൫. ബ്രഹ്മചരിയസുത്തവണ്ണനാ

൨൫. പഞ്ചമേ ജനകുഹനത്ഥന്തി തീഹി കുഹനവത്ഥൂഹി ജനസ്സ കുഹനത്ഥായ. ന ജനലപനത്ഥന്തി ന ജനസ്സ ഉപലാപനത്ഥം. ന ലാഭസക്കാരസിലോകാനിസംസത്ഥന്തി ന ചീവരാദിഥുതിവചനത്ഥം. ന ഇതിവാദപ്പമോക്ഖാനിസംസത്ഥന്തി ന തേന തേന കാരണേന കതവാദാനിസംസത്ഥം, ന വാദസ്സ പമോക്ഖാനിസംസത്ഥം. ന ഇതി മം ജനോ ജാനാതൂതി ന ‘‘ഏവം കിര ഏസ ഭിക്ഖു, ഏവം കിര ഏസ ഭിക്ഖൂ’’തി ജനസ്സ ജാനനത്ഥായ. സംവരത്ഥന്തി പഞ്ചഹി സംവരേഹി സംവരണത്ഥായ. പഹാനത്ഥന്തി തീഹി പഹാനേഹി പജഹനത്ഥായ. വിരാഗത്ഥന്തി രാഗാദീനം വിരജ്ജനത്ഥായ. നിരോധത്ഥന്തി തേസംയേവ നിരുജ്ഝനത്ഥായ. അനീതിഹന്തി ഇതിഹപരിവജ്ജിതം, അപരപത്തിയന്തി അത്ഥോ. നിബ്ബാനോഗധഗാമിനന്തി നിബ്ബാനസ്സ അന്തോഗാമിനം. മഗ്ഗബ്രഹ്മചരിയഞ്ഹി നിബ്ബാനം ആരമ്മണം കരിത്വാ നിബ്ബാനസ്സ അന്തോയേവ വത്തതി പവത്തതി. പടിപജ്ജന്തീതി ദുവിധമ്പി പടിപജ്ജന്തി. ഇമസ്മിം സുത്തേ വട്ടവിവട്ടം കഥേത്വാ ഗാഥാസു വിവട്ടമേവ കഥിതം.