൧൦. ബുദ്ധുപട്ഠാകത്ഥേരഅപദാനവണ്ണനാ

വിപസ്സിസ്സ ഭഗവതോതിആദികം ആയസ്മതോ ബുദ്ധുപട്ഠാകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ സങ്ഖധമകകുലേ നിബ്ബത്തോ വുദ്ധിമന്വായ അത്തനോ സിപ്പേ സങ്ഖധമനേ ഛേകോ അഹോസി, നിച്ചകാലം ഭഗവതോ സങ്ഖം ധമേത്വാ സങ്ഖസദ്ദേനേവ പൂജേസി. സോ തേന പുഞ്ഞേന ദേവമനുസ്സേസു സംസരന്തോ സബ്ബത്ഥ പാകടോ മഹാഘോസോ മഹാനാദീ മധുരസ്സരോ അഹോസി, ഇമസ്മിം ബുദ്ധുപ്പാദേ ഏകസ്മിം പാകടകുലേ നിബ്ബത്തോ വുദ്ധിപ്പത്തോ മധുരസ്സരോതി പാകടോ, സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി, അപരഭാഗേ മധുരസ്സരത്ഥേരോതി പാകടോ.

൫൧. സോ ഏകദിവസം അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ വിപസ്സിസ്സ ഭഗവതോതിആദിമാഹ. തം ഹേട്ഠാ വുത്തമേവ. അഹോസിം സങ്ഖധമകോതി സം സുട്ഠു ഖനന്തോ ഗച്ഛതീതി സങ്ഖോ, സമുദ്ദജലപരിയന്തേ ചരമാനോ ഗച്ഛതി വിചരതീതി അത്ഥോ. തം സങ്ഖം ധമതി ഘോസം കരോതീതി സങ്ഖധമകോ, സോഹം സങ്ഖധമകോവ അഹോസിന്തി അത്ഥോ. സേസം സബ്ബത്ഥ ഉത്താനമേവാതി.

ബുദ്ധുപട്ഠാകത്ഥേരഅപദാനവണ്ണനാ സമത്താ.

ദസമവഗ്ഗവണ്ണനാ സമത്താ.