൭. മധുപിണ്ഡികത്ഥേരഅപദാനവണ്ണനാ

വിവനേ കാനനേ ദിസ്വാതിആദികം ആയസ്മതോ മധുപിണ്ഡികത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ നേസാദയോനിയം നിബ്ബത്തോ മഹാഅരഞ്ഞേ പടിവസതി. തദാ വിവേകാഭിരതിയാ സമ്പത്തം സിദ്ധത്ഥം ഭഗവന്തം ദിസ്വാ സമാധിതോ വുട്ഠിതസ്സ തസ്സ സുമധുരം മധുമദാസി. തത്ഥ ച പസന്നമാനസോ വന്ദിത്വാ പക്കാമി. സോ തേനേവ പുഞ്ഞേന സമ്പത്തിം അനുഭവന്തോ ദേവമനുസ്സേസു സംസരിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിപ്പത്തോ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി.

൩൭. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ വിവനേ കാനനേ ദിസ്വാതിആദിമാഹ. തത്ഥ വിവനേതി വിസേസേന വനം പത്ഥടം വിവനം, ഹത്ഥിഅസ്സരഥസദ്ദേഹി ഭേരിസദ്ദേഹി ച വത്ഥുകാമകിലേസകാമേഹി ച വിഗതം ബ്യാപഗതന്തി അത്ഥോ, കാനനസങ്ഖാതേ മഹാഅരഞ്ഞേ വിവനേതി സമ്ബന്ധോ. ഓസധിംവ വിരോചന്തന്തി ഭവവഡ്ഢകിജനാനം ഇച്ഛിതിച്ഛിതം നിപ്ഫാദേതീതി ഓസധം. ഓജാനിബ്ബത്തികാരണം പടിച്ച യായ താരകായ ഉഗ്ഗതായ ഉദ്ധരന്തി ഗണ്ഹന്തീതി സാ ഓസധി. ഓസധിതാരകാ ഇവ വിരോചന്തീതി വത്തബ്ബേ ഗാഥാബന്ധസുഖത്ഥം ‘‘ഓസധിംവ വിരോചന്ത’’ന്തി ച വുത്തം. സേസം സബ്ബത്ഥ ഉത്താനമേവാതി.

മധുപിണ്ഡികത്ഥേരഅപദാനവണ്ണനാ സമത്താ.