൧-൧൦. പദുമകേസരിയത്ഥേരഅപദാനാദിവണ്ണനാ

൧-൨. ഏകതിംസതിമേ വഗ്ഗേ പഠമാപദാനേ ഇസിസങ്ഘേ അഹം പുബ്ബേതി അഹം പുബ്ബേ ബോധിസമ്ഭാരപൂരണകാലേ ഇസിസങ്ഘേ പച്ചേകബുദ്ധഇസിസമൂഹേ തേസം സമീപേ ഹിമവന്തപബ്ബതേ മാതങ്ഗഹത്ഥികുലേ വാരണോ ചണ്ഡഹത്ഥീ അഹോസിന്തി സമ്ബന്ധോ. മനുസ്സാദയോ വാരേതീതി വാരണോ, അഥ വാ വാചായ രവതി കോഞ്ചനാദം നദതീതി വാരണോ. മഹേസീനം പസാദേനാതി പച്ചേകബുദ്ധമഹേസീനം പസാദേന. പച്ചേകജിനസേട്ഠേസു, ധുതരാഗേസു താദിസൂതി ലോകധമ്മേഹി നിച്ചലേസു പച്ചേകബുദ്ധേസു പദ്മകേസരം പദുമരേണും ഓകിരിം അവസിഞ്ചിന്തി സമ്ബന്ധോ.

ദുതിയതതിയാപദാനാനി ഉത്താനാനി.

൧൩-൧൬. ചതുത്ഥാപദാനേ മഹാബോധിമഹോ അഹൂതി വിപസ്സിസ്സ ഭഗവതോ ചതുമഗ്ഗഞാണാധാരഭാവതോ ‘‘ബോധീ’’തി ലദ്ധനാമസ്സ രുക്ഖസ്സ പൂജാ അഹോസീതി അത്ഥോ. രുക്ഖട്ഠസ്സേവ സമ്ബുദ്ധോതി അസ്സ ബോധിപൂജാസമയേ സന്നിപതിതസ്സ മഹാജനസ്സ സമ്ബുദ്ധോ ലോകജേട്ഠോ നരാസഭോ രുക്ഖട്ഠോ ഇവ രുക്ഖേ ഠിതോ വിയ പഞ്ഞായതീതി അത്ഥോ. ഭഗവാ തമ്ഹി സമയേതി തസ്മിം ബോധിപൂജാകരണകാലേ ഭഗവാ ഭിക്ഖുസങ്ഘപുരക്ഖതോ ഭിക്ഖുസങ്ഘേന പരിവുതോ. വാചാസഭിമുദീരയന്തി മുദുസിലിട്ഠമധുരഉത്തമഘോസം ഉദീരയം കഥയന്തോ നിച്ഛാരേന്തോ ചതുസച്ചം പകാസേസി, ദേസേസീതി അത്ഥോ. സംഖിത്തേന ച ദേസേന്തോതി വേനേയ്യപുഗ്ഗലജ്ഝാസയാനുരൂപേന ദേസേന്തോ സംഖിത്തേന ച വിത്ഥാരേന ച ദേസയീതി അത്ഥോ. വിവട്ടച്ഛദോതി രാഗോ ഛദനം, ദോസോ ഛദനം, മോഹോ ഛദനം, സബ്ബകിലേസാ ഛദനാ’’തി ഏവം വുത്താ ഛദനാ വിവടാ ഉഗ്ഘാടിതാ വിദ്ധംസിതാ അനേനാതി വിവട്ടച്ഛദോ, സമ്ബുദ്ധോ. തം മഹാജനം ദേസനാവസേന നിബ്ബാപേസി പരിളാഹം വൂപസമേസീതി അത്ഥോ. തസ്സാഹം ധമ്മം സുത്വാനാതി തസ്സ ഭഗവതോ ദേസേന്തസ്സ ധമ്മം സുത്വാ.

൨൦. പഞ്ചമാപദാനേ ഫലഹത്ഥോ അപേക്ഖവാതി വിപസ്സിം ഭഗവന്തം ദിസ്വാ മധുരാനി ഫലാനി ഗഹേത്വാ അപേക്ഖവാ അതുരിതോ സണികം അസ്സമം ഗഞ്ഛിന്തി അത്ഥോ.

ഛട്ഠസത്തമാപദാനാനി ഉത്താനാനേവ.

൪൦. അട്ഠമാപദാനേ നിട്ഠിതേ നവകമ്മേ ചാതി സീമായ നവകമ്മേ നിട്ഠം ഗതേ സതി. അനുലേപമദാസഹന്തി അനുപച്ഛാ സുധാലേപം അദാസിം, സുധായ ലേപാപേസിന്തി അത്ഥോ.

നവമദസമാപദാനാനി ഉത്താനാനിയേവാതി.

ഏകതിംസമവഗ്ഗവണ്ണനാ സമത്താ.