൧. ഭിക്ഖാദായകത്ഥേരഅപദാനവണ്ണനാ

സുവണ്ണവണ്ണം സമ്ബുദ്ധന്തിആദികം ആയസ്മതോ ഭിക്ഖാദായകത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വുദ്ധിമന്വായ വിഭവസമ്പന്നോ സദ്ധാജാതോ വിഹാരതോ നിക്ഖമിത്വാ പിണ്ഡായ ചരമാനം സിദ്ധത്ഥം ഭഗവന്തം ദിസ്വാ പസന്നമാനസോ ആഹാരമദാസി. ഭഗവാ തം പടിഗ്ഗഹേത്വാ അനുമോദനം വത്വാ പക്കാമി. സോ തേനേവ കുസലേന യാവതായുകം ഠത്വാ ആയുപരിയോസാനേ ദേവലോകേ നിബ്ബത്തോ തത്ഥ ഛ കാമാവചരസമ്പത്തിയോ അനുഭവിത്വാ മനുസ്സേസു ച മനുസ്സസമ്പത്തിമനുഭവിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിമന്വായ സദ്ധാജാതോ പബ്ബജിത്വാ നചിരസ്സേവ അരഹാ അഹോസി.

൧. സോ അപരഭാഗേ അത്തനോ പുബ്ബകമ്മം അനുസ്സരിത്വാ സോമനസ്സജാതോ പുബ്ബചരിതാപദാനം പകാസേന്തോ സുവണ്ണവണ്ണം സമ്ബുദ്ധന്തിആദിമാഹ. തം സബ്ബം ഹേട്ഠാ വുത്തനയമേവ. പവരാ അഭിനിക്ഖന്തന്തി പകാരേന വരിതബ്ബം പത്ഥേതബ്ബന്തി പവരം, രമ്മഭൂതതോ വിവേകഭൂതതോ സകവിഹാരതോ അഭി വിസേസേന നിക്ഖന്തന്തി അത്ഥോ. വാനാ നിബ്ബാനമാഗതന്തി വാനം വുച്ചതി തണ്ഹാ, തതോ നിക്ഖന്തത്താ നിബ്ബാനം, വാനനാമം തണ്ഹം പധാനം കത്വാ സബ്ബകിലേസേ പഹായ നിബ്ബാനം പത്തന്തി അത്ഥോ.

൨. കടച്ഛുഭിക്ഖം ദത്വാനാതി കരതലേന ഗഹേതബ്ബാ ദബ്ബി കടച്ഛു, ഭിക്ഖീയതി ആയാചീയതീതി ഭിക്ഖാ, അഭി വിസേസേന ഖാദിതബ്ബാ ഭക്ഖിതബ്ബാതി വാ ഭിക്ഖാ, കടച്ഛുനാ ഗഹേതബ്ബാ ഭിക്ഖാ കടച്ഛുഭിക്ഖാ, ദബ്ബിയാ ഭത്തം ദത്വാതി അത്ഥോ. സേസം സബ്ബത്ഥ ഉത്താനത്ഥമേവാതി.

ഭിക്ഖാദായകത്ഥേരഅപദാനവണ്ണനാ സമത്താ.