൪൧. മേത്തേയ്യവഗ്ഗോ

൧. തിസ്സമേത്തേയ്യത്ഥേരഅപദാനവണ്ണനാ

൧. ഏകചത്താലീസമേ വഗ്ഗേ പഠമാപദാനേ പബ്ഭാരകൂടം നിസ്സായാതിആദികം തിസ്സമേത്തേയ്യത്ഥേരസ്സ അപദാനം. തത്ഥ താപസപബ്ബജ്ജം പബ്ബജിത്വാ പദുമുത്തരസ്സ ഭഗവതോ അജിനചമ്മം നിസീദനത്ഥായ ദിന്നമേവ നാനം. സേസം അപദാനപാളിയാ സുവിഞ്ഞേയ്യമേവാതി.

൨. പുണ്ണകത്ഥേരഅപദാനവണ്ണനാ

൨൯. ദുതിയാപദാനേ പബ്ഭാരകൂടം നിസ്സായാതിആദികം ആയസ്മതോ പുണ്ണകത്ഥേരസ്സ അപദാനം. തത്ഥ ഹിമവന്തേ യക്ഖസേനാപതി ഹുത്വാ പരിനിബ്ബുതസ്സ പച്ചേകബുദ്ധസ്സ ആളഹനകരണമേവ നാനത്തം. സേസം പാഠാനുസാരേന സുവിഞ്ഞേയ്യമേവ.

൪൫. തതിയാപദാനേ ഹിമവന്തസ്സാവിദൂരേതിആദികം ആയസ്മതോ മേത്തഗുത്ഥേരസ്സ അപദാനം. തത്ഥ ഹിമവന്തസമീപേ അസോകപബ്ബതേ സോ താപസോ ഹുത്വാ പണ്ണസാലായം വസന്തോ സുമേധസമ്ബുദ്ധം ദിസ്വാ പത്തം ഗഹേത്വാ സപ്പിപൂരണം വിസേസോ. സേസം പുഞ്ഞഫലാനി ച സുവിഞ്ഞേയ്യാനേവ. അപദാനഗാഥാനം അത്ഥോ ച പാകടോയേവ.

൭൨. ചതുത്ഥാപദാനേ ഗങ്ഗാ ഭാഗീരഥീ നാമാതിആദികം ആയസ്മതോ ധോതകത്ഥേരസ്സ അപദാനം. തത്രാപി ബ്രാഹ്മണോ ഹുത്വാ ഭാഗീരഥീഗങ്ഗായ തരമാനേ ഭിക്ഖൂ ദിസ്വാ പസന്നമാനസോ സേതും കാരാപേത്വാ ബുദ്ധപ്പമുഖസ്സ ഭിക്ഖുസങ്ഘസ്സ നിയ്യാദിതഭാവോയേവ വിസേസോ. പുഞ്ഞഫലപരിദീപനഗാഥാനം അത്ഥോ നയാനുസാരേന സുവിഞ്ഞേയ്യോവ.

൧൦൦. പഞ്ചമാപദാനേ ഹിമവന്തസ്സാവിദൂരേതിആദികം ആയസ്മതോ ഉപസിവത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ കുലഗേഹേ നിബ്ബത്തോ വിഞ്ഞുതം പത്തോ ഘരാവാസം പഹായ ഇസിപബ്ബജ്ജം പബ്ബജിത്വാ ഹിമവന്തേ പദുമുത്തരം ഭഗവന്തം ദിസ്വാ തിണസന്ഥരം സന്ഥരിത്വാ തത്ഥ നിസിന്നസ്സ ഭഗവതോ സാലപുപ്ഫപൂജം അകാസീതി അയം വിസേസോ, സേസമുത്താനമേവ.

൧൬൧. ഛട്ഠാപദാനേ മിഗലുദ്ദോ പുരേ ആസിന്തിആദികം ആയസ്മതോ നന്ദകത്ഥേരസ്സ അപദാനം. അയം കിര പദുമുത്തരസ്സ ഭഗവതോ കാലേ കരവികസകുണോ ഹുത്വാ മധുരകൂജിതം കരോന്തോ സത്ഥാരം പദക്ഖിണം അകാസി. അപരഭാഗേ മയൂരോ ഹുത്വാ അഞ്ഞതരസ്സ പച്ചേകബുദ്ധസ്സ വസനഗുഹാദ്വാരേ പസന്നമാനസോ ദിവസസ്സ തിക്ഖത്തും മധുരേന വസ്സിതം വസ്സി. ഏവം തത്ഥ തത്ഥ ഭവേ പുഞ്ഞാനി കത്വാ അമ്ഹാകം ഭഗവതോ കാലേ സാവത്ഥിയം കുലഗേഹേ നിബ്ബത്തോ നന്ദകോതി ലദ്ധനാമോ സത്ഥു സന്തികേ ധമ്മം സുത്വാ പബ്ബജിത്വാ വിപസ്സനം വഡ്ഢേത്വാ അരഹത്തം പാപുണി. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ മിഗലുദ്ദോ പുരേ ആസിന്തിആദിമാഹ. തത്ഥ പച്ചേകബുദ്ധസ്സ മണ്ഡപം കത്വാ പദുമപുപ്ഫേഹി ഛദനമേവ വിസേസോ.

൧൮൩. സത്തമാപദാനേ പബ്ഭാരകൂടം നിസ്സായാതിആദികം ആയസ്മതോ ഹേമകത്ഥേരസ്സ അപദാനം. തത്ഥാപി ഇസിപബ്ബജ്ജം പബ്ബജിത്വാ ഹിമവന്തേ വസന്തോ പിയദസ്സിം ഭഗവന്തം ഉപഗതം ദിസ്വാ രതനമയം പീഠം അത്ഥരിത്വാ അട്ഠാസി. തത്ഥ നിസിന്നസ്സ കുമ്ഭമത്തം ജമ്ബുഫലം ആഹരിത്വാ അദാസി. ഭഗവാ തസ്സ ചിത്തപ്പസാദത്ഥായ തം ഫലം പരിഭുഞ്ജി. ഏത്തകമേവ വിസേസോ.

൨൨൪. അട്ഠമാപദാനേ രാജാസി വിജയോ നാമാതിആദികം ആയസ്മതോ തോദേയ്യത്ഥേരസ്സ അപദാനം. തത്ഥ രാജാസി വിജയോ നാമാതി ദഹരകാലതോ പട്ഠായ സബ്ബസങ്ഗാമേസു ജിനതോ, ചതൂഹി സങ്ഗഹവത്ഥൂഹി ജനം രഞ്ജനതോ അല്ലീയനതോ വിജയോ നാമ രാജാ അഹോസീതി അത്ഥോ. കേതുമതീപുരുത്തമേതി കേതു വുച്ചന്തി ധജപടാകാ. അഥ വാ നഗരസോഭനത്ഥായ നഗരമജ്ഝേ ഉസ്സാപിതരതനതോരണാനി, തേ കേതൂ നിച്ചം ഉസ്സാപിതാ സോഭയമാനാ അസ്സാ അത്ഥീതി കേതുമതീ. പൂരേതി ധനധഞ്ഞേഹി സബ്ബജനാനം മനന്തി പുരം. കേതുമതീ ച സാ പുരഞ്ച സേട്ഠട്ഠേന ഉത്തമഞ്ചേതി കേതുമതീപുരുത്തമം, തസ്മിം കേതുമതീപുരുത്തമേ. സൂരോ വിക്കമസമ്പന്നോതി അഭീതോ വീരിയസമ്പന്നോ വിജയോ നാമ രാജാ അജ്ഝാവസീതി സമ്ബന്ധോ. ഇത്ഥം ഭൂതം പുരഞ്ച സബ്ബവത്ഥുവാഹനഞ്ച ഛഡ്ഡേത്വാ ഹിമവന്തം പവിസിത്വാ ഇസിപബ്ബജ്ജം പബ്ബജിത്വാ വസന്തോ സുമേധഭഗവന്തം ദിസ്വാ സോമനസ്സം ഉപ്പാദേത്വാ ചന്ദനേന പൂജാകരണമേവ വിസേസോ.

൨൭൬. നവമാപദാനേ നഗരേ ഹംസവതിയാതിആദികം ആയസ്മതോ ജതുകണ്ണിത്ഥേരസ്സ അപദാനം. തത്ഥ സേട്ഠിപുത്തോ ഹുത്വാ സുവണ്ണപാസാദേ വസനഭാവോ ച പഞ്ചഹി കാമഗുണേഹി സമങ്ഗീ ഹുത്വാ വസനഭാവോ ച സബ്ബദേസവാസീനം സബ്ബസിപ്പവിഞ്ഞൂനഞ്ച ആഗന്ത്വാ സേവനഭാവോ ച വിസേസോ.

൩൩൦. ദസമാപദാനേ ഹിമവന്തസ്സാവിദൂരേതിആദികം ആയസ്മതോ ഉദേനത്ഥേരസ്സ അപദാനം. തത്ഥ ഹിമവന്തസമീപേ പദുമപബ്ബതം നിസ്സായ താപസപബ്ബജ്ജം പബ്ബജിത്വാ വസന്തേന പദുമുത്തരസ്സ ഭഗവതോ പദുമപുപ്ഫം ഗഹേത്വാ പൂജിതഭാവോവ വിസേസോ. സേസം സബ്ബത്ഥ ഉത്താനമേവാതി.

ഏകചത്താലീസമവഗ്ഗവണ്ണനാ സമത്താ.