൧൦. സീഹനാദസുത്തവണ്ണനാ

൬൪. ദസമേ ആസഭം ഠാനന്തി സേട്ഠം നിച്ചലട്ഠാനം. സീഹനാദന്തി അഭീതനാദം പമുഖനാദം. ബ്രഹ്മചക്കന്തി സേട്ഠഞാണചക്കം പടിവേധഞാണഞ്ചേവ ദേസനാഞാണഞ്ച. ഠാനഞ്ച ഠാനതോതി കാരണഞ്ച കാരണതോ. യമ്പീതി യേന ഞാണേന. ഇദമ്പി തഥാഗതസ്സാതി ഇദമ്പി ഠാനാട്ഠാനഞാണം തഥാഗതസ്സ തഥാഗതബലം നാമ ഹോതി. ഏവം സബ്ബപദേസു അത്ഥോ വേദിതബ്ബോ. കമ്മസമാദാനാനന്തി സമാദിയിത്വാ കതാനം കുസലാകുസലകമ്മാനം, കമ്മമേവ വാ കമ്മസമാദാനം. ഠാനസോ ഹേതുസോതി പച്ചയതോ ചേവ ഹേതുതോ ച. തത്ഥ ഗതിഉപധികാലപയോഗാ വിപാകസ്സ ഠാനം, കമ്മം ഹേതു. ഝാനവിമോക്ഖസമാധിസമാപത്തീനന്തി ചതുന്നം ഝാനാനം അട്ഠന്നം വിമോക്ഖാനം തിണ്ണം സമാധീനം നവന്നം അനുപുബ്ബസമാപത്തീനഞ്ച. സംകിലേസന്തി ഹാനഭാഗിയം ധമ്മം. വോദാനന്തി വിസേസഭാഗിയം ധമ്മം. വുട്ഠാനന്തി ‘‘വോദാനമ്പി വുട്ഠാനം, തമ്ഹാ തമ്ഹാ സമാധിമ്ഹാ വുട്ഠാനമ്പി വുട്ഠാന’’ന്തി (വിഭ. ൮൨൮) ഏവം വുത്തം പഗുണജ്ഝാനഞ്ചേവ ഭവങ്ഗനഫലസമാപത്തിയോ ച. ഹേട്ഠിമം ഹേട്ഠിമഞ്ഹി പഗുണജ്ഝാനം ഉപരിമസ്സ ഉപരിമസ്സ പദട്ഠാനം ഹോതി, തസ്മാ ‘‘വോദാനമ്പി വുട്ഠാന’’ന്തി വുത്തം. ഭവങ്ഗേന പന സബ്ബജ്ഝാനേഹി വുട്ഠാനം ഹോതി, ഫലസമാപത്തിയാ നിരോധസമാപത്തിതോ വുട്ഠാനം ഹോതി. തം സന്ധായ ‘‘തമ്ഹാ തമ്ഹാ സമാധിമ്ഹാ വുട്ഠാനമ്പി വുട്ഠാന’’ന്തി വുത്തം. അനേകവിഹിതന്തിആദീനി വിസുദ്ധിമഗ്ഗേ (വിസുദ്ധി. ൨.൪൦൨) വണ്ണിതാനി. ആസവക്ഖയഞാണം ഹേട്ഠാ വുത്തത്ഥമേവ. പുരിമസ്സാപി ഞാണത്തയസ്സ വിത്ഥാരകഥം ഇച്ഛന്തേന മജ്ഝിമട്ഠകഥായ മഹാസീഹനാദവണ്ണനാ (മ. നി. അട്ഠ. ൧.൧൪൬ ആദയോ) ഓലോകേതബ്ബാ. സമാഹിതസ്സാതി ഏകഗ്ഗചിത്തസ്സ. സമാധി മഗ്ഗോതി സമാധി ഏതേസം ഞാണാനം അധിഗമായ ഉപായോ. അസമാധീതി അനേകഗ്ഗഭാവോ. കുമ്മഗ്ഗോതി മിച്ഛാമഗ്ഗോ. ഇമസ്മിം സുത്തേ തഥാഗതസ്സ ഞാണബലം കഥിതന്തി.

മഹാവഗ്ഗോ ഛട്ഠോ.