൪. ചതുത്ഥപീഠവിമാനവണ്ണനാ

പീഠം തേ വേളുരിയമയന്തി ചതുത്ഥപീഠവിമാനം. ഇമസ്സാപി വത്ഥു രാജഗഹേ സമുട്ഠിതം, തം ദുതിയവിമാനേ വുത്തനയേനേവ വേദിതബ്ബം. നീലവത്ഥേന ഹി അത്ഥരിത്വാ പീഠസ്സ ദിന്നത്താ ഇമിസ്സാപി വിമാനം വേളുരിയമയം നിബ്ബത്തം. സേസം പഠമവിമാനേ വുത്തസദിസം. തേന വുത്തം –

൨൩. ‘‘പീഠം തേ വേളുരിയമയം ഉളാരം, മനോജവം ഗച്ഛതി യേനകാമം;

അലങ്കതേ മല്യധരേ സുവത്ഥേ, ഓഭാസസി വിജ്ജുരിവബ്ഭകൂടം.

൨൪. ‘‘കേന തേതാദിസോ വണ്ണോ, കേന തേ ഇധ മിജ്ഝതി;

ഉപ്പജ്ജന്തി ച തേ ഭോഗാ, യേ കേചി മനസോ പിയാ.

൨൫. ‘‘പുച്ഛാമി തം ദേവി മഹാനുഭാവേ, മനുസ്സഭൂതാ കിമകാസി പുഞ്ഞം;

കേനാസി ഏവം ജലിതാനുഭാവാ, വണ്ണോ ച തേ സബ്ബദിസാ പഭാസതീ’’തി.

൨൬. ‘‘സാ ദേവതാ അത്തമനാ, മോഗ്ഗല്ലാനേന പുച്ഛിതാ;

പഞ്ഹം പുട്ഠാ വിയാകാസി, യസ്സ കമ്മസ്സിദം ഫലം’’.

൨൭. ‘‘അപ്പസ്സ കമ്മസ്സ ഫലം മമേദം, യേനമ്ഹി ഏവം ജലിതാനുഭാവാ;

അഹം മനുസ്സേസു മനുസ്സഭൂതാ, പുരിമായ ജാതിയാ മനുസ്സലോകേ.

൨൮. ‘‘അദ്ദസം വിരജം ഭിക്ഖും, വിപ്പസന്നമനാവിലം;

തസ്സ അദാസഹം പീഠം, പസന്നാ സേഹി പാണിഭി.

൨൯. ‘‘തേന മേതാദിസോ വണ്ണോ, തേന മേ ഇധ മിജ്ഝതി;

ഉപ്പജ്ജന്തി ച മേ ഭോഗാ, യേ കേചി മനസോ പിയാ.

൩൦. ‘‘അക്ഖാമി തേ ഭിക്ഖു മഹാനുഭാവ, മനുസ്സഭൂതാ യമകാസി പുഞ്ഞം;

തേനമ്ഹി ഏവം ജലിതാനുഭാവാ, വണ്ണോ ച മേ സബ്ബദിസാ പഭാസതീ’’തി.

ഏത്ഥാപി ഹി നീലവത്ഥേന അത്ഥരിത്വാ പീഠസ്സ ദിന്നത്താ ഇമിസ്സാപി വിമാനം വേളുരിയമയം നിബ്ബത്തം. തേനേവേത്ഥ ‘‘പീഠം തേ വേളുരിയമയ’’ന്തി ആദിതോ ആഗതം. സേസം തതിയസദിസമേവാതി തത്ഥ വുത്തനയേനേവ അത്ഥോ വേദിതബ്ബോ.

ചതുത്ഥപീഠവിമാനവണ്ണനാ നിട്ഠിതാ.