൪. സമിദ്ധിസുത്തവണ്ണനാ

൧൪. ചതുത്ഥേ സമിദ്ധീതി അത്തഭാവസമിദ്ധതായ ഏവംലദ്ധനാമോ ഥേരസ്സ സദ്ധിവിഹാരികത്ഥേരോ. കിമാരമ്മണാതി കിംപച്ചയാ. സങ്കപ്പവിതക്കാതി സങ്കപ്പഭൂതാ വിതക്കാ. നാമരൂപാരമ്മണാതി നാമരൂപപച്ചയാ. ഇമിനാ ചത്താരോ അരൂപക്ഖന്ധാ ഭൂതുപാദായരൂപഞ്ച വിതക്കാനം പച്ചയോതി ദസ്സേതി. ക്വ നാനത്തം ഗച്ഛന്തീതി കസ്മിം ഠാനേ നാനാസഭാവതം വേമത്തം ഗച്ഛന്തി. ധാതുസൂതി രൂപധാതുആദീസു. അഞ്ഞോയേവ ഹി രൂപവിതക്കോ, അഞ്ഞേ സദ്ദവിതക്കാദയോതി. ഫസ്സസമുദയാതി സമ്പയുത്തഫസ്സപച്ചയാ. വേദനാസമോസരണാതി തിസ്സോ വേദനാ സമോസരണാ. ഏത്തകേന കുസലാകുസലമിസ്സകാ കഥിതാ. സമാധിപ്പമുഖാതിആദയോ പന അപചയപക്ഖികാതി വേദിതബ്ബാ. തത്ഥ പുബ്ബങ്ഗമട്ഠേന ജേട്ഠകട്ഠേന വാ സമാധി പമുഖം ഏതേസന്തി സമാധിപ്പമുഖാ. ജേട്ഠകകാരണട്ഠേന സതി അധിപതേയ്യാ ഏതേസന്തി സതാധിപതേയ്യാ. മഗ്ഗപഞ്ഞാ ഉത്തരാ ഏതേസന്തി പഞ്ഞുത്തരാ. ഫലവിമുത്തിം പത്വാ സാരപ്പത്താ ഹോന്തീതി വിമുത്തിസാരാ. ആരമ്മണവസേന അമതം നിബ്ബാനം ഓഗാഹിത്വാ തത്ഥ പതിട്ഠിതാതി അമതോഗധാ. തേന ച മാ മഞ്ഞീതി തേന വിസ്സജ്ജനേന ‘‘അഹം അഗ്ഗസാവകേന പുച്ഛിതേ പഞ്ഹേ വിസ്സജ്ജേസി’’ന്തി മാ മാനം വാ ദപ്പം വാ അകാസി.