൪. തികദുകപട്ഠാനവണ്ണനാ

തികദുകപട്ഠാനേപി കുസലം ഹേതും ധമ്മം പടിച്ച കുസലോ ഹേതു ധമ്മോ ഉപ്പജ്ജതി ഹേതുപച്ചയാതി പഞ്ഹാമത്തുദ്ധാരവസേനേവ ദേസനാ കതാ. തത്ഥ യഥാ ഹേട്ഠാ ഹേതുദുകേന സദ്ധിം കുസലപദം യോജേത്വാ സബ്ബപച്ചയവസേന സബ്ബവാരേസു സങ്ഖേപതോ ദേസനാ കതാ, ഏവമിധ കുസലത്തികേന സദ്ധിം ഹേതുപദം യോജേത്വാ സബ്ബപച്ചയവസേന സബ്ബവാരേസു സങ്ഖേപതോ ദേസനാ കതാ. യഥാ ച ഹേതുപദം, ഏവം നഹേതുപദമ്പി കുസലത്തികേന സദ്ധിം യോജേത്വാ കുസലത്തികഹേതുദുകം നിട്ഠാപിതം. തതോ പരം സുഖായ വേദനായ സമ്പയുത്തം ഹേതും ധമ്മന്തിആദിനാ നയേന വേദനാത്തികഹേതുദുകാദീനി ഏകവീസതി തികദുകാനി ദസ്സിതാനി.

ഏവം ബാവീസതിയാ തികേഹി സദ്ധിം ഹേതുദുകം യോജേത്വാ പുന തേഹിയേവ സദ്ധിം സഹേതുകദുകാദയോ സരണദുകപരിയോസാനാ ലബ്ഭമാനവസേന സബ്ബദുകാ യോജിതാ. ഇധാപി യം യം പദം യോജനം ന ഗച്ഛതി, തം തം പാളിയംയേവ പടിക്ഖിത്തം. ഏവം ദുകസതം ഗഹേത്വാ ദ്വാവീസതിയാ തികേസു പക്ഖിപിത്വാ തികദുകപട്ഠാനം നാമ ദേസിതം. തത്രാപി യേന യേന നയേന പാളി സങ്ഖിത്താ, സോ സോ നയോ വിത്ഥാരതോ വേദിതബ്ബോ.

തികദുകപട്ഠാനവണ്ണനാ.