൧-൧൦. തമാലപുപ്ഫിയത്ഥേരഅപദാനാദിവണ്ണനാ

വീസതിമേ വഗ്ഗേ പഠമത്ഥേരാപദാനം ഉത്താനമേവ.

൬. ദുതിയത്ഥേരാപദാനേ യം ദായവാസികോ ഇസീതി ഇസിപബ്ബജ്ജം പബ്ബജിത്വാ വനേ വസനഭാവേന ദായവാസികോ ഇസീതി സങ്ഖം ഗതോ, അത്തനോ അനുകമ്പായ തം വനം ഉപഗതസ്സ സിദ്ധത്ഥസ്സ സത്ഥുനോ വസനമണ്ഡപച്ഛാദനത്ഥായ യം തിണം, തം ലായതി ഛിന്ദതീതി അത്ഥോ. ദബ്ബഛദനം കത്വാ അനേകേഹി ഖുദ്ദകദണ്ഡകേഹി മണ്ഡപം കത്വാ തം തിണേന ഛാദേത്വാ സിദ്ധത്ഥസ്സ ഭഗവതോ അഹം അദാസിം പൂജേസിന്തി അത്ഥോ.

൮. സത്താഹം ധാരയും തത്ഥാതി തം മണ്ഡപം തത്ഥ ഠിതാ ദേവമനുസ്സാ സത്താഹം നിരോധസമാപത്തിം സമാപജ്ജിത്വാ നിസിന്നസ്സ സത്ഥുനോ ധാരയും ധാരേസുന്തി അത്ഥോ. സേസം ഉത്താനത്ഥമേവാതി.

തതിയത്ഥേരസ്സ അപദാനേ ഖണ്ഡഫുല്ലിയത്ഥേരോതി ഏത്ഥ ഖണ്ഡന്തി കട്ഠാനം ജിണ്ണത്താ ഛിന്നഭിന്നട്ഠാനം, ഫുല്ലന്തി കട്ഠാനം ജിണ്ണട്ഠാനേ കണ്ണകിതമഹിച്ഛത്തകാദിപുപ്ഫനം, ഖണ്ഡഞ്ച ഫുല്ലഞ്ച ഖണ്ഡഫുല്ലാനി, ഖണ്ഡഫുല്ലാനം പടിസങ്ഖരണം പുനപ്പുനം ഥിരകരണന്തി ഖണ്ഡഫുല്ലപടിസങ്ഖരണം. ഇമസ്സ പന ഥേരസ്സ സമ്ഭാരപൂരണകാലേ ഫുസ്സസ്സ ഭഗവതോ ചേതിയേ ഛിന്നഭിന്നട്ഠാനേ സുധാപിണ്ഡം മക്ഖേത്വാ ഥിരകരണം ഖണ്ഡഫുല്ലപടിസങ്ഖരണം നാമ. തസ്മാ സോ ഖണ്ഡഫുല്ലിയോ ഥേരോതി പാകടോ അഹോസി. തതിയം.

൧൭. ചതുത്ഥത്ഥേരസ്സാപദാനേ രഞ്ഞോ ബദ്ധചരോ അഹന്തി രഞ്ഞോ പരിചാരകോ കമ്മകാരകോ അഹോസിന്തി അത്ഥോ.

൧൯. ജലജുത്തമനാമിനോതി ജലേ ഉദകേ ജാതം ജലജം, കിം തം പദുമം, പദുമേന സമാനനാമത്താ പദുമുത്തരസ്സ ഭഗവതോതി അത്ഥോ. ഉത്തമപദുമനാമസ്സ ഭഗവതോതി വാ അത്ഥോ. ചതുത്ഥം.

പഞ്ചമം ഉത്താനത്ഥമേവ.

൨൮. ഛട്ഠേ നഗരേ ദ്വാരവതിയാതി മഹാദ്വാരവാതപാനകവാടഫലകാഹി വതിപാകാരട്ടാലഗോപുരകദ്ദമോദകപരിഖാഹി ച സമ്പന്നം നഗരന്തി ദ്വാരവതീനഗരം, ദ്വാരം വതിഞ്ച പധാനം കത്വാ നഗരസ്സ ഉപലക്ഖിതത്താ ‘‘ദ്വാരവതീ നഗര’’ന്തി വോഹരന്തീതി നഗരേ ദ്വാരവതിയാതി വുത്തം. മാലാവച്ഛോ പുപ്ഫാരാമോ മമ അഹോസീതി അത്ഥോ.

൩൧. തേ കിസലയാതി തേ അസോകപല്ലവാ. ഛട്ഠം.

സത്തമട്ഠമനവമാനി ഉത്താനത്ഥാനേവ. ദസമേപി അപുബ്ബം നത്ഥീതി.

വീസതിമവണ്ണനാ സമത്താ.