(൧൫) ൫. സമാപത്തിവഗ്ഗവണ്ണനാ

൧൬൪. പഞ്ചമസ്സ പഠമേ സമാപത്തികുസലതാതി ആഹാരസപ്പായം ഉതുസപ്പായം പരിഗ്ഗണ്ഹിത്വാ സമാപത്തിസമാപജ്ജനേ ഛേകതാ. സമാപത്തിവുട്ഠാനകുസലതാതി യഥാപരിച്ഛേദേന ഗതേ കാലേ വിയത്തോ ഹുത്വാ ഉട്ഠഹന്തോ വുട്ഠാനകുസലോ നാമ ഹോതി, ഏവം കുസലതാ.

൧൬൫. ദുതിയേ അജ്ജവന്തി ഉജുഭാവോ. മദ്ദവന്തി മുദുഭാവോ.

൧൬൬. തതിയേ ഖന്തീതി അധിവാസനഖന്തി. സോരച്ചന്തി സുസീല്യഭാവേന സുരതഭാവോ.

൧൬൭. ചതുത്ഥേ സാഖല്യന്തി സണ്ഹവാചാവസേന സമ്മോദമാനഭാവോ. പടിസന്ഥാരോതി ആമിസേന വാ ധമ്മേന വാ പടിസന്ഥരണം.

൧൬൮. പഞ്ചമേ അവിഹിംസാതി കരുണാപുബ്ബഭാഗോ. സോചേയ്യന്തി സീലവസേന സുചിഭാവോ. ഛട്ഠസത്തമാനി ഉത്താനത്ഥാനേവ.

൧൭൧. അട്ഠമേ പടിസങ്ഖാനബലന്തി പച്ചവേക്ഖണബലം.

൧൭൨. നവമേ മുട്ഠസ്സച്ചേ അകമ്പനേന സതിയേവ സതിബലം. ഉദ്ധച്ചേ അകമ്പനേന സമാധിയേവ സമാധിബലം.

൧൭൩. ദസമേ സമഥോതി ചിത്തേകഗ്ഗതാ. വിപസ്സനാതി സങ്ഖാരപരിഗ്ഗാഹകഞ്ഞാണം.

൧൭൪. ഏകാദസമേ സീലവിപത്തീതി ദുസ്സീല്യം. ദിട്ഠിവിപത്തീതി മിച്ഛാദിട്ഠി.

൧൭൫. ദ്വാദസമേ സീലസമ്പദാതി പരിപുണ്ണസീലതാ. ദിട്ഠിസമ്പദാതി സമ്മാദിട്ഠികഭാവോ. തേന കമ്മസ്സകതസമ്മാദിട്ഠി, ഝാനസമ്മാദിട്ഠി, വിപസ്സനാസമ്മാദിട്ഠി, മഗ്ഗസമ്മാദിട്ഠി, ഫലസമ്മാദിട്ഠീതി സബ്ബാപി പഞ്ചവിധാ സമ്മാദിട്ഠി സങ്ഗഹിതാ ഹോതി.

൧൭൬. തേരസമേ സീലവിസുദ്ധീതി വിസുദ്ധിസമ്പാപകം സീലം. ദിട്ഠിവിസുദ്ധീതി വിസുദ്ധിസമ്പാപികാ ചതുമഗ്ഗസമ്മാദിട്ഠി, പഞ്ചവിധാപി വാ സമ്മാദിട്ഠി.

൧൭൭. ചുദ്ദസമേ ദിട്ഠിവിസുദ്ധീതി വിസുദ്ധിസമ്പാപികാ സമ്മാദിട്ഠിയേവ. യഥാദിട്ഠിസ്സ ച പധാനന്തി ഹേട്ഠിമമഗ്ഗസമ്പയുത്തം വീരിയം. തഞ്ഹി തസ്സാ ദിട്ഠിയാ അനുരൂപത്താ ‘‘യഥാദിട്ഠിസ്സ ച പധാന’’ന്തി വുത്തം.

൧൭൮. പന്നരസമേ അസന്തുട്ഠിതാ ച കുസലേസു ധമ്മേസൂതി അഞ്ഞത്ര അരഹത്തമഗ്ഗാ കുസലേസു ധമ്മേസു അസന്തുട്ഠിഭാവോ.

൧൭൯. സോളസമേ മുട്ഠസ്സച്ചന്തി മുട്ഠസ്സതിഭാവോ. അസമ്പജഞ്ഞന്തി അഞ്ഞാണഭാവോ.

൧൮൦. സത്തരസമേ അപിലാപനലക്ഖണാ സതി. സമ്മാ പജാനനലക്ഖണം സമ്പജഞ്ഞന്തി.

സമാപത്തിവഗ്ഗോ പഞ്ചമോ. തതിയപണ്ണാസകം നിട്ഠിതം.