൬. പമത്താപമത്തദ്വേസഹായകവത്ഥു

അപ്പമത്തോ പമത്തേസൂതി ഇമം ധമ്മദേസനം സത്ഥാ ജേതവനേ വിഹരന്തോ ദ്വേ സഹായകേ ഭിക്ഖൂ ആരബ്ഭ കഥേസി.

തേ കിര സത്ഥു സന്തികേ കമ്മട്ഠാനം ഗഹേത്വാ ആരഞ്ഞകവിഹാരം പവിസിംസു. തേസു ഏകോ കിര കാലസ്സേവ ദാരൂനി ആഹരിത്വാ അങ്ഗാരകപല്ലം സജ്ജേത്വാ ദഹരസാമണേരേഹി സദ്ധിം സല്ലപന്തോ പഠമയാമം വിസിബ്ബമാനോ നിസീദതി. ഏകോ അപ്പമത്തോ സമണധമ്മം കരോന്തോ ഇതരം ഓവദതി, ‘‘ആവുസോ, മാ ഏവം കരി, പമത്തസ്സ ഹി ചത്താരോ അപായാ സകഘരസദിസാ. ബുദ്ധാ നാമ സാഠേയ്യേന ആരാധേതും ന സക്കാ’’തി സോ തസ്സോവാദം ന സുണാതി. ഇതരോ ‘‘നായം വചനക്ഖമോ’’തി തം അവത്വാ അപ്പമത്തോവ സമണധമ്മമകാസി. അലസത്ഥേരോപി പഠമയാമേ വിസിബ്ബേത്വാ ഇതരസ്സ ചങ്കമിത്വാ ഗബ്ഭം പവിട്ഠകാലേ പവിസിത്വാ, ‘‘മഹാകുസീത, ത്വം നിപജ്ജിത്വാ സയനത്ഥായ അരഞ്ഞം പവിട്ഠോസി, കിം ബുദ്ധാനം സന്തികേ കമ്മട്ഠാനം ഗഹേത്വാ ഉട്ഠായ സമണധമ്മം കാതും വട്ടതീ’’തി വത്വാ അത്തനോ വസനട്ഠാനം പവിസിത്വാ നിപജ്ജിത്വാ സുപതി. ഇതരോപി മജ്ഝിമയാമേ വിസ്സമിത്വാ പച്ഛിമയാമേ പച്ചുട്ഠായ സമണധമ്മം കരോതി. സോ ഏവം അപ്പമത്തോ വിഹരന്തോ ന ചിരസ്സേവ സഹ പടിസമ്ഭിദാഹി അരഹത്തം പാപുണി. ഇതരോ പമാദേനേവ കാലം വീതിനാമേസി. തേ വുട്ഠവസ്സാ സത്ഥു സന്തികം ഗന്ത്വാ സത്ഥാരം വന്ദിത്വാ ഏകമന്തം നിസീദിംസു. സത്ഥാ തേഹി സദ്ധിം പടിസന്ഥാരം കത്വാ, ‘‘കച്ചി, ഭിക്ഖവേ, അപ്പമത്താ സമണധമ്മം കരിത്ഥ, കച്ചി വോ പബ്ബജിതകിച്ചം മത്ഥകം പത്ത’’ന്തി പുച്ഛി. പഠമം പമത്തോ ഭിക്ഖു ആഹ – ‘‘കുതോ, ഭന്തേ, ഏതസ്സ അപ്പമാദോ, ഗതകാലതോ പട്ഠായ നിപജ്ജിത്വാ നിദ്ദായന്തോ കാലം വീതിനാമേസീ’’തി. ‘‘ത്വം പന ഭിക്ഖൂ’’തി. ‘‘അഹം, ഭന്തേ, കാലസ്സേവ ദാരൂനി ആഹരിത്വാ അങ്ഗാരകപല്ലം സജ്ജേത്വാ പഠമയാമേ വിസിബ്ബേന്തോ നിസീദിത്വാ അനിദ്ദായന്തോവ കാലം വീതിനാമേസി’’ന്തി. അഥ നം സത്ഥാ ‘‘ത്വം പമത്തോ കാലം വീതിനാമേത്വാ ‘അപ്പമത്തോമ്ഹീ’തി വദസി, അപ്പമത്തം പന പമത്തം കരോസീ’’തി ആഹ. പുന പമാദേ ദോസേ, അപ്പമാദേ ആനിസംസേ പകാസേതും, ‘‘ത്വം മമ പുത്തസ്സ സന്തികേ ജവച്ഛിന്നോ ദുബ്ബലസ്സോ വിയ, ഏസ പന തവ സന്തികേ സീഘജവസ്സോ വിയാ’’തി വത്വാ ഇമം ഗാഥമാഹ –

൨൯. ‘‘അപ്പമത്തോ പമത്തേസു, സുത്തേസു ബഹുജാഗരോ;

അബലസ്സംവ സീഘസ്സോ, ഹിത്വാ യാതി സുമേധസോ’’തി.

തത്ഥ അപ്പമത്തോതി സതിവേപുല്ലപ്പത്തതായ അപ്പമാദസമ്പന്നേ ഖീണാസവോ. പമത്തേസൂതി സതിവോസഗ്ഗേ ഠിതേസു സത്തേസു. സുത്തേസൂതി സതിജാഗരിയാഭാവേന സബ്ബിരിയാപഥേസു നിദ്ദായന്തേസു. ബഹുജാഗരോതി മഹന്തേ സതിവേപുല്ലേ ജാഗരിയേ ഠിതോ. അബലസ്സംവാതി കുണ്ഠപാദം ഛിന്നജവം ദുബ്ബലസ്സം സീഘജവോ സിന്ധവാജാനീയോ വിയ. സുമേധസോതി ഉത്തമപഞ്ഞോ. തഥാരൂപം പുഗ്ഗലം ആഗമേനപി അധിഗമേനപി ഹിത്വാ യാതി. മന്ദപഞ്ഞസ്മിഞ്ഹി ഏകം സുത്തം ഗഹേതും വായമന്തേയേവ സുമേധസോ ഏകം വഗ്ഗം ഗണ്ഹാതി, ഏവം താവ ആഗമേന ഹിത്വാ യാതി. മന്ദപഞ്ഞേ പന രത്തിട്ഠാനദിവാട്ഠാനാനി കാതും വായമന്തേയേവ കമ്മട്ഠാനം ഉഗ്ഗഹേത്വാ സജ്ഝായന്തേയേവ ച സുമേധസോ പുബ്ബഭാഗേപി പരേന കതം രത്തിട്ഠാനം വാ ദിവാട്ഠാനം വാ പവിസിത്വാ കമ്മട്ഠാനം സമ്മസന്തോ സബ്ബകിലേസേ ഖേപേത്വാ നേവ ലോകുത്തരധമ്മേ ഹത്ഥഗതേ കരോതി, ഏവം അധിഗമേനപി ഹിത്വാ യാതി. വട്ടേ പന നം ഹിത്വാ ഛഡ്ഡേത്വാ വട്ടതോ നിസ്സരന്തോ യാതിയേവാതി.

ഗാഥാപരിയോസാനേ ബഹൂ സോതാപത്തിഫലാദീനി പാപുണിംസൂതി.

പമത്താപമത്തദ്വേസഹായകവത്ഥു ഛട്ഠം.