൩. പഞ്ഹാപുച്ഛകവണ്ണനാ

൨൧൫. പഞ്ഹാപുച്ഛകേ ചതുന്നമ്പി സച്ചാനം ഖന്ധവിഭങ്ഗേ വുത്തനയാനുസാരേനേവ കുസലാദിഭാവോ വേദിതബ്ബോ. ആരമ്മണത്തികേസു പന സമുദയസച്ചം കാമാവചരധമ്മേ അസ്സാദേന്തസ്സ പരിത്താരമ്മണം ഹോതി, മഹഗ്ഗതധമ്മേ അസ്സാദേന്തസ്സ മഹഗ്ഗതാരമ്മണം, പഞ്ഞത്തിം അസ്സാദേന്തസ്സ നവത്തബ്ബാരമ്മണം. ദുക്ഖസച്ചം കാമാവചരധമ്മേ ആരബ്ഭ ഉപ്പന്നം പരിത്താരമ്മണം, രൂപാരൂപാവചരധമ്മേ ആരബ്ഭ ഉപ്പത്തികാലേ മഹഗ്ഗതാരമ്മണം, നവ ലോകുത്തരധമ്മേ പച്ചവേക്ഖണകാലേ അപ്പമാണാരമ്മണം, പണ്ണത്തിം പച്ചവേക്ഖണകാലേ നവത്തബ്ബാരമ്മണം. മഗ്ഗസച്ചം സഹജാതഹേതുവസേന സബ്ബദാപി മഗ്ഗഹേതുകം വീരിയം വാ വീമംസം വാ ജേട്ഠകം കത്വാ മഗ്ഗഭാവനാകാലേ മഗ്ഗാധിപതി, ഛന്ദചിത്തേസു അഞ്ഞതരാധിപതികാലേ നവത്തബ്ബം നാമ ഹോതി. ദുക്ഖസച്ചം അരിയാനം മഗ്ഗപച്ചവേക്ഖണകാലേ മഗ്ഗാരമ്മണം, തേസംയേവ മഗ്ഗം ഗരും കത്വാ പച്ചവേക്ഖണകാലേ മഗ്ഗാധിപതി, സേസധമ്മപച്ചവേക്ഖണകാലേ നവത്തബ്ബം ഹോതി.

ദ്വേ സച്ചാനീതി ദുക്ഖസമുദയസച്ചാനി. ഏതാനി ഹി അതീതാദിഭേദേ ധമ്മേ ആരബ്ഭ ഉപ്പത്തികാലേ അതീതാദിആരമ്മണാനി ഹോന്തി. സമുദയസച്ചം അജ്ഝത്താദിഭേദേ ധമ്മേ അസ്സാദേന്തസ്സ അജ്ഝത്താദിആരമ്മണം ഹോതി, ദുക്ഖസച്ചം ആകിഞ്ചഞ്ഞായതനകാലേ നവത്തബ്ബാരമ്മണമ്പീതി വേദിതബ്ബം. ഇതി ഇമസ്മിം പഞ്ഹാപുച്ഛകേ ദ്വേ സച്ചാനി ലോകിയാനി ഹോന്തി, ദ്വേ ലോകുത്തരാനി. യഥാ ച ഇമസ്മിം, ഏവം പുരിമേസുപി ദ്വീസു. സമ്മാസമ്ബുദ്ധേന ഹി തീസുപി സുത്തന്തഭാജനീയാദീസു ലോകിയലോകുത്തരാനേവ സച്ചാനി കഥിതാനി. ഏവമയം സച്ചവിഭങ്ഗോപി തേപരിവട്ടം നീഹരിത്വാവ ഭാജേത്വാ ദസ്സിതോതി.

സമ്മോഹവിനോദനീയാ വിഭങ്ഗട്ഠകഥായ

സച്ചവിഭങ്ഗവണ്ണനാ നിട്ഠിതാ.