൧൦. ചൂളഅസ്സപുരസുത്തവണ്ണനാ

൪൩൫. ഏവം മേ സുതന്തി ചൂളഅസ്സപുരസുത്തം. തസ്സ ദേസനാകാരണം പുരിമസദിസമേവ. സമണസാമീചിപ്പടിപദാതി സമണാനം അനുച്ഛവികാ സമണാനം അനുലോമപ്പടിപദാ.

൪൩൬. സമണമലാനന്തിആദീസു ഏതേ ധമ്മാ ഉപ്പജ്ജമാനാ സമണേ മലിനേ കരോന്തി മലഗ്ഗഹിതേ, തസ്മാ ‘‘സമണമലാ’’തി വുച്ചന്തി. ഏതേഹി സമണാ ദുസ്സന്തി, പദുസ്സന്തി, തസ്മാ സമണദോസാതി വുച്ചന്തി. ഏതേ ഉപ്പജ്ജിത്വാ സമണേ കസടേ നിരോജേ കരോന്തി മിലാപേന്തി, തസ്മാ സമണകസടാതി വുച്ചന്തി. ആപായികാനം ഠാനാനന്തി അപായേ നിബ്ബത്താപകാനം കാരണാനം. ദുഗ്ഗതിവേദനിയാനന്തി ദുഗ്ഗതിയം വിപാകവേദനായ പച്ചയാനം. മതജം നാമാതി മനുസ്സാ തിഖിണം അയം അയേന സുഘംസിത്വാ തം അയചുണ്ണം മംസേന സദ്ധിം മദ്ദിത്വാ കോഞ്ചസകുണേ ഖാദാപേന്തി. തേ ഉച്ചാരം കാതും അസക്കോന്താ മരന്തി. നോ ചേ മരന്തി, പഹരിത്വാ മാരേന്തി. അഥ തേസം കുച്ഛിം ഫാലേത്വാ നം ഉദകേന ധോവിത്വാ ചുണ്ണം ഗഹേത്വാ മംസേന സദ്ധിം മദ്ദിത്വാ പുന ഖാദാപേന്തീതി ഏവം സത്ത വാരേ ഖാദാപേത്വാ ഗഹിതേന അയചുണ്ണേന ആവുധം കരോന്തി. സുസിക്ഖിതാ ച നം അയകാരാ ബഹുഹത്ഥകമ്മമൂലം ലഭിത്വാ കരോന്തി. തം മതസകുണതോ ജാതത്താ ‘‘മതജ’’ന്തി വുച്ചതി, അതിതിഖിണം ഹോതി. പീതനിസിതന്തി ഉദകപീതഞ്ചേവ സിലായ ച സുനിഘംസിതം. സങ്ഘാടിയാതി കോസിയാ. സമ്പാരുതന്തി പരിയോനദ്ധം. സമ്പലിവേഠിതന്തി സമന്തതോ വേഠിതം.

൪൩൭. രജോജല്ലികസ്സാതി രജോജല്ലധാരിനോ. ഉദകോരോഹകസ്സാതി ദിവസസ്സ തിക്ഖത്തും ഉദകം ഓരോഹന്തസ്സ. രുക്ഖമൂലികസ്സാതി രുക്ഖമൂലവാസിനോ. അബ്ഭോകാസികസ്സാതി അബ്ഭോകാസവാസിനോ. ഉബ്ഭട്ഠകസ്സാതി ഉദ്ധം ഠിതകസ്സ. പരിയായഭത്തികസ്സാതി മാസവാരേന വാ അഡ്ഢമാസവാരേന വാ ഭുഞ്ജന്തസ്സ. സബ്ബമേതം ബാഹിരസമയേനേവ കഥിതം. ഇമസ്മിഞ്ഹി സാസനേ ചീവരധരോ ഭിക്ഖു സങ്ഘാടികോതി ന വുച്ചതി. രജോജല്ലധാരണാദിവതാനി ഇമസ്മിം സാസനേ നത്ഥിയേവ. ബുദ്ധവചനസ്സ ബുദ്ധവചനമേവ നാമം, ന മന്താതി. രുക്ഖമൂലികോ, അബ്ഭോകാസികോതി ഏത്തകംയേവ പന ലബ്ഭതി. തമ്പി ബാഹിരസമയേനേവ കഥിതം. ജാതമേവ നന്തി തംദിവസേ ജാതമത്തംയേവ നം. സങ്ഘാടികം കരേയ്യുന്തി സങ്ഘാടികം വത്ഥം നിവാസേത്വാ ച പാരുപിത്വാ ച സങ്ഘാടികം കരേയ്യും. ഏസ നയോ സബ്ബത്ഥ.

൪൩൮. വിസുദ്ധമത്താനം സമനുപസ്സതീതി അത്താനം വിസുജ്ഝന്തം പസ്സതി. വിസുദ്ധോതി പന ന താവ വത്തബ്ബോ. പാമോജ്ജം ജായതീതി തുട്ഠാകാരോ ജായതി. പമുദിതസ്സ പീതീതി തുട്ഠസ്സ സകലസരീരം ഖോഭയമാനാ പീതി ജായതി. പീതിമനസ്സ കായോതി പീതിസമ്പയുത്തസ്സ പുഗ്ഗലസ്സ നാമകായോ. പസ്സമ്ഭതീതി വിഗതദരഥോ ഹോതി. സുഖം വേദേതീതി കായികമ്പി ചേതസികമ്പി സുഖം വേദിയതി. ചിത്തം സമാധിയതീതി ഇമിനാ നേക്ഖമ്മസുഖേന സുഖിതസ്സ ചിത്തം സമാധിയതി, അപ്പനാപത്തം വിയ ഹോതി. സോ മേത്താസഹഗതേന ചേതസാതി ഹേട്ഠാ കിലേസവസേന ആരദ്ധാ ദേസനാ പബ്ബതേ വുട്ഠവുട്ഠി വിയ നദിം യഥാനുസന്ധിനാ ബ്രഹ്മവിഹാരഭാവനം ഓതിണ്ണാ. തത്ഥ യം വത്തബ്ബം സിയാ, തം സബ്ബം വിസുദ്ധിമഗ്ഗേ വുത്തമേവ. സേയ്യഥാപി, ഭിക്ഖവേ, പോക്ഖരണീതി മഹാസീഹനാദസുത്തേ മഗ്ഗോ പോക്ഖരണിയാ ഉപമിതോ, ഇധ സാസനം ഉപമിതന്തി വേദിതബ്ബം. ആസവാനം ഖയാ സമണോ ഹോതീതി സബ്ബകിലേസാനം സമിതത്താ പരമത്ഥസമണോ ഹോതീതി. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

ചൂളഅസ്സപുരസുത്തവണ്ണനാ നിട്ഠിതാ.

ചതുത്ഥവഗ്ഗവണ്ണനാ നിട്ഠിതാ.