൪. ചതുക്കനിപാതോ

൧. ഭദ്ദാകാപിലാനീഥേരീഗാഥാവണ്ണനാ

ചതുക്കനിപാതേ പുത്തോ ബുദ്ധസ്സ ദായാദോതിആദികാ ഭദ്ദായ കാപിലാനിയാ ഥേരിയാ ഗാഥാ. സാ കിര പദുമുത്തരസ്സ ഭഗവതോ കാലേ ഹംസവതീനഗരേ കുലഗേഹേ നിബ്ബത്തിത്വാ വിഞ്ഞുതം പത്വാ സത്ഥു സന്തികേ ധമ്മം സുണന്തീ സത്ഥാരം ഏകം ഭിക്ഖുനിം പുബ്ബേനിവാസം അനുസ്സരന്തീനം അഗ്ഗട്ഠാനേ ഠപേന്തം ദിസ്വാ അധികാരകമ്മം കത്വാ സയമ്പി തം ഠാനന്തരം പത്ഥേത്വാ യാവജീവം പുഞ്ഞാനി കത്വാ തതോ ചുതാ ദേവമനുസ്സേസു സംസരന്തീ അനുപ്പന്നേ ബുദ്ധേ ബാരാണസിയം കുലഗേഹേ നിബ്ബത്തിത്വാ പതികുലം ഗന്ത്വാ, ഏകദിവസം അത്തനോ നനന്ദായ സദ്ധിം കലഹം കരോന്തീ തായ പച്ചേകബുദ്ധസ്സ പിണ്ഡപാതേ ദിന്നേ ‘‘അയം ഇമസ്സ ദാനം ദത്വാ ഉളാരസമ്പത്തിം ലഭിസ്സതീ’’തി പച്ചേകബുദ്ധസ്സ ഹത്ഥതോ പത്തം ഗഹേത്വാ ഭത്തം ഛഡ്ഡേത്വാ കലലസ്സ പൂരേത്വാ അദാസി. മഹാജനോ ഗരഹി – ‘‘ബാലേ, പച്ചേകബുദ്ധോ തേ കിം അപരജ്ഝീ’’തി? സാ തേസം വചനേന ലജ്ജമാനാ പുന പത്തം ഗഹേത്വാ കലലം നീഹരിത്വാ ധോവിത്വാ ഗന്ധചുണ്ണേന ഉബ്ബട്ടേത്വാ ചതുമധുരസ്സ പൂരേത്വാ ഉപരി ആസിത്തേന പദുമഗബ്ഭവണ്ണേന സപ്പിനാ വിജ്ജോതമാനം പച്ചേകബുദ്ധസ്സ ഹത്ഥേ ഠപേത്വാ ‘‘യഥാ അയം പിണ്ഡപാതോ ഓഭാസജാതോ, ഏവം ഓഭാസജാതം മേ സരീരം ഹോതൂ’’തി പത്ഥനം പട്ഠപേസി. സാ തതോ ചവിത്വാ സുഗതീസുയേവ സംസരന്തീ കസ്സപബുദ്ധകാലേ ബാരാണസിയം മഹാവിഭവസ്സ സേട്ഠിനോ ധീതാ ഹുത്വാ നിബ്ബത്തി. പുബ്ബകമ്മഫലേന ദുഗ്ഗന്ധസരീരാ മനുസ്സേഹി ജിഗുച്ഛിതബ്ബാ ഹുത്വാ സംവേഗജാതാ അത്തനോ ആഭരണേഹി സുവണ്ണിട്ഠകം കാരേത്വാ ഭഗവതോ ചേതിയേ പതിട്ഠപേസി, ഉപ്പലഹത്ഥേന ച പൂജം അകാസി. തേനസ്സാ സരീരം തസ്മിംയേവ ഭവേ സുഗന്ധം മനോഹരം ജാതം. സാ പതിനോ പിയാ മനാപാ ഹുത്വാ യാവജീവം കുസലം കത്വാ തതോ ചുതാ സഗ്ഗേ നിബ്ബത്തി. തത്ഥാപി യാവജീവം ദിബ്ബസുഖം അനുഭവിത്വാ, തതോ ചുതാ ബാരാണസിരഞ്ഞോ ധീതാ ഹുത്വാ തത്ഥ ദേവസമ്പത്തിസദിസം സമ്പത്തിം അനുഭവന്തീ ചിരകാലം പച്ചേകബുദ്ധേ ഉപട്ഠഹിത്വാ, തേസു പരിനിബ്ബുതേസു സംവേഗജാതാ താപസപബ്ബജ്ജായ പബ്ബജിത്വാ ഉയ്യാനേ വസന്തീ ഝാനാനി ഭാവേത്വാ ബ്രഹ്മലോകേ നിബ്ബത്തിത്വാ തതോ ചുതാ സാഗലനഗരേ കോസിയഗോത്തസ്സ ബ്രാഹ്മണകുലസ്സ ഗേഹേ നിബ്ബത്തിത്വാ മഹതാ പരിഹാരേന വഡ്ഢിത്വാ വയപ്പത്താ മഹാതിത്ഥഗാമേ പിപ്ഫലികുമാരസ്സ ഗേഹം നീതാ. തസ്മിം പബ്ബജിതും നിക്ഖന്തേ മഹന്തം ഭോഗക്ഖന്ധം മഹന്തഞ്ച ഞാതിപരിവട്ടം പഹായ പബ്ബജ്ജത്ഥായ നിക്ഖമിത്വാ പഞ്ച വസ്സാനി തിത്ഥിയാരാമേ പവിസിത്വാ അപരഭാഗേ മഹാപജാപതിഗോതമിയാ സന്തികേ പബ്ബജ്ജം ഉപസമ്പദഞ്ച ലഭിത്വാ വിപസ്സനം പട്ഠപേത്വാ ന ചിരസ്സേവ അരഹത്തം പാപുണി. തേന വുത്തം അപദാനേ (അപ. ഥേരീ ൨.൩.൨൪൪-൩൧൩) –

‘‘പദുമുത്തരോ നാമ ജിനോ, സബ്ബധമ്മാന പാരഗൂ;

ഇതോ സതസഹസ്സമ്ഹി, കപ്പേ ഉപ്പജ്ജി നായകോ.

‘‘തദാഹു ഹംസവതിയം, വിദേഹോ നാമ നാമതോ;

സേട്ഠീ പഹൂതരതനോ, തസ്സ ജായാ അഹോസഹം.

‘‘കദാചി സോ നരാദിച്ചം, ഉപേച്ച സപരിജ്ജനോ;

ധമ്മമസ്സോസി ബുദ്ധസ്സ, സബ്ബദുക്ഖഭയപ്പഹം.

‘‘സാവകം ധുതവാദാനം, അഗ്ഗം കിത്തേസി നായകോ;

സുത്വാ സത്താഹികം ദാനം, ദത്വാ ബുദ്ധസ്സ താദിനോ.

‘‘നിപച്ച സിരസാ പാദേ, തം ഠാനമഭിപത്ഥയിം;

സ ഹാസയന്തോ പരിസം, തദാ ഹി നരപുങ്ഗവോ.

‘‘സേട്ഠിനോ അനുകമ്പായ, ഇമാ ഗാഥാ അഭാസഥ;

ലച്ഛസേ പത്ഥിതം ഠാനം, നിബ്ബുതോ ഹോഹി പുത്തക.

‘‘സതസഹസ്സിതോ കപ്പേ, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

കസ്സപോ നാമ ഗോത്തേന, ഹേസ്സതി സത്ഥു സാവകോ.

‘‘തം സുത്വാ മുദിതോ ഹുത്വാ, യാവജീവം തദാ ജിനം;

മേത്തചിത്തോ പരിചരി, പച്ചയേഹി വിനായകം.

‘‘സാസനം ജോതയിത്വാന, സോ മദ്ദിത്വാ കുതിത്ഥിയേ;

വേനേയ്യം വിനയിത്വാ ച, നിബ്ബുതോ സോ സസാവകോ.

‘‘നിബ്ബുതേ തമ്ഹി ലോകഗ്ഗേ, പൂജനത്ഥായ സത്ഥുനോ;

ഞാതിമിത്തേ സമാനേത്വാ, സഹ തേഹി അകാരയി.

‘‘സത്തയോജനികം ഥൂപം, ഉബ്ബിദ്ധം രതനാമയം;

ജലന്തം സതരംസിംവ, സാലരാജംവ ഫുല്ലിതം.

‘‘സത്തസതസഹസ്സാനി, പാതിയോ തത്ഥ കാരയി;

നളഗ്ഗീ വിയ ജോതന്തീ, രതനേഹേവ സത്തഹി.

‘‘ഗന്ധതേലേന പൂരേത്വാ, ദീപാനുജ്ജലയീ തഹിം;

പൂജനത്ഥായ മഹേസിസ്സ, സബ്ബഭൂതാനുകമ്പിനോ.

‘‘സത്തസതസഹസ്സാനി, പുണ്ണകുമ്ഭാനി കാരയി;

രതനേഹേവ പുണ്ണാനി, പൂജനത്ഥായ മഹേസിനോ.

‘‘മജ്ഝേ അട്ഠട്ഠകുമ്ഭീനം, ഉസ്സിതാ കഞ്ചനഗ്ഘിയോ;

അതിരോചന്തി വണ്ണേന, സരദേവ ദിവാകരോ.

‘‘ചതുദ്വാരേസു സോഭന്തി, തോരണാ രതനാമയാ;

ഉസ്സിതാ ഫലകാ രമ്മാ, സോഭന്തി രതനാമയാ.

‘‘വിരോചന്തി പരിക്ഖിത്താ, അവടംസാ സുനിമ്മിതാ;

ഉസ്സിതാനി പടാകാനി, രതനാനി വിരോചരേ.

‘‘സുരത്തം സുകതം ചിത്തം, ചേതിയം രതനാമയം;

അതിരോചതി വണ്ണേന, സസഞ്ഝോവ ദിവാകരോ.

‘‘ഥൂപസ്സ വേദിയോ തിസ്സോ, ഹരിതാലേന പൂരയി;

ഏകം മനോസിലായേകം, അഞ്ജനേന ച ഏകികം.

‘‘പൂജം ഏതാദിസം രമ്മം, കാരേത്വാ വരവാദിനോ;

അദാസി ദാനം സങ്ഘസ്സ, യാവജീവം യഥാബലം.

‘‘സഹാവ സേട്ഠിനാ തേന, താനി പുഞ്ഞാനി സബ്ബസോ;

യാവജീവം കരിത്വാന, സഹാവ സുഗതിം ഗതാ.

‘‘സമ്പത്തിയോനുഭോത്വാന, ദേവത്തേ അഥ മാനുസേ;

ഛായാ വിയ സരീരേന, സഹ തേനേവ സംസരിം.

‘‘ഏകനവുതിതോ കപ്പേ, വിപസ്സീ നാമ നായകോ;

ഉപ്പജ്ജി ചാരുദസ്സനോ, സബ്ബധമ്മവിപസ്സകോ.

‘‘തദായം ബന്ധുപതിയം, ബ്രാഹ്മണോ സാധുസമ്മതോ;

അഡ്ഢോ സന്തോ ഗുണേനാപി, ധനേന ച സുദുഗ്ഗതോ.

‘‘തദാപി തസ്സാഹം ആസിം, ബ്രാഹ്മണീ സമചേതസാ;

കദാചി സോ ദിജവരോ, സങ്ഗമേസി മഹാമുനിം.

‘‘നിസിന്നം ജനകായമ്ഹി, ദേസേന്തം അമതം പദം;

സുത്വാ ധമ്മം പമുദിതോ, അദാസി ഏകസാടകം.

‘‘ഘരമേകേന വത്ഥേന, ഗന്ത്വാനേതം സ മബ്രവി;

അനുമോദ മഹാപുഞ്ഞം, ദിന്നം ബുദ്ധസ്സ സാടകം.

‘‘തദാഹം അഞ്ജലിം കത്വാ, അനുമോദിം സുപീണിതാ;

സുദിന്നോ സാടകോ സാമി, ബുദ്ധസേട്ഠസ്സ താദിനോ.

‘‘സുഖിതോ സജ്ജിതോ ഹുത്വാ, സംസരന്തോ ഭവാഭവേ;

ബാരാണസിപുരേ രമ്മേ, രാജാ ആസി മഹീപതി.

‘‘തദാ തസ്സ മഹേസീഹം, ഇത്ഥിഗുമ്ബസ്സ ഉത്തമാ;

തസ്സാതി ദയിതാ ആസിം, പുബ്ബസ്നേഹേന ഭത്തുനോ.

‘‘പിണ്ഡായ വിചരന്തേ തേ, അട്ഠ പച്ചേകനായകേ;

ദിസ്വാ പമുദിതോ ഹുത്വാ, ദത്വാ പിണ്ഡം മഹാരഹം.

‘‘പുനോ നിമന്തയിത്വാന, കത്വാ രതനമണ്ഡപം;

കമ്മാരേഹി കതം പത്തം, സോവണ്ണം വത തത്തകം.

‘‘സമാനേത്വാന തേ സബ്ബേ, തേസം ദാനമദാസി സോ;

സോണ്ണാസനേ പവിട്ഠാനം, പസന്നോ സേഹി പാണിഭി.

‘‘തമ്പി ദാനം സഹാദാസിം, കാസിരാജേനഹം തദാ;

പുനാഹം ബാരാണസിയം, ജാതാ കാസികഗാമകേ.

‘‘കുടുമ്ബികകുലേ ഫീതേ, സുഖിതോ സോ സഭാതുകോ;

ജേട്ഠസ്സ ഭാതുനോ ജായാ, അഹോസിം സുപതിബ്ബതാ.

‘‘പച്ചേകബുദ്ധം ദിസ്വാന, കനിയസ്സ മമ ഭത്തുനോ;

ഭാഗന്നം തസ്സ ദത്വാന, ആഗതേ തമ്ഹി പാവദിം.

‘‘നാഭിനന്ദിത്ഥ സോ ദാനം, തതോ തസ്സ അദാസഹം;

ഉഖാ ആനിയ തം അന്നം, പുനോ തസ്സേവ സോ അദാ.

‘‘തദന്നം ഛഡ്ഡയിത്വാന, ദുട്ഠാ ബുദ്ധസ്സഹം തദാ;

പത്തം കലലപുണ്ണം തം, അദാസിം തസ്സ താദിനോ.

‘‘ദാനേ ച ഗഹണേ ചേവ, അപചേ പദുസേപി ച;

സമചിത്തമുഖം ദിസ്വാ, തദാഹം സംവിജിം ഭുസം.

‘‘പുനോ പത്തം ഗഹേത്വാന, സോധയിത്വാ സുഗന്ധിനാ,

പസന്നചിത്താ പൂരേത്വാ, സഘതം സക്കരം അദം.

‘‘യത്ഥ യത്ഥൂപപജ്ജാമി, സുരൂപാ ഹോമി ദാനതോ;

ബുദ്ധസ്സ അപകാരേന, ദുഗ്ഗന്ധാ വദനേന ച.

‘‘പുന കസ്സപവീരസ്സ, നിധായന്തമ്ഹി ചേതിയേ;

സോവണ്ണം ഇട്ഠകം വരം, അദാസിം മുദിതാ അഹം.

‘‘ചതുജ്ജാതേന ഗന്ധേന, നിചയിത്വാ തമിട്ഠകം;

മുത്താ ദുഗ്ഗന്ധദോസമ്ഹാ, സബ്ബങ്ഗസുസമാഗതാ.

‘‘സത്ത പാതിസഹസ്സാനി, രതനേഹേവ സത്തഹി;

കാരേത്വാ ഘതപൂരാനി, വട്ടീനി ച സഹസ്സസോ.

‘‘പക്ഖിപിത്വാ പദീപേത്വാ, ഠപയിം സത്തപന്തിയോ;

പൂജനത്ഥം ലോകനാഥസ്സ, വിപ്പസന്നേന ചേതസാ.

‘‘തദാപി തമ്ഹി പുഞ്ഞമ്ഹി, ഭാഗിനീയി വിസേസതോ;

പുന കാസീസു സഞ്ജാതോ, സുമിത്താ ഇതി വിസ്സുതോ.

‘‘തസ്സാഹം ഭരിയാ ആസിം, സുഖിതാ സജ്ജിതാ പിയാ;

തദാ പച്ചേകമുനിനോ, അദാസിം ഘനവേഠനം.

‘‘തസ്സാപി ഭാഗിനീ ആസിം, മോദിത്വാ ദാനമുത്തമം;

പുനാപി കാസിരട്ഠമ്ഹി, ജാതോ കോലിയജാതിയാ.

‘‘തദാ കോലിയപുത്താനം, സതേഹി സഹ പഞ്ചഹി;

പഞ്ച പച്ചേകബുദ്ധാനം, സതാനി സമുപട്ഠഹി.

‘‘തേമാസം തപ്പയിത്വാന, അദാസി ച തിചീവരേ;

ജായാ തസ്സ തദാ ആസിം, പുഞ്ഞകമ്മപഥാനുഗാ.

‘‘തതോ ചുതോ അഹു രാജാ, നന്ദോ നാമ മഹായസോ;

തസ്സാപി മഹേസീ ആസിം, സബ്ബകാമസമിദ്ധിനീ.

‘‘തദാ രാജാ ഭവിത്വാന, ബ്രഹ്മദത്തോ മഹീപതി;

പദുമവതീപുത്താനം, പച്ചേകമുനിനം തദാ.

‘‘സതാനി പഞ്ചനൂനാനി, യാവജീവം ഉപട്ഠഹിം;

രാജുയ്യാനേ നിവാസേത്വാ, നിബ്ബുതാനി ച പൂജയിം.

‘‘ചേതിയാനി ച കാരേത്വാ, പബ്ബജിത്വാ ഉഭോ മയം;

ഭാവേത്വാ അപ്പമഞ്ഞായോ, ബ്രഹ്മലോകം അഗമ്ഹസേ.

‘‘തതോ ചുതോ മഹാതിത്ഥേ, സുജാതോ പിപ്ഫലായനോ;

മാതാ സുമനദേവീതി, കോസിഗോത്തോ ദിജോ പിതാ.

‘‘അഹം മദ്ദേ ജനപദേ, സാകലായ പുരുത്തമേ;

കപ്പിലസ്സ ദിജസ്സാസിം, ധീതാ മാതാ സുചീമതി.

‘‘ഘരകഞ്ചനബിമ്ബേന, നിമ്മിനിത്വാന മം പിതാ;

അദാ കസ്സപധീരസ്സ, കാമേഹി വജ്ജിതസ്സമം.

‘‘കദാചി സോ കാരുണികോ, ഗന്ത്വാ കമ്മന്തപേക്ഖകോ;

കാകാദികേഹി ഖജ്ജന്തേ, പാണേ ദിസ്വാന സംവിജി.

‘‘ഘരേവാഹം തിലേ ജാതേ, ദിസ്വാനാതപതാപനേ;

കിമീ കാകേഹി ഖജ്ജന്തേ, സംവേഗമലഭിം തദാ.

‘‘തദാ സോ പബ്ബജീ ധീരോ, അഹം തമനുപബ്ബജിം;

പഞ്ച വസ്സാനി നിവസിം, പരിബ്ബാജവതേ അഹം.

‘‘യദാ പബ്ബജിതാ ആസി, ഗോതമീ ജിനപോസികാ;

തദാഹം തമുപഗന്ത്വാ, ബുദ്ധേന അനുസാസിതാ.

‘‘ന ചിരേനേവ കാലേന, അരഹത്തമപാപുണിം;

അഹോ കല്യാണമിത്തത്തം, കസ്സപസ്സ സിരീമതോ.

‘‘സുതോ ബുദ്ധസ്സ ദായാദോ, കസ്സപോ സുസമാഹിതോ;

പുബ്ബേനിവാസം യോ വേദി, സഗ്ഗാപായഞ്ച പസ്സതി.

‘‘അഥോ ജാതിക്ഖയം പത്തോ, അഭിഞ്ഞാവോസിതോ മുനി;

ഏതാഹി തീഹി വിജ്ജാഹി, തേവിജ്ജോ ഹോതി ബ്രാഹ്മണോ.

‘‘തഥേവ ഭദ്ദാകാപിലാനീ, തേവിജ്ജാ മച്ചുഹായിനീ;

ധാരേതി അന്തിമം ദേഹം, ജിത്വാ മാരം സവാഹനം.

‘‘ദിസ്വാ ആദീനവം ലോകേ, ഉഭോ പബ്ബജിതാ മയം;

ത്യമ്ഹ ഖീണാസവാ ദന്താ, സീതിഭൂതാമ്ഹ നിബ്ബുതാ.

‘‘കിലേസാ ഝാപിതാ മയ്ഹം…പേ… കതം ബുദ്ധസ്സ സാസന’’ന്തി. (അപ. ഥേരീ ൨.൩.൨൪൪-൩൧൩);

അരഹത്തം പന പത്വാ പുബ്ബേനിവാസഞാണേ ചിണ്ണവസീ അഹോസി. തത്ഥ സാതിസയം കതാധികാരത്താ അപരഭാഗേ തം സത്ഥാ ജേതവനേ അരിയഗണമജ്ഝേ നിസിന്നോ ഭിക്ഖുനിയോ പടിപാടിയാ ഠാനന്തരേസു ഠപേന്തോ പുബ്ബേനിവാസം അനുസ്സരന്തീനം അഗ്ഗട്ഠാനേ ഠപേസി. സാ ഏകദിവസം മഹാകസ്സപത്ഥേരസ്സ ഗുണാഭിത്ഥവനപുബ്ബകം അത്തനോ കതകിച്ചതാദിവിഭാവനമുഖേന ഉദാനം ഉദാനേന്തീ –

൬൩. ‘‘പുത്തോ ബുദ്ധസ്സ ദായാദോ, കസ്സപോ സുസമാഹിതോ;

പുബ്ബേനിവാസം യോവേദി, സഗ്ഗാപായഞ്ച പസ്സതി.

൬൪. ‘‘അഥോ ജാതിക്ഖയം പത്തോ, അഭിഞ്ഞാവോസിതോ മുനി;

ഏതാഹി തീഹി വിജ്ജാഹി, തേവിജ്ജോ ഹോതി ബ്രാഹ്മണോ.

൬൫. ‘‘തഥേവ ഭദ്ദാകാപിലാനീ, തേവിജ്ജാ മച്ചുഹായിനീ;

ധാരേതി അന്തിമം ദേഹം, ജേത്വാ മാരം സവാഹനം.

൬൬. ‘‘ദിസ്വാ ആദീനവം ലോകേ, ഉഭോ പബ്ബജിതാ മയം;

ത്യമ്ഹ ഖീണാസവാ ദന്താ, സീതിഭൂതാമ്ഹ നിബ്ബുതാ’’തി. –

ഇമാ ഗാഥാ അഭാസി.

തത്ഥ പുത്തോ ബുദ്ധസ്സ ദായാദോതി ബുദ്ധാനുബുദ്ധഭാവതോ സമ്മാസമ്ബുദ്ധസ്സ അനുജാതസുതോ തതോ ഏവ തസ്സ ദായഭൂതസ്സ നവലോകുത്തരധമ്മസ്സ ആദാനേന ദായാദോ കസ്സപോ ലോകിയലോകുത്തരേഹി സമാധീഹി സുട്ഠു സമാഹിതചിത്തതായ സുസമാഹിതോ. പുബ്ബേനിവാസം യോവേദീതി യോ മഹാകസ്സപത്ഥേരോ പുബ്ബേനിവാസം അത്തനോ പരേസഞ്ച നിവുത്ഥക്ഖന്ധസന്താനം പുബ്ബേനിവാസാനുസ്സതിഞാണേന പാകടം കത്വാ അവേദി അഞ്ഞാസി പടിവിജ്ഝി. സഗ്ഗാപായഞ്ച പസ്സതീതി ഛബ്ബീസതിദേവലോകഭേദം സഗ്ഗം ചതുബ്ബിധം അപായഞ്ച ദിബ്ബചക്ഖുനാ ഹത്ഥതലേ ആമലകം വിയ പസ്സതി.

അഥോ ജാതിക്ഖയം പത്തോതി തതോ പരം ജാതിക്ഖയസങ്ഖാതം അരഹത്തം പത്തോ. അഭിഞ്ഞായ അഭിവിസിട്ഠേന ഞാണേന അഭിഞ്ഞേയ്യം ധമ്മം അഭിജാനിത്വാ പരിഞ്ഞേയ്യം പരിജാനിത്വാ, പഹാതബ്ബം പഹായ, സച്ഛികാതബ്ബം സച്ഛികത്വാ വോസിതോ നിട്ഠം പത്തോ കതകിച്ചോ. ആസവക്ഖയപഞ്ഞാസങ്ഖാതം മോനം പത്തത്താ മുനി.