൭. വനപത്ഥപരിയായസുത്തവണ്ണനാ

൧൯൦. ഏവം മേ സുതന്തി വനപത്ഥപരിയായം. തത്ഥ വനപത്ഥപരിയായന്തി വനപത്ഥകാരണം, വനപത്ഥദേസനം വാ.

൧൯൧. വനപത്ഥം ഉപനിസ്സായ വിഹരതീതി മനുസ്സൂപചാരാതിക്കന്തം വനസണ്ഡസേനാസനം നിസ്സായ സമണധമ്മം കരോന്തോ വിഹരതി. അനുപട്ഠിതാതിആദീസു പുബ്ബേ അനുപട്ഠിതാ സതി തം ഉപനിസ്സായ വിഹരതോപി ന ഉപട്ഠാതി, പുബ്ബേ അസമാഹിതം ചിത്തം ന സമാധിയതി, പുബ്ബേ അപരിക്ഖീണാ ആസവാ ന പരിക്ഖയം ഗച്ഛന്തി, പുബ്ബേ അനനുപ്പത്തം അനുത്തരം യോഗക്ഖേമസങ്ഖാതം അരഹത്തഞ്ച ന പാപുണാതീതി അത്ഥോ. ജീവിതപരിക്ഖാരാതി ജീവിതസമ്ഭാരാ. സമുദാനേതബ്ബാതി സമാഹരിതബ്ബാ. കസിരേന സമുദാഗച്ഛന്തീതി ദുക്ഖേന ഉപ്പജ്ജന്തി. രത്തിഭാഗം വാ ദിവസഭാഗം വാതി രത്തികോട്ഠാസേ വാ ദിവസകോട്ഠാസേ വാ. ഏത്ഥ ച രത്തിഭാഗേ പടിസഞ്ചിക്ഖമാനേന ഞത്വാ രത്തിംയേവ പക്കമിതബ്ബം, രത്തിം ചണ്ഡവാളാദീനം പരിബന്ധേ സതി അരുണുഗ്ഗമനം ആഗമേതബ്ബം. ദിവസഭാഗേ ഞത്വാ ദിവാവ പക്കമിതബ്ബം, ദിവാ പരിബന്ധേ സതി സൂരിയത്ഥങ്ഗമനം ആഗമേതബ്ബം.

൧൯൨. സങ്ഖാപീതി ഏവം സമണധമ്മസ്സ അനിപ്ഫജ്ജനഭാവം ജാനിത്വാ. അനന്തരവാരേ പന സങ്ഖാപീതി ഏവം സമണധമ്മസ്സ നിപ്ഫജ്ജനഭാവം ജാനിത്വാ.

൧൯൪. യാവജീവന്തി യാവ ജീവിതം പവത്തതി, താവ വത്ഥബ്ബമേവ.

൧൯൫. സോ പുഗ്ഗലോതി പദസ്സ നാനുബന്ധിതബ്ബോതി ഇമിനാ സമ്ബന്ധോ. അനാപുച്ഛാതി ഇധ പന തം പുഗ്ഗലം അനാപുച്ഛാ പക്കമിതബ്ബന്തി അത്ഥോ.

൧൯൭. സങ്ഖാപീതി ഏവം സമണധമ്മസ്സ അനിപ്ഫജ്ജനഭാവം ഞത്വാ സോ പുഗ്ഗലോ നാനുബന്ധിതബ്ബോ, തം ആപുച്ഛാ പക്കമിതബ്ബം.

൧൯൮. അപി പനുജ്ജമാനേനാപീതി അപി നിക്കഡ്ഢീയമാനേനാപി. ഏവരൂപോ ഹി പുഗ്ഗലോ സചേപി ദാരുകലാപസതം വാ ഉദകഘടസതം വാ വാലികമ്ബണസതം വാ ദണ്ഡം ആഹരാപേതി, മാ ഇധ വസീതി നിക്കഡ്ഢാപേതി വാ, തം തം ഖമാപേത്വാ യാവജീവം വത്ഥബ്ബമേവാതി.

പപഞ്ചസൂദനിയാ മജ്ഝിമനികായട്ഠകഥായ

വനപത്ഥപരിയായസുത്തവണ്ണനാ നിട്ഠിതാ.