൭. നളമാലിയത്ഥേരഅപദാനവണ്ണനാ

പദുമുത്തരബുദ്ധസ്സാതിആദികം ആയസ്മതോ നളമാലിയത്ഥേരസ്സ അപദാനം. ഏസോപി പുരിമജിനവരേസു കതാധികാരോ അനേകാസു ജാതീസു വിവട്ടൂപനിസ്സയാനി കുസലകമ്മാനി ഉപചിനന്തോ പദുമുത്തരസ്സ ഭഗവതോ കാലേ കുലഗേഹേ നിബ്ബത്തോ വുദ്ധിമന്വായ ഘരാവാസം സണ്ഠപേത്വാ കാമേ ആദീനവം ദിസ്വാ ഗേഹം പഹായ താപസപബ്ബജ്ജം പബ്ബജിത്വാ ഹിമവന്തേ വസന്തോ തത്ഥാഗതം ഭഗവന്തം ദിസ്വാ പസന്നോ വന്ദിത്വാ തിണസന്ഥരം സന്ഥരിത്വാ തത്ഥ നിസിന്നസ്സ ഭഗവതോ നളമാലേഹി ബീജനിം കത്വാ ബീജേത്വാ അദാസി. പടിഗ്ഗഹേസി ഭഗവാ തസ്സാനുകമ്പായ, അനുമോദനഞ്ച അകാസി. സോ തേന പുഞ്ഞേന ദേവമനുസ്സേസു സംസരന്തോ ഉപ്പന്നുപ്പന്നഭവേ പരിളാഹസന്താപവിവജ്ജിതോ കായചിത്തചേതസികസുഖപ്പത്തോ അനേകസുഖമനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിമന്വായ പുബ്ബവാസനാബലേന സത്ഥരി പസന്നോ പബ്ബജിത്വാ നചിരസ്സേവ അരഹാ അഹോസി.

൩൬. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരബുദ്ധസ്സാതിആദിമാഹ. തം ഹേട്ഠാ വുത്തമേവ.

൩൭. നളമാലം ഗഹേത്വാനാതി നളതി അസാരോ നിസ്സാരോ ഹുത്വാ വേളുവംസതോപി തനുകോ സല്ലഹുകോ ജാതോതി നളോ, നളസ്സ മാലാ പുപ്ഫം നളമാലം, തേന നളമാലേന ബീജനിം കാരേസിന്തി സമ്ബന്ധോ. ബീജിസ്സതി ജനിസ്സതി വാതോ അനേനാതി ബീജനീ, തം ബീജനിം ബുദ്ധസ്സ ഉപനാമേസിം, പടിഗ്ഗഹേസിന്തി അത്ഥോ. സേസം സബ്ബത്ഥ ഉത്താനമേവാതി.

നളമാലിയത്ഥേരഅപദാനവണ്ണനാ സമത്താ.

സത്തമഭാണവാരവണ്ണനാ സമത്താ.