൧൫. സോളസകനിപാതോ

൧. അഞ്ഞാസികോണ്ഡഞ്ഞത്ഥേരഗാഥാവണ്ണനാ

സോളസകനിപാതേ ഏസ ഭിയ്യോതിആദികാ ആയസ്മതോ അഞ്ഞാസികോണ്ഡഞ്ഞത്ഥേരസ്സ ഗാഥാ. കാ ഉപ്പത്തി? അയമ്പി പദുമുത്തരസ്സ ഭഗവതോ കാലേ ഹംസവതീനഗരേ ഗഹപതിമഹാസാലകുലേ നിബ്ബത്തിത്വാ വിഞ്ഞുതം പത്വാ ഏകദിവസം സത്ഥു സന്തികേ ധമ്മം സുണന്തോ സത്ഥാരം ഏകം ഭിക്ഖും അത്തനോ സാസനേ പഠമം പടിവിദ്ധധമ്മരത്തഞ്ഞൂനം അഗ്ഗട്ഠാനേ ഠപേന്തം ദിസ്വാ സയമ്പി തം ഠാനന്തരം പത്ഥേന്തോ സതസഹസ്സഭിക്ഖുപരിവാരസ്സ സത്ഥുനോ സത്താഹം മഹാദാനം പവത്തേത്വാ പണിധാനം അകാസി. സത്ഥാപിസ്സ അനന്തരായതം ദിസ്വാ ഭാവിനിം സമ്പത്തിം ബ്യാകാസി. സോ യാവജീവം പുഞ്ഞാനി കത്വാ സത്ഥരി പരിനിബ്ബുതേ ചേതിയേ പതിട്ഠാപിയമാനേ അന്തോചേതിയേ രതനഘരം കാരേസി, ചേതിയം പരിവാരേത്വാ സഹസ്സരതനഗ്ഘിയാനി ച കാരേസി.

സോ ഏവം പുഞ്ഞാനി കത്വാ, തതോ ചവിത്വാ, ദേവമനുസ്സേസു സംസരന്തോ വിപസ്സിസ്സ ഭഗവതോ കാലേ മഹാകാലോ നാമ കുടുമ്ബികോ ഹുത്വാ അട്ഠകരീസമത്തേ ഖേത്തേ സാലിഗബ്ഭം ഫാലേത്വാ, ഗഹിതസാലിതണ്ഡുലേഹി അസമ്ഭിന്നഖീരപായാസം സമ്പാദേത്വാ, തത്ഥ മധുസപ്പിസക്കരാദയോ പക്ഖിപിത്വാ, ബുദ്ധപ്പമുഖസ്സ സങ്ഘസ്സ അദാസി. സാലിഗബ്ഭം ഫാലേത്വാ ഗഹിതഗഹിതട്ഠാനം പുന പൂരതി, പുഥുകകാലേ പുഥുകഗ്ഗം നാമ അദാസി. ലായനേ ലായനഗ്ഗം, വേണികരണേ വേണഗ്ഗം, കലാപാദികരണേ കലാപഗ്ഗം, ഖലഗ്ഗം, ഭണ്ഡഗ്ഗം, മിനഗ്ഗം, കോട്ഠഗ്ഗന്തി; ഏവം ഏകസസ്സേ നവ വാരേ അഗ്ഗദാനം നാമ അദാസി. തമ്പി സസ്സം അതിരേകതരം സമ്പന്നം അഹോസി.

ഏവം യാവജീവം പുഞ്ഞാനി കത്വാ, തതോ ചുതോ ദേവലോകേ നിബ്ബത്തിത്വാ ദേവേസു ച മനുസ്സേസു ച സംസരന്തോ, അമ്ഹാകം ഭഗവതോ ഉപ്പത്തിതോ പുരേതരമേവ കപിലവത്ഥുനഗരസ്സ അവിദൂരേ ദോണവത്ഥുനാമകേ ബ്രാഹ്മണഗാമേ ബ്രാഹ്മണമഹാസാലകുലേ നിബ്ബത്തി. തസ്സ കോണ്ഡഞ്ഞോതി ഗോത്തതോ ആഗതം നാമം അഹോസി. സോ വയപ്പത്തോ തയോ വേദേ ഉഗ്ഗഹേത്വാ ലക്ഖണമന്തേസു ച പാരം അഗമാസി. തേന സമയേന അമ്ഹാകം ബോധിസത്തോ തുസിതപുരതോ ചവിത്വാ കപിലവത്ഥുപുരേ സുദ്ധോദനമഹാരാജസ്സ ഗേഹേ നിബ്ബത്തി. തസ്സ നാമഗ്ഗഹണദിവസേ അട്ഠുത്തരസതേസു ബ്രാഹ്മണേസു ഉപനീതേസു യേ അട്ഠ ബ്രാഹ്മണാ ലക്ഖണപരിഗ്ഗഹണത്ഥം മഹാതലം ഉപനീതാ. സോ തേസു സബ്ബനവകോ ഹുത്വാ, മഹാപുരിസസ്സ ലക്ഖണനിപ്ഫത്തിം ദിസ്വാ, ‘‘ഏകംസേന അയം ബുദ്ധോ ഭവിസ്സതീ’’തി നിട്ഠം ഗന്ത്വാ മഹാസത്തസ്സ അഭിനിക്ഖമനം ഉദിക്ഖന്തോ വിചരതി.

ബോധിസത്തോപി ഖോ മഹതാ പരിവാരേന വഡ്ഢമാനോ അനുക്കമേന വുദ്ധിപ്പത്തോ ഞാണപരിപാകം ഗന്ത്വാ ഏകൂനതിംസതിമേ വസ്സേ മഹാഭിനിക്ഖമനം നിക്ഖമന്തോ അനോമാനദീതീരേ പബ്ബജിത്വാ അനുക്കമേന ഉരുവേലം ഗന്ത്വാ പധാനം പദഹി. തദാ കോണ്ഡഞ്ഞോ മാണവോ മഹാസത്തസ്സ പബ്ബജിതഭാവം സുത്വാ, ലക്ഖണപരിഗ്ഗാഹകബ്രാഹ്മണാനം പുത്തേഹി വപ്പമാണവാദീഹി സദ്ധിം അത്തപഞ്ചമോ പബ്ബജിത്വാ, അനുക്കമേന ബോധിസത്തസ്സ സന്തികം ഉപസങ്കമിത്വാ, ഛബ്ബസ്സാനി തം ഉപട്ഠഹന്തോ തസ്സ ഓളാരികാഹാരപരിഭോഗേന നിബ്ബിന്നോ അപക്കമിത്വാ ഇസിപതനം അഗമാസി. അഥ ഖോ ബോധിസത്തോ ഓളാരികാഹാരപരിഭോഗേന ലദ്ധകായബലോ വേസാഖപുണ്ണമായം ബോധിരുക്ഖമൂലേ അപരാജിതപല്ലങ്കേ നിസിന്നോ തിണ്ണം മാരാനം മത്ഥകം മദ്ദിത്വാ, അഭിസമ്ബുദ്ധോ ഹുത്വാ, സത്തസത്താഹം ബോധിമണ്ഡേയേവ വീതിനാമേത്വാ, പഞ്ചവഗ്ഗിയാനം ഞാണപരിപാകം ഞത്വാ, ആസാള്ഹീപുണ്ണമായം ഇസിപതനം ഗന്ത്വാ, തേസം ധമ്മചക്കപവത്തനസുത്തന്തം (മഹാവ. ൧൩ ആദയോ; സം. നി. ൫.൧൦൮൧) ദേസേസി. ദേസനാപരിയോസാനേ കോണ്ഡഞ്ഞത്ഥേരോ അട്ഠാരസഹി ബ്രഹ്മകോടീഹി സദ്ധിം സോതാപത്തിഫലേ പതിട്ഠാസി. അഥ പഞ്ചമിയം പക്ഖസ്സ അനത്തലക്ഖണസുത്തന്തദേസനായ (മഹാവ. ൨൦; സം. നി. ൩.൫൯) അരഹത്തം സച്ഛാകാസി. തേന വുത്തം അപദാനേ (അപ. ഥേര ൧.൧.൫൯൬-൬൧൨) –

‘‘പദുമുത്തരസമ്ബുദ്ധം, ലോകജേട്ഠം വിനായകം;

ബുദ്ധഭൂമിമനുപ്പത്തം, പഠമം അദ്ദസം അഹം.

‘‘യാവതാ ബോധിയാ മൂലേ, യക്ഖാ സബ്ബേ സമാഗതാ;

സമ്ബുദ്ധം പരിവാരേത്വാ, വന്ദന്തി പഞ്ജലീകതാ.

‘‘സബ്ബേ ദേവാ തുട്ഠമനാ, ആകാസേ സഞ്ചരന്തി തേ;

ബുദ്ധോ അയം അനുപ്പത്തോ, അന്ധകാരതമോനുദോ.

‘‘തേസം ഹാസപരേതാനം, മഹാനാദോ അവത്തഥ;

കിലേസേ ഝാപയിസ്സാമ, സമ്മാസമ്ബുദ്ധസാസനേ.

‘‘ദേവാനം ഗിരമഞ്ഞായ, വാചാസഭിമുദീരിഹം;

ഹട്ഠോ ഹട്ഠേന ചിത്തേന, ആദിഭിക്ഖമദാസഹം.

‘‘മമ സങ്കപ്പമഞ്ഞായ, സത്ഥാ ലോകേ അനുത്തരോ;

ദേവസങ്ഘേ നിസീദിത്വാ, ഇമാ ഗാഥാ അഭാസഥ.

‘‘സത്താഹം അഭിനിക്ഖമ്മ, ബോധിം അജ്ഝഗമം അഹം;

ഇദം മേ പഠമം ഭത്തം, ബ്രഹ്മചാരിസ്സ യാപനം.

‘‘തുസിതാ ഹി ഇധാഗന്ത്വാ, യോ മേ ഭിക്ഖം ഉപാനയി;

തമഹം കിത്തയിസ്സാമി, സുണോഥ മമ ഭാസതോ.

‘‘തിംസകപ്പസഹസ്സാനി, ദേവരജ്ജം കരിസ്സതി;

സബ്ബേ ദേവേ അഭിഭോത്വാ, തിദിവം ആവസിസ്സതി.

‘‘ദേവലോകാ ചവിത്വാന, മനുസ്സത്തം ഗമിസ്സതി;

സഹസ്സധാ ചക്കവത്തീ, തത്ഥ രജ്ജം കരിസ്സതി.

‘‘കപ്പസതസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

‘‘തിദസാ സോ ചവിത്വാന, മനുസ്സത്തം ഗമിസ്സതി;

അഗാരാ പബ്ബജിത്വാന, ഛബ്ബസ്സാനി വസിസ്സതി.

‘‘തതോ സത്തമകേ വസ്സേ, ബുദ്ധോ സച്ചം കഥേസ്സതി;

കോണ്ഡഞ്ഞോ നാമ നാമേന, പഠമം സച്ഛികാഹിതി.

‘‘നിക്ഖന്തേനാനുപബ്ബജിം, പധാനം സുകതം മയാ;

കിലേസേ ഝാപനത്ഥായ, പബ്ബജിം, അനഗാരിയം.

‘‘അഭിഗന്ത്വാന സബ്ബഞ്ഞൂ, ബുദ്ധോ ലോകേ സദേവകേ;

ഇസിനാമേ മിഗാരഞ്ഞേ, അമതഭേരിമാഹനി.

‘‘സോ ദാനി പത്തോ അമതം, സന്തിപദമനുത്തരം;

സബ്ബാസവേ പരിഞ്ഞായ, വിഹരാമി അനാസവോ.

‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസന’’ന്തി.

അഥ നം സത്ഥാ അപരഭാഗേ ജേതവനമഹാവിഹാരേ ഭിക്ഖുസങ്ഘമജ്ഝേ പഞ്ഞത്തവരബുദ്ധാസനേ നിസിന്നോ പഠമം പടിവിദ്ധധമ്മഭാവം ദീപേന്തോ, ‘‘ഏതദഗ്ഗം, ഭിക്ഖവേ, മമ സാവകാനം ഭിക്ഖൂനം രത്തഞ്ഞൂനം യദിദം അഞ്ഞാസികോണ്ഡഞ്ഞോ’’തി (അ. നി. ൧.൧൮൮) ഏതദഗ്ഗേ ഠപേസി. സോ ദ്വീഹി അഗ്ഗസാവകേഹി അത്തനി കരീയമാനം പരമനിപച്ചകാരം ഗാമന്തസേനാസനേ ആകിണ്ണവിഹാരഞ്ച പരിഹരിതുകാമോ, വിവേകാഭിരതിയാ വിഹരിതുകാമോ ച അത്തനോ സന്തികം ഉപഗതാനം ഗഹട്ഠപബ്ബജിതാനം പടിസന്ഥാരകരണമ്പി പപഞ്ചം മഞ്ഞമാനോ സത്ഥാരം ആപുച്ഛിത്വാ ഹിമവന്തം പവിസിത്വാ ഛദ്ദന്തേഹി നാഗേഹി ഉപട്ഠിയമാനോ ഛദ്ദന്തദഹതീരേ ദ്വാദസ വസ്സാനി വസി. ഏവം തത്ഥ വസന്തം ഥേരം ഏകദിവസം സക്കോ ദേവരാജാ ഉപസങ്കമിത്വാ വന്ദിത്വാ ഠിതോ ഏവമാഹ – ‘‘സാധു മേ, ഭന്തേ, അയ്യോ ധമ്മം ദേസേതൂ’’തി. ഥേരോ തസ്സ ചതുസച്ചഗബ്ഭം തിലക്ഖണാഹതം സുഞ്ഞതപടിസംയുത്തം നാനാനയവിചിത്തം അമതോഗധം ബുദ്ധലീലായ ധമ്മം ദേസേസി. തം സുത്വാ സക്കോ അത്തനോ പസാദം പവേദേന്തോ –

൬൭൩. ‘‘ഏസ ഭിയ്യോ പസീദാമി, സുത്വാ ധമ്മം മഹാരസം;

വിരാഗോ ദേസിതോ ധമ്മോ, അനുപാദായ സബ്ബസോ’’തി. – പഠമം ഗാഥമാഹ;

തത്ഥ ഏസ ഭിയ്യോ പസീദാമി, സുത്വാ ധമ്മം മഹാരസന്തി യദിപി അനേകവാരം സത്ഥു സന്തികേ ധമ്മം സുത്വാ തത്ഥ അഭിപ്പസന്നോ. ഇദാനി പന തുമ്ഹേഹി കഥിതം നാനാനയവിചിത്തതായ അസേചനകതായ ച മഹാരസം ധമ്മം സുത്വാ ഏസോ അഹം തതോ ഭിയ്യോ പസീദാമി. വിരാഗോ ദേസിതോ ധമ്മോ, അനുപാദായ സബ്ബസോതി സബ്ബസംകിലേസതോ സബ്ബസങ്ഖാരതോ ച വിരജ്ജനതോ വിരാഗജനനതോ വിരാഗോ. തതോ ഏവ രൂപാദീസു കഞ്ചി ധമ്മം അനുപാദായ അഗ്ഗഹേത്വാ വിമുത്തിസാധനവസേന പവത്തത്താ സബ്ബസോ അനുപാദായ ദേസിതോ.

ഏവം സക്കോ ദേവരാജാ ഥേരസ്സ ദേസനം ഥോമേത്വാ ഥേരം അഭിവാദേത്വാ സകട്ഠാനമേവ ഗതോ. അഥേകദിവസം ഥേരോ മിച്ഛാവിതക്കേഹി അഭിഭുയ്യമാനാനം ഏകച്ചാനം പുഥുജ്ജനാനം ചിത്താചാരം ദിസ്വാ തപ്പടിപക്ഖഭൂതഞ്ചസ്സ അനുക്കമം അനുസ്സരിത്വാ, അത്തനോ ച സബ്ബസോ തതോ വിനിവത്തിതമാനസതം ആവജ്ജേത്വാ തദത്ഥം ദീപേത്വാ –

൬൭൪. ‘‘ബഹൂനി ലോകേ ചിത്രാനി, അസ്മിം പഥവിമണ്ഡലേ;

മഥേന്തി മഞ്ഞേ സങ്കപ്പം, സുഭം രാഗൂപസംഹിതം.

൬൭൫. ‘‘രജമുഹതഞ്ച വാതേന, യഥാ മേഘോപസമ്മയേ;

ഏവം സമ്മന്തി സങ്കപ്പാ, യദാ പഞ്ഞായ പസ്സതീ’’തി. – ദ്വേ ഗാഥാ അഭാസി;

തത്ഥ ബഹൂനി ലോകേ ചിത്രാനീതി രൂപാദിവസേന തത്ഥാപി നീലപീതാദിവസേന ഇത്ഥിപുരിസാദിവസേന ച അനേകാനി ലോകേ ചിത്തവിചിത്താനി ആരമ്മണജാതാനി. അസ്മിം പഥവിമണ്ഡലേതി പച്ചക്ഖഭൂതം മനുസ്സലോകം സന്ധായ വദതി. മഥേന്തി മഞ്ഞേ സങ്കപ്പന്തി തജ്ജം പുരിസവായാമസഹിതം അരണിസഹിതം വിയ അഗ്ഗിം അയോനിസോമനസികാരാഭിസങ്ഖാതാനി മിച്ഛാസങ്കപ്പാനി മഥേന്തി മഞ്ഞേ മഥേന്താനി വിയ തിട്ഠന്തി. കീദിസം? സുഭം രാഗൂപസംഹിതം, കാമവിതക്കന്തി അത്ഥോ. സോ ഹി സുഭാകാരഗ്ഗഹണേന ‘‘സുഭോ’’തി വോഹരീയതി.

രജമുഹതഞ്ച വാതേനാതി ച-ഇതി നിപാതമത്തം. യഥാ ഗിമ്ഹാനം പച്ഛിമേ മാസേ വാതേന ഊഹതം ഉട്ഠിതം രജം മഹാമേഘോ വസ്സന്തോ ഉപസമ്മയേ, വൂപസമേയ്യ. ഏവം സമ്മന്തി സങ്കപ്പാ, യദാ പഞ്ഞായ പസ്സതീതി യദാ അരിയസാവകോ താനി ലോകചിത്രാനി സമുദയതോ, അസ്സാദതോ, ആദീനവതോ, നിസ്സരണതോ ച യഥാഭൂതം പഞ്ഞായ പസ്സതി, അഥ യഥാ തം രജം ഉഹതം മേഘേന, ഏവം സമ്മന്തി പഞ്ഞായ സബ്ബേപി മിച്ഛാസങ്കപ്പാ. ന ഹി ഉപ്പന്നായ സമ്മാദിട്ഠിയാ മിച്ഛാസങ്കപ്പാ പതിട്ഠം ലഭന്തി. യഥാ പന പഞ്ഞായ പസ്സതി, തം ദസ്സേന്തോ –

൬൭൬. ‘‘സബ്ബേ സങ്ഖാരാ അനിച്ചാതി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൬൭൭. ‘‘സബ്ബേ സങ്ഖാരാ ദുക്ഖാതി…പേ… ഏസ മഗ്ഗോ വിസുദ്ധിയാ.

൬൭൮. ‘‘സബ്ബേ ധമ്മാ അനത്താതി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ’’തി. –

തിസ്സോ ഗാഥാ അഭാസി.

തത്ഥ സബ്ബേ സങ്ഖാരാതി ഛളാരമ്മണസങ്ഗഹാ സബ്ബേ തേഭൂമകാ പഞ്ചക്ഖന്ധാ. അനിച്ചാതി ‘‘ആദിമജ്ഝഅന്തവന്തതോ, അനിച്ചന്തികതോ, താവകാലികതോ, തത്ഥ തത്ഥ ഭിജ്ജനതോ ന നിച്ചാ’’തി യദാ വിപസ്സനാപഞ്ഞായ പസ്സതി. അഥ നിബ്ബിന്ദതി ദുക്ഖേതി അഥ ഇമസ്മിം വട്ടദുക്ഖേ നിബ്ബിന്ദതി, നിബ്ബിന്ദന്തോ ദുക്ഖപരിജാനനാദിവിധിനാ സച്ചാനി പടിവിജ്ഝതി. ഏസ മഗ്ഗോ വിസുദ്ധിയാതി ഏസ യഥാവുത്തോ വിപസ്സനാവിധി ഞാണദസ്സനവിസുദ്ധിയാ, അച്ചന്തവിസുദ്ധിയാ ച മഗ്ഗോ അധിഗമുപായോ.

ദുക്ഖാതി സപ്പടിഭയതോ, ഉദയബ്ബയസമ്പടിപീളനതോ, ദുക്ഖമതോ, സുഖപടിക്ഖേപതോ ച ദുക്ഖാ. സേസം വുത്തനയമേവ.

സബ്ബേ ധമ്മാ അനത്താതി സബ്ബേപി ചതുഭൂമകാ ധമ്മാ അനത്താ. ഇധ പന തേഭൂമകധമ്മാവ ഗഹേതബ്ബാ. തേ ഹി അസാരതോ, അവസവത്തനതോ, സുഞ്ഞതോ, അത്തപടിക്ഖേപതോ ച അനത്താതി വിപസ്സിതബ്ബാ. സേസം പുരിമസദിസമേവ.

ഏവം വിപസ്സനാവിധിം ദസ്സേത്വാ തേന വിധിനാ കതകിച്ചം അത്താനം അഞ്ഞം വിയ കത്വാ ദസ്സേന്തോ –

൬൭൯. ‘‘ബുദ്ധാനുബുദ്ധോ യോ ഥേരോ, കോണ്ഡഞ്ഞോ തിബ്ബനിക്കമോ;

പഹീനജാതിമരണോ, ബ്രഹ്മചരിയസ്സ കേവലീ.

൬൮൦. ‘‘ഓഘപാസോ ദള്ഹഖിലോ, പബ്ബതോ ദുപ്പദാലയോ;

ഛേത്വാ ഖിലഞ്ച പാസഞ്ച, സേലം ഭേത്വാന ദുബ്ഭിദം;

തിണ്ണോ പാരങ്ഗതോ ഝായീ, മുത്തോ സോ മാരബന്ധനാ’’തി. –

ഗാഥാദ്വയമാഹ.

തത്ഥ ബുദ്ധാനുബുദ്ധോതി ബുദ്ധാനം അനുബുദ്ധോ, സമ്മാസമ്ബുദ്ധേഹി ബുജ്ഝിതാനി സച്ചാനി തേസം ദേസനാനുസാരേന ബുജ്ഝതീതി അത്ഥോ. ഥിരേഹി അസേക്ഖേഹി സീലസാരാദീഹി സമന്നാഗതോതി, ഥേരോ. കോണ്ഡഞ്ഞോതി ഗോത്തകിത്തനം. തിബ്ബനിക്കമോതി ദള്ഹവീരിയോ, ഥിരപരക്കമോ. ജാതിമരണാനം പഹീനകാരണത്താ പഹീനജാതിമരണോ. ബ്രഹ്മചരിയസ്സ കേവലീതി മഗ്ഗബ്രഹ്മചരിയസ്സ അനവസേസം, അനവസേസതോ വാ മഗ്ഗബ്രഹ്മചരിയസ്സ പാരിപൂരകോ, അഥ വാ കേവലീ നാമ കിലേസേഹി അസമ്മിസ്സതായ മഗ്ഗഞാണം ഫലഞാണഞ്ച, തം ഇമസ്മിം അത്ഥീതി കേവലീ. യസ്മാ പന തദുഭയമ്പി മഗ്ഗബ്രഹ്മചരിയസ്സ വസേന ഹോതി ന അഞ്ഞഥാ, തസ്മാ ‘‘ബ്രഹ്മചരിയസ്സ കേവലീ’’തി വുത്തം.

ഓഘപാസോതി ‘‘കാമോഘോ, ഭവോഘോ, ദിട്ഠോഘോ, അവിജ്ജോഘോ’’തി (ധ. സ. ൧൧൫൬; വിഭ. ൯൩൮) ഏവം വുത്താ ചത്താരോ ഓഘാ – ‘‘അന്തലിക്ഖചരോ പാസോ, യ്വായം ചരതി മാനസോ’’തി (മഹാവ. ൩൩; സം. നി. ൧.൧൫൧) ഏവം വുത്തോ രാഗപാസോ ച. ദള്ഹഖിലോതി ‘‘സത്ഥരി കങ്ഖതി, ധമ്മേ കങ്ഖതി, സങ്ഘേ കങ്ഖതി, സിക്ഖായ കങ്ഖതി, സബ്രഹ്മചാരീസു കുപിതോ ഹോതി അനത്തമനോ ആഹതചിത്തോ ഖിലജാതോ’’തി (മ. നി. ൧.൧൮൫; അ. നി. ൫.൨൦൫) ഏവം വുത്തോ ദള്ഹോ ഥിരോ പഞ്ചവിധോ ചേതോഖിലോ ച. പചുരജനേഹി പദാലേതും അസക്കുണേയ്യതായ ദുപ്പദാലയോ. തതോ ഏവ പബ്ബതസദിസതായ പബ്ബതോതി ച സങ്ഖം ഗതോ. ‘‘ദുക്ഖേ അഞ്ഞാണ’’ന്തിആദിനാ (വിഭ. ൨൨൬; സം. നി. ൨.൨) വാ നയേന വുത്തോ അഞ്ഞാണപ്പഭേദോ ച. ഇതി ഏതം സബ്ബം ഛേത്വാ ഖിലഞ്ച പാസഞ്ചാതി ഏതേസു ചതുബ്ബിധേസു സംകിലേസധമ്മേസു യോ ഖിലഞ്ച പാസഞ്ച അരിയമഗ്ഗഞാണാസിനാ ഛിന്ദിത്വാ. സേലം ഭേത്വാന ദുബ്ഭിദന്തി യേന കേനചി ഞാണേന ഛിന്ദിതും അസക്കുണേയ്യം അഞ്ഞാണസേലം വജിരൂപമഞാണേന ഛിന്ദിത്വാ, ചത്താരോപി ഓഘേ തരിത്വാ, തേസം പരതീരേ നിബ്ബാനേ ഠിതത്താ തിണ്ണോ പാരങ്ഗതോ. ആരമ്മണൂപനിജ്ഝാനലക്ഖണേന ലക്ഖണൂപനിജ്ഝാനലക്ഖണേനാതി ദുവിധേനപി ഝായീ; മുത്തോ സോ മാരബന്ധനാതി സോ ഏവരൂപോ ഖീണാസവോ സബ്ബസ്മാപി കിലേസമാരബന്ധനാ മുത്തോ വിപ്പമുത്തോ വിസംയുത്തോതി. അത്താനമേവ സന്ധായ ഥേരോ വദതി.

അഥേകദിവസം ഥേരോ, അത്തനോ സദ്ധിവിഹാരികം ഏകം ഭിക്ഖും അകല്യാണമിത്തസംസഗ്ഗേന കുസീതം ഹീനവീരിയം ഉദ്ധതം ഉന്നളം വിഹരന്തം ദിസ്വാ, ഇദ്ധിയാ തത്ഥ ഗന്ത്വാ, തം ‘‘മാ, ആവുസോ, ഏവം കരി, അകല്യാണമിത്തേ പഹായ കല്യാണമിത്തേ സേവന്തോ സമണധമ്മം കരോഹീ’’തി ഓവദി. സോ ഥേരസ്സ വചനം നാദിയി. ഥേരോ തസ്സ അനാദിയനേന ധമ്മസംവേഗപ്പത്തോ പുഗ്ഗലാധിട്ഠാനായ കഥായ മിച്ഛാപടിപത്തിം ഗരഹന്തോ സമ്മാപടിപത്തിം വിവേകവാസഞ്ച പസംസന്തോ –

൬൮൧. ‘‘ഉദ്ധതോ ചപലോ ഭിക്ഖു, മിത്തേ ആഗമ്മ പാപകേ;

സംസീദതി മഹോഘസ്മിം, ഊമിയാ പടികുജ്ജിതോ.

൬൮൨. ‘‘അനുദ്ധതോ അചപലോ, നിപകോ സംവുതിന്ദ്രിയോ;

കല്യാണമിത്തോ മേധാവീ, ദുക്ഖസ്സന്തകരോ സിയാ.

൬൮൩. ‘‘കാലപബ്ബങ്ഗസങ്കാസോ, കിസോ ധമനിസന്ഥതോ;

മത്തഞ്ഞൂ അന്നപാനസ്മിം, അദീനമനസോ നരോ.

൬൮൪. ‘‘ഫുട്ഠോ ഡംസേഹി മകസേഹി, അരഞ്ഞസ്മിം ബ്രഹാവനേ;

നാഗോ സങ്ഗാമസീസേവ, സതോ തത്രാധിവാസയേ.

൬൮൫-൬. ‘‘നാഭിനന്ദാമി മരണം…പേ… സമ്പജാനോ പതിസ്സതോ.

൬൮൭. ‘‘പരിചിണ്ണോ മയാ സത്ഥാ…പേ… ഭവനേത്തി സമൂഹതാ.

൬൮൮. ‘‘യസ്സ ചത്ഥായ പബ്ബജിതോ, അഗാരസ്മാനഗാരിയം;

സോ മേ അത്ഥോ അനുപ്പത്തോ, കിം മേ സദ്ധിവിഹാരിനാ’’തി. –

ഇമാ ഗാഥാ അഭാസി.

തത്ഥ ഉദ്ധതോതി ഉദ്ധച്ചയുത്തോ അസമാഹിതോ വിക്ഖിത്തചിത്തോ. ചപലോതി പത്തചീവരമണ്ഡനാദിനാ ചാപല്യേന സമന്നാഗതോ ലോലപകതികോ. മിത്തേ ആഗമ്മ പാപകേതി അകല്യാണമിത്തേ നിസ്സായ സമണധമ്മം അകരോന്തോ. സംസീദതി മഹോഘസ്മിം, ഊമിയാ പടികുജ്ജിതോതി യഥാ മഹാസമുദ്ദേ പതിതപുരിസോ സമുദ്ദവീചീഹി ഓത്ഥടോ സീസം ഉക്ഖിപിതും അലഭന്തോ തത്ഥേവ സംസീദതി, ഏവം സംസാരമഹോഘസ്മിം പരിബ്ഭമന്തോ കോധുപായാസഊമിയാ പടികുജ്ജിതോ ഓത്ഥടോ വിപസ്സനാവസേന പഞ്ഞാസീസം ഉക്ഖിപിതും അലഭന്തോ തത്ഥേവ സംസീദതി.

നിപകോതി നിപുണോ, അത്തത്ഥപരത്ഥേസു കുസലോ. സംവുതിന്ദ്രിയോതി മനച്ഛട്ഠാനം ഇന്ദ്രിയാനം സംവരണേന പിഹിതിന്ദ്രിയോ. കല്യാണമിത്തോതി കല്യാണേഹി മിത്തേഹി സമന്നാഗതോ. മേധാവീതി ധമ്മോജപഞ്ഞായ സമങ്ഗീഭൂതോ. ദുക്ഖസ്സന്തകരോ സിയാതി സോ താദിസോ സകലസ്സാപി വട്ടദുക്ഖസ്സ അന്തകരോ ഭവേയ്യ.

കാലപബ്ബങ്ഗസങ്കാസോതിആദി വിവേകാഭിരതികിത്തനം. നാഭിനന്ദാമീതിആദി പന കതകിച്ചഭാവദസ്സനം. തം സബ്ബം ഹേട്ഠാ (ഥേരഗാ. അട്ഠ. ൨.൬൦൭) വുത്തത്ഥമേവ. ഓസാനേ പന കിം മേ സദ്ധിവിഹാരിനാതി അത്തനോ സദ്ധിവിഹാരികം സന്ധായ വുത്തം. തസ്മാ ഏദിസേന ദുബ്ബചേന അനാദരേന സദ്ധിവിഹാരിനാ കിം മേ പയോജനം ഏകവിഹാരോയേവ മയ്ഹം രുച്ചതീതി അത്ഥോ.

ഏവം പന വത്വാ ഛദ്ദന്തദഹമേവ ഗതോ. തത്ഥ ദ്വാദസ വസ്സാനി വസിത്വാ ഉപകട്ഠേ പരിനിബ്ബാനേ സത്ഥാരം ഉപസങ്കമിത്വാ പരിനിബ്ബാനം അനുജാനാപേത്വാ തത്ഥേവ ഗന്ത്വാ പരിനിബ്ബായി.

അഞ്ഞാസികോണ്ഡഞ്ഞത്ഥേരഗാഥാവണ്ണനാ നിട്ഠിതാ.

൨. ഉദായിത്ഥേരഗാഥാവണ്ണനാ

മനുസ്സഭൂതന്തിആദികാ ആയസ്മതോ ഉദായിത്ഥേരസ്സ ഗാഥാ. കാ ഉപ്പത്തി? അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയം പുഞ്ഞം ഉപചിനിത്വാ ദേവമനുസ്സേസു സംസരന്തോ ഇമസ്മിം ബുദ്ധുപ്പാദേ കപിലവത്ഥുസ്മിം ബ്രാഹ്മണകുലേ നിബ്ബത്തിത്വാ ഉദായീതി ലദ്ധനാമോ വയപ്പത്തോ സത്ഥു ഞാതിസമാഗമേ ബുദ്ധാനുഭാവം ദിസ്വാ, പടിലദ്ധസദ്ധോ പബ്ബജിത്വാ വിപസ്സനായ കമ്മം കരോന്തോ നചിരസ്സേവ അരഹത്തം പാപുണി. തയോ ഹി ഇമേ ഉദായിത്ഥേരാ അമച്ചപുത്തോ പുബ്ബേ ആഗതോ കാളുദായീ, കോവരിയപുത്തോ ലാലുദായീ, അയം ബ്രാഹ്മണപുത്തോ മഹാഉദായീതി. സ്വായം ഏകദിവസം സത്ഥാരാ സേതവാരണം സബ്ബാലങ്കാരപടിമണ്ഡിതം മഹാജനേന പസംസിയമാനം അട്ഠുപ്പത്തിം കത്വാ നാഗോപമസുത്തന്തേ (അ. നി. ൬.൪൩) ദേസിതേ ദേസനാപരിയോസാനേ അത്തനോ ഞാണബലാനുരൂപം സത്ഥു ഗുണേ അനുസ്സരിത്വാ, ബുദ്ധാരമ്മണായ പീതിയാ സമുസ്സാഹിതമാനസോ ‘‘അയം മഹാജനോ ഇമം തിരച്ഛാനഗതം നാഗം പസംസതി, ന ബുദ്ധമഹാനാഗം. ഹന്ദാഹം ബുദ്ധമഹാഗന്ധഹത്ഥിനോ ഗുണേ പാകടേ കരിസ്സാമീ’’തി സത്ഥാരം ഥോമേന്തോ –

൬൮൯. ‘‘മനുസ്സഭൂതം സമ്ബുദ്ധം, അത്തദന്തം സമാഹിതം;

ഇരിയമാനം ബ്രഹ്മപഥേ, ചിത്തസ്സൂപസമേ രതം.

൬൯൦. ‘‘യം മനുസ്സാ നമസ്സന്തി, സബ്ബധമ്മാന പാരഗും;

ദേവാപി തം നമസ്സന്തി, ഇതി മേ അരഹതോ സുതം.

൬൯൧. ‘‘സബ്ബസംയോജനാതീതം, വനാ നിബ്ബനമാഗതം;

കാമേഹി നേക്ഖമ്മരതം, മുത്തം സേലാവ കഞ്ചനം.

൬൯൨. ‘‘സ വേ അച്ചരുചി നാഗോ, ഹിമവാവഞ്ഞേ സിലുച്ചയേ;

സബ്ബേസം നാഗനാമാനം, സച്ചനാമോ അനുത്തരോ.

൬൯൩. ‘‘നാഗം വോ കിത്തയിസ്സാമി, ന ഹി ആഗും കരോതി സോ;

സോരച്ചം അവിഹിംസാ ച, പാദാ നാഗസ്സ തേ ദുവേ.

൬൯൪. ‘‘സതി ച സമ്പജഞ്ഞഞ്ച, ചരണാ നാഗസ്സ തേപരേ;

സദ്ധാഹത്ഥോ മഹാനാഗോ, ഉപേക്ഖാസേതദന്തവാ.

൬൯൫. ‘‘സതി ഗീവാ സിരോ പഞ്ഞാ, വീമംസാ ധമ്മചിന്തനാ;

ധമ്മകുച്ഛിസമാവാസോ, വിവേകോ തസ്സ വാലധി.

൬൯൬. ‘‘സോ ഝായീ അസ്സാസരതോ, അജ്ഝത്തം സുസമാഹിതോ;

ഗച്ഛം സമാഹിതോ നാഗോ, ഠിതോ നാഗോ സമാഹിതോ.

൬൯൭. ‘‘സയം സമാഹിതോ നാഗോ, നിസിന്നോപി സമാഹിതോ;

സബ്ബത്ഥ സംവുതോ നാഗോ, ഏസാ നാഗസ്സ സമ്പദാ.

൬൯൮. ‘‘ഭുഞ്ജതി അനവജ്ജാനി, സാവജ്ജാനി ന ഭുഞ്ജതി;

ഘാസമച്ഛാദനം ലദ്ധാ, സന്നിധിം പരിവജ്ജയം.

൬൯൯. ‘‘സംയോജനം അണും ഥൂലം, സബ്ബം ഛേത്വാന ബന്ധനം;

യേന യേനേവ ഗച്ഛതി, അനപേക്ഖോവ ഗച്ഛതി.

൭൦൦. ‘‘യഥാപി ഉദകേ ജാതം, പുണ്ഡരീകം പവഡ്ഢതി;

നോപലിപ്പതി തോയേന, സുചിഗന്ധം മനോരമം.

൭൦൧. ‘‘തഥേവ ച ലോകേ ജാതോ, ബുദ്ധോ ലോകേ വിഹരതി;

നോപലിപ്പതി ലോകേന, തോയേന പദുമം യഥാ.

൭൦൨. ‘‘മഹാഗിനി പജ്ജലിതോ, അനാഹാരോപസമ്മതി;

അങ്ഗാരേസു ച സന്തേസു, നിബ്ബുതോതി പവുച്ചതി.

൭൦൩. ‘‘അത്ഥസ്സായം വിഞ്ഞാപനീ, ഉപമാ വിഞ്ഞൂഹി ദേസിതാ;

വിഞ്ഞിസ്സന്തി മഹാനാഗാ, നാഗം നാഗേന ദേസിതം.

൭൦൪. ‘‘വീതരാഗോ വീതദോസോ, വീതമോഹോ അനാസവോ;

സരീരം വിജഹം നാഗോ, പരിനിബ്ബിസ്സത്യനാസവോ’’തി. – ഇമാ ഗാഥാ അഭാസി;

തത്ഥ മനുസ്സഭൂതന്തി മനുസ്സേസു ഭൂതം, നിബ്ബത്തം; മനുസ്സത്തഭാവം വാ പത്തം. സത്ഥാ ഹി ആസവക്ഖയഞാണാധിഗമേന സബ്ബഗതിവിമുത്തോപി ചരിമത്തഭാവേ ഗഹിതപടിസന്ധിവസേന ‘‘മനുസ്സോ’’ത്വേവ വോഹരീയതീതി. ഗുണവസേന പന ദേവാനം അതിദേവോ, ബ്രഹ്മാനം അതിബ്രഹ്മാ. സമ്ബുദ്ധന്തി സയമേവ ബുജ്ഝിതബ്ബബുദ്ധവന്തം. അത്തദന്തന്തി അത്തനായേവ ദന്തം. ഭഗവാ ഹി അത്തനായേവ ഉപ്പാദിതേന അരിയമഗ്ഗേന ചക്ഖുതോപി…പേ… മനതോപി ഉത്തമേന ദമഥേന ദന്തോ. സമാഹിതന്തി അട്ഠവിധേന സമാധിനാ മഗ്ഗഫലസമാധിനാ ച സമാഹിതം. ഇരിയമാനം ബ്രഹ്മപഥേതി ചതുബ്ബിധേപി ബ്രഹ്മവിഹാരപഥേ, ബ്രഹ്മേ വാ സേട്ഠേ ഫലസമാപത്തിപഥേ സമാപജ്ജനവസേന പവത്തമാനം. കിഞ്ചാപി ഭഗവാ ന സബ്ബകാലം യഥാവുത്തേ ബ്രഹ്മപഥേ ഇരിയതി, തത്ഥ ഇരിയസാമത്ഥിയം പന തന്നിന്നതഞ്ച ഉപാദായ ‘‘ഇരിയമാന’’ന്തി വുത്തം. ചിത്തസ്സൂപസമേ രതന്തി ചിത്തസ്സ ഉപസമഹേതുഭൂതേ സബ്ബസങ്ഖാരസമഥേ, നിബ്ബാനേ, അഭിരതം. യം മനുസ്സാ നമസ്സന്തി, സബ്ബധമ്മാന പാരഗുന്തി യം സമ്മാസമ്ബുദ്ധം സബ്ബേസം ഖന്ധായതനാദിധമ്മാനം അഭിഞ്ഞാപാരഗൂ, പരിഞ്ഞാപാരഗൂ, പഹാനപാരഗൂ, ഭാവനാപാരഗൂ, സച്ഛികിരിയപാരഗൂ, സമാപത്തിപാരഗൂതി ഛധാ പാരഗും പരമുക്കംസഗതസമ്പത്തിം ഖത്തിയപണ്ഡിതാദയോ മനുസ്സാ നമസ്സന്തി. ധമ്മാനുധമ്മപടിപത്തിയാ പൂജേന്താ കായേന വാചായ മനസാ ച തന്നിന്നാ തപ്പോണാ തപ്പബ്ഭാരാ ഹോന്തി. ദേവാപി തം നമസ്സന്തീതി ന കേവലം മനുസ്സാ ഏവ, അഥ ഖോ അപരിമാണാസു ലോകധാതൂസു ദേവാപി തം നമസ്സന്തി. ഇതി മേ അരഹതോ സുതന്തി ഏവം മയാ ആരകത്താദീഹി കാരണേഹി അരഹതോ, ഭഗവതോ, ധമ്മസേനാപതിആദീനഞ്ച ‘‘സത്ഥാ ദേവമനുസ്സാന’’ന്തിആദികം വദന്താനം സന്തികേ ഏവം സുതന്തി ദസ്സേതി.

സബ്ബസംയോജനാതീതന്തി സബ്ബാനി ദസപി സംയോജനാനി യഥാരഹം ചതൂഹി മഗ്ഗേഹി സഹ വാസനായ അതിക്കന്തം. വനാ നിബ്ബനമാഗതന്തി കിലേസവനതോ തബ്ബിരഹിതം നിബ്ബനം ഉപഗതം. കാമേഹി നേക്ഖമ്മരതന്തി സബ്ബസോ കാമേഹി നിക്ഖമിത്വാ പബ്ബജ്ജാഝാനവിപസ്സനാദിഭേദേ നേക്ഖമ്മേ അഭിരതം. മുത്തം സേലാവ കഞ്ചനന്തി അസാരതോ നിസ്സടസാരസഭാവത്താ സേലതോ നിസ്സടകഞ്ചനസദിസം ദേവാപി തം നമസ്സന്തീതി യോജനാ.

സ വേ അച്ചരുചി നാഗോതി സോ ഏകംസതോ ആഗും ന കരോതി, പുനബ്ഭവം ന ഗച്ഛതി; നാഗോ വിയ ബലവാതി. ‘‘നാഗോ’’തി ലദ്ധനാമോ സമ്മാസമ്ബുദ്ധോ, അച്ചരുചീതി അത്തനോ കായരുചിയാ ഞാണരുചിയാ ച സദേവകം ലോകം അതിക്കമിത്വാ രുചി, സോഭി. യഥാ കിം? ഹിമവാവഞ്ഞേ സിലുച്ചയേ, യഥാ ഹി ഹിമവാ പബ്ബതരാജാ അത്തനോ ഥിരഗരുമഹാസാരഭാവാദീഹി ഗുണേഹി അഞ്ഞേ പബ്ബതേ അതിരോചതി, ഏവം അതിരോചതീതി അത്ഥോ. സബ്ബേസം നാഗനാമാനന്തി അഹിനാഗഹത്ഥിനാഗപുരിസനാഗാനം, സേഖാസേഖപച്ചേകബുദ്ധനാഗാനം വാ. സച്ചനാമോതി സച്ചേനേവ നാഗനാമോ. തം പന സച്ചനാമതം ‘‘ന ഹി ആഗും കരോതീ’’തിആദിനാ സയമേവ വക്ഖതി.

ഇദാനി ബുദ്ധനാഗം അവയവതോ ച ദസ്സേന്തോ നാമതോ താവ ദസ്സേതും ‘‘ന ഹി ആഗും കരോതി സോ’’തി ആഹ. യസ്മാ ആഗും, പാപം, സബ്ബേന സബ്ബം ന കരോതി, തസ്മാ നാഗോതി അത്ഥോ. സോരച്ചന്തി സീലം. അവിഹിംസാതി കരുണാ. തദുഭയം സബ്ബസ്സപി ഗുണരാസിസ്സ പുബ്ബങ്ഗമന്തി, കത്വാ ബുദ്ധനാഗസ്സ പുരിമപാദഭാവോ തസ്സ യുത്തോതി ആഹ ‘‘പാദാ നാഗസ്സ തേ ദുവേ’’തി.

അപരപാദഭാവേന വദന്തോ ‘‘സതി ച സമ്പജഞ്ഞഞ്ച, ചരണാ നാഗസ്സ തേപരേ’’തി ആഹ. ‘‘ത്യാപരേ’’തി വാ പാഠോ. തേ അപരേത്വേവ പദവിഭാഗോ. അനവജ്ജധമ്മാനം ആദാനേ സദ്ധാ ഹത്ഥോ ഏതസ്സാതി, സദ്ധാഹത്ഥോ. സുപരിസുദ്ധവേദനാ ഞാണപ്പഭേദാ ഉപേക്ഖാ സേതദന്താ തേ ഏതസ്സ അത്ഥീതി, ഉപേക്ഖാസേതദന്തവാ.

ഉത്തമങ്ഗം പഞ്ഞാ, തസ്സാ അധിട്ഠാനം സതീതി ആഹ ‘‘സതി ഗീവാ സിരോ പഞ്ഞാ’’തി. വീമംസാ ധമ്മചിന്തനാതി യഥാ ഖാദിതബ്ബാഖാദിതബ്ബസ്സ സോണ്ഡായ പരാമസനം ഘായനഞ്ച ഹത്ഥിനാഗസ്സ വീമംസാ നാമ ഹോതി, ഏവം ബുദ്ധനാഗസ്സ കുസലാദിധമ്മചിന്തനാ വീമംസാ. സമാ വസന്തി ഏത്ഥാതി, സമാവാസോ, ഭാജനം കുച്ഛി ഏവ സമാവാസോ, അഭിഞ്ഞാസമഥാനം ആധാനഭാവതോ സമഥവിപസ്സനാസങ്ഖാതോ ധമ്മോ കുച്ഛിസമാവാസോ ഏതസ്സാതി ധമ്മകുച്ഛിസമാവാസോ. വിവേകോതി ഉപധിവിവേകോ. തസ്സാതി ബുദ്ധനാഗസ്സ. വാലധി, പരിയോസാനങ്ഗഭാവതോ.

ഝായീതി ആരമ്മണൂപനിജ്ഝാനേന ച ഝായനസീലോ. അസ്സാസരതോതി പരമസ്സാസഭൂതേ നിബ്ബാനേ രതോ. അജ്ഝത്തം സുസമാഹിതോതി വിസയജ്ഝത്തേ ഫലസമാപത്തിയം സുട്ഠു സമാഹിതോ തദിദം സമാധാനം സുട്ഠു സബ്ബകാലികന്തി ദസ്സേതും ‘‘ഗച്ഛം സമാഹിതോ നാഗോ’’തിആദി വുത്തം. ഭഗവാ ഹി സവാസനസ്സ ഉദ്ധച്ചസ്സ പഹീനത്താ വിക്ഖേപാഭാവതോ നിച്ചം സമാഹിതോവ. തസ്മാ യം യം ഇരിയാപഥം കപ്പേതി, തം തം സമാഹിതോവ കപ്പേസീതി.

സബ്ബത്ഥാതി, സബ്ബസ്മിം ഗോചരേ, സബ്ബസ്മിഞ്ച ദ്വാരേ സബ്ബസോ പിഹിതവുത്തി. തേനാഹ – ‘‘സബ്ബം കായകമ്മം ഞാണപുബ്ബങ്ഗമം ഞാണാനുപരിവത്ത’’ന്തിആദി (നേത്തി. ൧൫). ഏസാ നാഗസ്സ സമ്പദാതി ഏസാ ‘‘ന ഹി ആഗും കരോതി സോ’’തിആദിനാ ‘‘സമ്ബുദ്ധ’’ന്തിആദിനാ ഏവ വാ യഥാവുത്താ വക്ഖമാനാ ച ബുദ്ധഗന്ധഹത്ഥിനോ സമ്പത്തി ഗുണപരിപുണ്ണാ.

ഭുഞ്ജതി അനവജ്ജാനീതി സമ്മാജീവസ്സ ഉക്കംസപാരമിപ്പത്തിയാ ഭുഞ്ജതി അഗരഹിതബ്ബാനി, മിച്ഛാജീവസ്സ സബ്ബസോ സവാസനാനഞ്ച പഹീനത്താ സാവജ്ജാനി ഗരഹിതബ്ബാനി ന ഭുഞ്ജതി അനവജ്ജാനി ഭുഞ്ജന്തോ ച സന്നിധിം പരിവജ്ജയം ഭുഞ്ജതീതി യോജനാ.

സംയോജനന്തി വട്ടദുക്ഖേന സദ്ധിം സന്താനം സംയോജനതോ വട്ടേ ഓസീദാപനസമത്ഥം ദസവിധമ്പി സംയോജനം. അണും ഥൂലന്തി ഖുദ്ദകഞ്ചേവ മഹന്തഞ്ച. സബ്ബം ഛേത്വാന ബന്ധനന്തി മഗ്ഗഞാണേന അനവസേസം കിലേസബന്ധനം ഛിന്ദിത്വാ. യേന യേനാതി യേന യേന ദിസാഭാഗേന.

യഥാ ഹി ഉദകേ ജാതം പുണ്ഡരീകം ഉദകേ പവഡ്ഢതി നോപലിപ്പതി തോയേന, അനുപലേപസഭാവത്താ, തഥേവ ലോകേ ജാതോ ബുദ്ധോ ലോകേ വിഹരതി, നോപലിപ്പതി ലോകേന തണ്ഹാദിട്ഠിമാനലേപാഭാവതോതി യോജനാ.

ഗിനീതി അഗ്ഗി. അനാഹാരോതി അനിന്ധനോ.

അത്ഥസ്സായം വിഞ്ഞാപനീതി സത്ഥു ഗുണസങ്ഖാതസ്സ ഉപമേയ്യത്ഥസ്സ വിഞ്ഞാപനീ, പകാസനീ അയം നാഗൂപമാ. വിഞ്ഞൂഹീതി സത്ഥു പടിവിദ്ധചതുസച്ചധമ്മം പരിജാനന്തേഹി അത്താനം സന്ധായ വദതി. വിഞ്ഞിസ്സന്തീതിആദി കാരണവചനം, യസ്മാ നാഗേന മയാ ദേസിതം നാഗം തഥാഗതഗന്ധഹത്ഥിം മഹാനാഗാ ഖീണാസവാ അത്തനോ വിസയേ ഠത്വാ വിജാനിസ്സന്തി, തസ്മാ അഞ്ഞേസം പുഥുജ്ജനാനം ഞാപനത്ഥം അയം ഉപമാ അമ്ഹേഹി ഭാസിതാതി അധിപ്പായോ.

സരീരം വിജഹം നാഗോ, പരിനിബ്ബിസ്സത്യനാസവോതി ബോധിമൂലേ സഉപാദിസേസപരിനിബ്ബാനേന അനാസവോ സമ്മാസമ്ബുദ്ധനാഗോ, ഇദാനി സരീരം അത്തഭാവം വിജഹന്തോ ഖന്ധപരിനിബ്ബാനേന പരിനിബ്ബായിസ്സതീതി.

ഏവം ചുദ്ദസഹി ഉപമാഹി മണ്ഡേത്വാ, സോളസഹി ഗാഥാഹി, ചതുസട്ഠിയാ പാദേഹി സത്ഥു ഗുണേ വണ്ണേന്തോ അനുപാദിസേസായ നിബ്ബാനധാതുയാ ദേസനം നിട്ഠാപേസി.

ഉദായിത്ഥേരഗാഥാവണ്ണനാ നിട്ഠിതാ.

സോളസകനിപാതവണ്ണനാ നിട്ഠിതാ.