൫. മിഗസാലാസുത്തവണ്ണനാ

൭൫. പഞ്ചമസ്സ ആദിമ്ഹി താവ യം വത്തബ്ബം, തം ഛക്കനിപാതേ വുത്തമേവ. ദുസ്സീലോ ഹോതീതിആദീസു പന ദുസ്സീലോതി നിസ്സീലോ. ചേതോവിമുത്തിന്തി ഫലസമാധിം. പഞ്ഞാവിമുത്തിന്തി ഫലഞാണം. നപ്പജാനാതീതി ഉഗ്ഗഹപരിപുച്ഛാവസേന ന ജാനാതി. ദുസ്സീല്യം അപരിസേസം നിരുജ്ഝതീതി ഏത്ഥ പഞ്ച ദുസ്സീല്യാനി താവ സോതാപത്തിമഗ്ഗേന പഹീയന്തി, ദസ അരഹത്തമഗ്ഗേന. ഫലക്ഖണേ താനി പഹീനാനി നാമ ഹോന്തി. ഫലക്ഖണം സന്ധായ ഇധ ‘‘നിരുജ്ഝതീ’’തി വുത്തം. പുഥുജ്ജനസ്സ സീലം പഞ്ചഹി കാരണേഹി ഭിജ്ജതി പാരാജികാപജ്ജനേന സിക്ഖാപച്ചക്ഖാനേന തിത്ഥിയപക്ഖന്ദനേന അരഹത്തേന മരണേനാതി. തത്ഥ പുരിമാ തയോ ഭാവനാപരിഹാനായ സംവത്തന്തി, ചതുത്ഥോ വഡ്ഢിയാ, പഞ്ചമോ നേവ ഹാനായ ന വഡ്ഢിയാ. കഥം പനേതം അരഹത്തേന സീലം ഭിജ്ജതീതി? പുഥുജ്ജനസ്സ ഹി സീലം അച്ചന്തകുസലമേവ ഹോതി, അരഹത്തമഗ്ഗോ ച കുസലാകുസലകമ്മക്ഖയായ സംവത്തതീതി ഏവം തേന തം ഭിജ്ജതി. സവനേനപി അകതം ഹോതീതി സോതബ്ബയുത്തകം അസ്സുതം ഹോതി. ബാഹുസച്ചേനപി അകതം ഹോതീതി ഏത്ഥ ബാഹുസച്ചന്തി വീരിയം. വീരിയേന കത്തബ്ബയുത്തകം അകതം ഹോതി, തസ്സ അകതത്താ സഗ്ഗതോപി മഗ്ഗതോപി പരിഹായതി. ദിട്ഠിയാപി അപ്പടിവിദ്ധം ഹോതീതി ദിട്ഠിയാ പടിവിജ്ഝിതബ്ബം അപ്പടിവിദ്ധം ഹോതി അപച്ചക്ഖകതം. സാമയികമ്പി വിമുത്തിം ന ലഭതീതി കാലാനുകാലം ധമ്മസ്സവനം നിസ്സായ പീതിപാമോജ്ജം ന ലഭതി. ഹാനായ പരേതീതി ഹാനായ പവത്തതി.

യഥാഭൂതം പജാനാതീതി ‘‘സോതാപത്തിഫലം പത്വാ പഞ്ചവിധം ദുസ്സീല്യം അപരിസേസം നിരുജ്ഝതീ’’തി ഉഗ്ഗഹപരിപുച്ഛാവസേന ജാനാതി. തസ്സ സവനേനപി കതം ഹോതീതി സോതബ്ബയുത്തകം സുതം ഹോതി. ബാഹുസച്ചേനപി കതം ഹോതീതി വീരിയേന കത്തബ്ബയുത്തകം അന്തമസോ ദുബ്ബലവിപസ്സനാമത്തകമ്പി കതം ഹോതി. ദിട്ഠിയാപി സുപ്പടിവിദ്ധം ഹോതീതി അന്തമസോ ലോകിയപഞ്ഞായപി പച്ചയപടിവേധോ കതോ ഹോതി. ഇമസ്സ ഹി പുഗ്ഗലസ്സ പഞ്ഞാ സീലം പരിധോവതി, സോ പഞ്ഞാപരിധോതേന വിസേസം പാപുണാതി.

പമാണികാതി പുഗ്ഗലേസു പമാണഗ്ഗാഹകാ. പമിണന്തീതി പമേതും തുലേതും അരഹന്തി. ഏകോ ഹീനോതി ഏകോ ഗുണേഹി ഹീനോ. പണീതോതി ഏകോ ഗുണേഹി പണീതോ ഉത്തമോ. തം ഹീതി തം പമാണകരണം. അഭിക്കന്തതരോതി സുന്ദരതരോ. പണീതതരോതി ഉത്തമതരോ. ധമ്മസോതോ നിബ്ബഹതീതി സൂരം ഹുത്വാ പവത്തമാനം വിപസ്സനാഞാണം നിബ്ബഹതി, അരിയഭൂമിം പാപേതി. തദന്തരം കോ ജാനേയ്യാതി തം ഏവം കാരണം കോ ജാനേയ്യ. സീലവാ ഹോതീതി ലോകിയസീലേന സീലവാ ഹോതി. യത്ഥസ്സ തം സീലന്തി അരഹത്തവിമുത്തിം പത്വാ സീലം അപരിസേസമ്പി നിരുജ്ഝതി നാമ, തത്ഥ യുത്തി വുത്തായേവ. ഇതോ പരേസു ദ്വീസു അങ്ഗേസു അനാഗാമിഫലം വിമുത്തി നാമ, പഞ്ചമേ അരഹത്തമേവ. സേസമേത്ഥ വുത്തനയാനുസാരേനേവ വേദിതബ്ബം. ഛട്ഠം ഉത്താനത്ഥമേവ.