്തിയകുലേ ബ്രാഹ്മണകുലേ ച, ഉളാരവണ്ണതാ തീസു. വേസ്സോപി ഹി ഉളാരവണ്ണോ ഹോതി. ഉളാരഭോഗതാ ചതൂസുപി. സുദ്ദോപി ഹി അന്തമസോ ചണ്ഡാലോപി ഉളാരഭോഗോ ഹോതിയേവ.

൪൪൦. ഭിക്ഖാചരിയന്തി കോടിധനേനപി ഹി ബ്രാഹ്മണേന ഭിക്ഖാ ചരിതബ്ബാവ, പോരാണകബ്രാഹ്മണാ അസീതികോടിധനാപി ഏകവേലം ഭിക്ഖം ചരന്തി. കസ്മാ? ദുഗ്ഗതകാലേ ചരന്താനം ഇദാനി ഭിക്ഖം ചരിതും ആരദ്ധാതി ഗരഹാ ന ഭവിസ്സതീതി. അതിമഞ്ഞമാനോതി യോ ഭിക്ഖാചരിയവംസം ഹരിത്വാ സത്തജീവകസികമ്മവണിജ്ജാദീഹി ജീവികം കപ്പേതി, അയം അതിമഞ്ഞതി നാമ. ഗോപോ വാതി യഥാ ഗോപകോ അത്തനാ രക്ഖിതബ്ബം ഭണ്ഡം ഥേനേന്തോ അകിച്ചകാരീ ഹോതി, ഏവന്തി അത്ഥോ. ഇമിനാ നയേന സബ്ബവാരേസു അത്ഥോ വേദിതബ്ബോ. അസിതബ്യാഭങ്ഗിന്തി തിണലായനഅസിതഞ്ചേവ കാജഞ്ച. അനുസ്സരതോതി യത്ഥ ജാതോ, തസ്മിം പോരാണേ മാതാപേത്തികേ കുലവംസേ അനുസ്സരിയമാനേതി അത്ഥോ. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

ഏസുകാരീസുത്തവണ്ണനാ നിട്ഠിതാ.