(൭) ൨. സുഖവഗ്ഗവണ്ണനാ

൬൫. ദുതിയസ്സ പഠമേ ഗിഹിസുഖന്തി ഗിഹീനം സബ്ബകാമനിപ്ഫത്തിമൂലകം സുഖം. പബ്ബജിതസുഖന്തി പബ്ബജിതാനം പബ്ബജ്ജാമൂലകം സുഖം.

൬൬. ദുതിയേ കാമസുഖന്തി കാമേ ആരബ്ഭ ഉപ്പജ്ജനകസുഖം. നേക്ഖമ്മസുഖന്തി നേക്ഖമ്മം വുച്ചതി പബ്ബജ്ജാ, തം ആരബ്ഭ ഉപ്പജ്ജനകസുഖം.

൬൭. തതിയേ ഉപധിസുഖന്തി തേഭൂമകസുഖം. നിരുപധിസുഖന്തി ലോകുത്തരസുഖം.

൬൮. ചതുത്ഥേ സാസവസുഖന്തി ആസവാനം പച്ചയഭൂതം വട്ടസുഖം. അനാസവസുഖന്തി തേസം അപച്ചയഭൂതം വിവട്ടസുഖം.

൬൯. പഞ്ചമേ സാമിസന്തി സംകിലേസം വട്ടഗാമിസുഖം. നിരാമിസന്തി നിക്കിലേസം വിവട്ടഗാമിസുഖം.

൭൦. ഛട്ഠേ അരിയസുഖന്തി അപുഥുജ്ജനസുഖം. അനരിയസുഖന്തി പുഥുജ്ജനസുഖം.

൭൧. സത്തമേ കായികന്തി കായവിഞ്ഞാണസഹജാതം. ചേതസികന്തി മനോദ്വാരികസുഖം. തം ലോകിയലോകുത്തരമിസ്സകം കഥിതം.

൭൨. അട്ഠമേ സപ്പീതികന്തി പഠമദുതിയജ്ഝാനസുഖം. നിപ്പീതികന്തി തതിയചതുത്ഥജ്ഝാനസുഖം. തത്ഥ ലോകിയസപ്പീതികതോ ലോകിയനിപ്പീതികം, ലോകുത്തരസപ്പീതികതോ ച ലോകുത്തരനിപ്പീതികം അഗ്ഗന്തി ഏവം ഭുമ്മന്തരം അഭിന്ദിത്വാ അഗ്ഗഭാവോ വേദിതബ്ബോ.

൭൩. നവമേ സാതസുഖന്തി തീസു ഝാനേസു സുഖം. ഉപേക്ഖാസുഖന്തി ചതുത്ഥജ്ഝാനസുഖം.

൭൪. ദസമേ സമാധിസുഖന്തി അപ്പനം വാ ഉപചാരം വാ പത്തസുഖം. അസമാധിസുഖന്തി തദുഭയം അപ്പത്തസുഖം.

൭൫. ഏകാദസമേ സപ്പീതികാരമ്മണന്തി സപ്പീതികം ഝാനദ്വയം പച്ചവേക്ഖന്തസ്സ ഉപ്പന്നസുഖം. നിപ്പീതികാരമ്മണേപി ഏസേവ നയോ. ദ്വാദസമേപി ഇമിനാവ ഉപായേന അത്ഥോ വേദിതബ്ബോ.

൭൭. തേരസമേ രൂപാരമ്മണന്തി രൂപാവചരചതുത്ഥജ്ഝാനാരമ്മണം, യംകിഞ്ചി രൂപം ആരബ്ഭ ഉപ്പജ്ജനകം വാ. അരൂപാരമ്മണന്തി അരൂപാവചരജ്ഝാനാരമ്മണം, യംകിഞ്ചി അരൂപം ആരബ്ഭ ഉപ്പജ്ജനകം വാതി.

സുഖവഗ്ഗോ ദുതിയോ.