൧. പച്ചുപ്പന്നവാരോ

(ക) അനുലോമം

൪൩൫. (ക) യോ ചക്ഖുന്ദ്രിയം പരിജാനാതി സോ സോതിന്ദ്രിയം പരിജാനാതീതി? ആമന്താ.

(ഖ) യോ വാ പന സോതിന്ദ്രിയം പരിജാനാതി സോ ചക്ഖുന്ദ്രിയം പരിജാനാതീതി? ആമന്താ.

(ക) യോ ചക്ഖുന്ദ്രിയം പരിജാനാതി സോ ദോമനസ്സിന്ദ്രിയം പജഹതീതി? നോ.

(ഖ) യോ വാ പന ദോമനസ്സിന്ദ്രിയം പജഹതി സോ ചക്ഖുന്ദ്രിയം പരിജാനാതീതി? നോ.

(ക) യോ ചക്ഖുന്ദ്രിയം പരിജാനാതി സോ അനഞ്ഞാതഞ്ഞസ്സാമീതിന്ദ്രിയം ഭാവേതീതി? നോ.

(ഖ) യോ വാ പന അനഞ്ഞാതഞ്ഞസ്സാമീതിന്ദ്രിയം ഭാവേതി സോ ചക്ഖുന്ദ്രിയം പരിജാനാതീതി? നോ.

(ക) യോ ചക്ഖുന്ദ്രിയം പരിജാനാതി സോ അഞ്ഞിന്ദ്രിയം ഭാവേതീതി? ആമന്താ.

(ഖ) യോ വാ പന അഞ്ഞിന്ദ്രിയം ഭാവേതി സോ ചക്ഖുന്ദ്രിയം പരിജാനാതീതി?

ദ്വേ പുഗ്ഗലാ അഞ്ഞിന്ദ്രിയം ഭാവേന്തി, നോ ച ചക്ഖുന്ദ്രിയം പരിജാനന്തി. അഗ്ഗമഗ്ഗസമങ്ഗീ അഞ്ഞിന്ദ്രിയഞ്ച ഭാവേതി ചക്ഖുന്ദ്രിയഞ്ച പരിജാനാതി.

(ക) യോ ചക്ഖുന്ദ്രിയം പരിജാനാതി സോ അഞ്ഞാതാവിന്ദ്രിയം സച്ഛികരോതീതി? നോ.

(ഖ) യോ വാ പന അഞ്ഞാതാവിന്ദ്രിയം സച്ഛികരോതി സോ ചക്ഖുന്ദ്രിയം പരിജാനാതീതി? നോ. (ചക്ഖുന്ദ്രിയമൂലകം)

൪൩൬. (ക) യോ ദോമനസ്സിന്ദ്രിയം പജഹതി സോ അനഞ്ഞാതഞ്ഞസ്സാമീതിന്ദ്രിയം ഭാവേതീതി? നോ.

(ഖ) യോ വാ പന അനഞ്ഞാതഞ്ഞസ്സാമീതിന്ദ്രിയം ഭാവേതി സോ ദോമനസ്സിന്ദ്രിയം പജഹതീതി? നോ.

(ക) യോ ദോമനസ്സിന്ദ്രിയം പജഹതി സോ അഞ്ഞിന്ദ്രിയം ഭാവേതീതി? ആമന്താ.

(ഖ) യോ വാ പന അഞ്ഞിന്ദ്രിയം ഭാവേതി സോ ദോമനസ്സിന്ദ്രിയം പജഹതീതി?

ദ്വേ പുഗ്ഗലാ അഞ്ഞിന്ദ്രിയം ഭാവേന്തി, നോ ച ദോമനസ്സിന്ദ്രിയം പജഹന്തി. അനാഗാമിമഗ്ഗസമങ്ഗീ അഞ്ഞിന്ദ്രിയഞ്ച ഭാവേതി ദോമനസ്സിന്ദ്രിയഞ്ച പജഹതി.

(ക) യോ ദോമനസ്സിന്ദ്രിയം പജഹതി സോ അഞ്ഞാതാവിന്ദ്രിയം സച്ഛികരോതീതി? നോ.

(ഖ) യോ വാ പന അഞ്ഞാതാവിന്ദ്രിയം സച്ഛികരോതി സോ ദോമനസ്സിന്ദ്രിയം പജഹതീതി? നോ. (ദോമനസ്സിന്ദ്രിയമൂലകം)

൪൩൭. (ക) യോ അനഞ്ഞാതഞ്ഞസ്സാമീതിന്ദ്രിയം ഭാവേതി സോ അഞ്ഞിന്ദ്രിയം ഭാവേതീതി? നോ.

(ഖ) യോ വാ പന അഞ്ഞിന്ദ്രിയം ഭാവേതി സോ അനഞ്ഞാതഞ്ഞസ്സാമീതിന്ദ്രിയം ഭാവേതീതി? നോ.

(ക) യോ അനഞ്ഞാതഞ്ഞസ്സാമീതിന്ദ്രിയം ഭാവേതി സോ അഞ്ഞാതാവിന്ദ്രിയം സച്ഛികരോതീതി? നോ.

(ഖ) യോ വാ പന അഞ്ഞാതാവിന്ദ്രിയം സച്ഛികരോതി സോ അനഞ്ഞാതഞ്ഞസ്സാമീതിന്ദ്രിയം ഭാവേതീതി? നോ. (അനഞ്ഞാതഞ്ഞസ്സാമീതിന്ദ്രിയമൂലകം)

൪൩൮. (ക) യോ അഞ്ഞിന്ദ്രിയം ഭാവേതി സോ അഞ്ഞാതാവിന്ദ്രിയം സച്ഛികരോതീതി? നോ.

(ഖ) യോ വാ പന അഞ്ഞാതാവിന്ദ്രിയം സച്ഛികരോതി സോ അഞ്ഞിന്ദ്രിയം ഭാവേതീതി? നോ. (അഞ്ഞിന്ദ്രിയമൂലകം)

(ഖ) പച്ചനീകം

൪൩൯. (ക) യോ ചക്ഖുന്ദ്രിയം ന പരിജാനാതി സോ ദോമനസ്സിന്ദ്രിയം നപ്പജഹതീതി?

അനാഗാമിമഗ്ഗസമങ്ഗീ ചക്ഖുന്ദ്രിയം ന പരിജാനാതി, നോ ച ദോമനസ്സിന്ദ്രിയം നപ്പജഹതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ചക്ഖുന്ദ്രിയഞ്ച ന പരിജാനന്തി ദോമനസ്സിന്ദ്രിയഞ്ച നപ്പജഹന്തി.

(ഖ) യോ വാ പന ദോമനസ്സിന്ദ്രിയം നപ്പജഹതി സോ ചക്ഖുന്ദ്രിയം ന പരിജാനാതീതി?

അഗ്ഗമഗ്ഗസമങ്ഗീ ദോമനസ്സിന്ദ്രിയം നപ്പജഹതി, നോ ച ചക്ഖുന്ദ്രിയം ന പരിജാനാതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ദോമനസ്സിന്ദ്രിയഞ്ച നപ്പജഹന്തി ചക്ഖുന്ദ്രിയഞ്ച ന പരിജാനന്തി.

(ക) യോ ചക്ഖുന്ദ്രിയം ന പരിജാനാതി സോ അനഞ്ഞാതഞ്ഞസ്സാമീതിന്ദ്രിയം ന ഭാവേതീതി?

അട്ഠമകോ ചക്ഖുന്ദ്രിയം ന പരിജാനാതി, നോ ച അനഞ്ഞാതഞ്ഞസ്സാമീതിന്ദ്രിയം ന ഭാവേതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ചക്ഖുന്ദ്രിയഞ്ച ന പരിജാനന്തി അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി.

(ഖ) യോ വാ പന അനഞ്ഞാതഞ്ഞസ്സാമീതിന്ദ്രിയം ന ഭാവേതി സോ ചക്ഖുന്ദ്രിയം ന പരിജാനാതീതി?

അഗ്ഗമഗ്ഗസമങ്ഗീ അനഞ്ഞാതഞ്ഞസ്സാമീതിന്ദ്രിയം ന ഭാവേതി, നോ ച ചക്ഖുന്ദ്രിയം ന പരിജാനാതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി ചക്ഖുന്ദ്രിയഞ്ച ന പരിജാനന്തി.

(ക) യോ ചക്ഖുന്ദ്രിയം ന പരിജാനാതി സോ അഞ്ഞിന്ദ്രിയം ന ഭാവേതീതി?

ദ്വേ പുഗ്ഗലാ ചക്ഖുന്ദ്രിയം ന പരിജാനന്തി, നോ ച അഞ്ഞിന്ദ്രിയം ന ഭാവേന്തി. തയോ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ചക്ഖുന്ദ്രിയഞ്ച ന പരിജാനന്തി അഞ്ഞിന്ദ്രിയഞ്ച ന ഭാവേന്തി.

(ഖ) യോ വാ പന അഞ്ഞിന്ദ്രിയം ന ഭാവേതി സോ ചക്ഖുന്ദ്രിയം ന പരിജാനാതീതി? ആമന്താ.

(ക) യോ ചക്ഖുന്ദ്രിയം ന പരിജാനാതി സോ അഞ്ഞാതാവിന്ദ്രിയം ന സച്ഛികരോതീതി?

യോ അഗ്ഗഫലം സച്ഛികരോതി സോ ചക്ഖുന്ദ്രിയം ന പരിജാനാതി, നോ ച അഞ്ഞാതാവിന്ദ്രിയം ന സച്ഛികരോതി. അഗ്ഗമഗ്ഗസമങ്ഗിഞ്ച അരഹന്തഞ്ച ഠപേത്വാ അവസേസാ പുഗ്ഗലാ ചക്ഖുന്ദ്രിയഞ്ച ന പരിജാനന്തി അഞ്ഞാതാവിന്ദ്രിയഞ്ച ന സച്ഛികരോന്തി.

(ഖ) യോ വാ പന അഞ്ഞാതാവിന്ദ്രിയം ന സച്ഛികരോതി സോ ചക്ഖുന്ദ്രിയം ന പരിജാനാതീതി?

അഗ്ഗമഗ്ഗസമങ്ഗീ അഞ്ഞാതാവിന്ദ്രിയം ന സച്ഛികരോതി, നോ ച ചക്ഖുന്ദ്രിയം ന പരിജാനാതി. അഗ്ഗമഗ്ഗസമങ്ഗിഞ്ച അരഹന്തഞ്ച ഠപേത്വാ അവസേസാ പുഗ്ഗലാ അഞ്ഞാതാവിന്ദ്രിയഞ്ച ന സച്ഛികരോന്തി ചക്ഖുന്ദ്രിയഞ്ച ന പരിജാനന്തി. (ചക്ഖുന്ദ്രിയമൂലകം)

൪൪൦. (ക) യോ ദോമനസ്സിന്ദ്രിയം നപ്പജഹതി സോ അനഞ്ഞാതഞ്ഞസ്സാമീതിന്ദ്രിയം ന ഭാവേതീതി?

അട്ഠമകോ ദോമനസ്സിന്ദ്രിയം നപ്പജഹതി, നോ ച അനഞ്ഞാതഞ്ഞസ്സാമീതിന്ദ്രിയം ന ഭാവേതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ദോമനസ്സിന്ദ്രിയഞ്ച നപ്പജഹന്തി അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി.

(ഖ) യോ വാ പന അനഞ്ഞാതഞ്ഞസ്സാമീതിന്ദ്രിയം ന ഭാവേതി സോ ദോമനസ്സിന്ദ്രിയം നപ്പജഹതീതി?

അനാഗാമിമഗ്ഗസമങ്ഗീ അനഞ്ഞാതഞ്ഞസ്സാമീതിന്ദ്രിയം ന ഭാവേതി, നോ ച ദോമനസ്സിന്ദ്രിയം നപ്പജഹതി. ദ്വേ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി ദോമനസ്സിന്ദ്രിയഞ്ച നപ്പജഹന്തി.

(ക) യോ ദോമനസ്സിന്ദ്രിയം നപ്പജഹതി സോ അഞ്ഞിന്ദ്രിയം ന ഭാവേതീതി?

ദ്വേ പുഗ്ഗലാ ദോമനസ്സിന്ദ്രിയം നപ്പജഹന്തി, നോ ച അഞ്ഞിന്ദ്രിയം ന ഭാവേന്തി. തയോ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ ദോമനസ്സിന്ദ്രിയഞ്ച നപ്പജഹന്തി അഞ്ഞിന്ദ്രിയഞ്ച ന ഭാവേന്തി.

(ഖ) യോ വാ പന അഞ്ഞിന്ദ്രിയം ന ഭാവേതി സോ ദോമനസ്സിന്ദ്രിയം നപ്പജഹതീതി? ആമന്താ.

(ക) യോ ദോമനസ്സിന്ദ്രിയം നപ്പജഹതി സോ അഞ്ഞാതാവിന്ദ്രിയം ന സച്ഛികരോതീതി?

യോ അഗ്ഗഫലം സച്ഛികരോതി സോ ദോമനസ്സിന്ദ്രിയം നപ്പജഹതി, നോ ച അഞ്ഞാതാവിന്ദ്രിയം ന സച്ഛികരോതി. അനാഗാമിമഗ്ഗസമങ്ഗിഞ്ച അരഹന്തഞ്ച ഠപേത്വാ അവസേസാ പുഗ്ഗലാ ദോമനസ്സിന്ദ്രിയഞ്ച നപ്പജഹന്തി അഞ്ഞാതാവിന്ദ്രിയഞ്ച ന സച്ഛികരോന്തി.

(ഖ) യോ വാ പന അഞ്ഞാതാവിന്ദ്രിയം ന സച്ഛികരോതി സോ ദോമനസ്സിന്ദ്രിയം നപ്പജഹതീതി?

അനാഗാമിമഗ്ഗസമങ്ഗീ അഞ്ഞാതാവിന്ദ്രിയം ന സച്ഛികരോതി, നോ ച ദോമനസ്സിന്ദ്രിയം നപ്പജഹതി. അനാഗാമിമഗ്ഗസമങ്ഗിഞ്ച അരഹന്തഞ്ച ഠപേത്വാ അവസേസാ പുഗ്ഗലാ അഞ്ഞാതാവിന്ദ്രിയഞ്ച ന സച്ഛികരോന്തി ദോമനസ്സിന്ദ്രിയഞ്ച നപ്പജഹന്തി. (ദോമനസ്സിന്ദ്രിയമൂലകം)

൪൪൧. (ക) യോ അനഞ്ഞാതഞ്ഞസ്സാമീതിന്ദ്രിയം ന ഭാവേതി സോ അഞ്ഞിന്ദ്രിയം ന ഭാവേതീതി?

തയോ മഗ്ഗസമങ്ഗിനോ [തയോ പുഗ്ഗലാ (പീ.)] അനഞ്ഞാതഞ്ഞസ്സാമീതിന്ദ്രിയം ന ഭാവേന്തി, നോ ച അഞ്ഞിന്ദ്രിയം ന ഭാവേന്തി. ചത്താരോ മഗ്ഗസമങ്ഗിനോ [അട്ഠമകഞ്ച തയോ മഗ്ഗസമങ്ഗിനോ ച (പീ.)] ഠപേത്വാ അവസേസാ പുഗ്ഗലാ അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി അഞ്ഞിന്ദ്രിയഞ്ച ന ഭാവേന്തി.

(ഖ) യോ വാ പന അഞ്ഞിന്ദ്രിയം ന ഭാവേതി സോ അനഞ്ഞാതഞ്ഞസ്സാമീതിന്ദ്രിയം ന ഭാവേതീതി?

അട്ഠമകോ അഞ്ഞിന്ദ്രിയം ന ഭാവേതി, നോ ച അനഞ്ഞാതഞ്ഞസ്സാമീതിന്ദ്രിയം ന ഭാവേതി. ചത്താരോ മഗ്ഗസമങ്ഗിനോ ഠപേത്വാ അവസേസാ പുഗ്ഗലാ അഞ്ഞിന്ദ്രിയഞ്ച ന ഭാവേന്തി അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി.

(ക) യോ അനഞ്ഞാതഞ്ഞസ്സാമീതിന്ദ്രിയം ന ഭാവേതി സോ അഞ്ഞാതാവിന്ദ്രിയം ന സച്ഛികരോതീതി?

യോ അഗ്ഗഫലം സച്ഛികരോതി സോ അനഞ്ഞാതഞ്ഞസ്സാമീതിന്ദ്രിയം ന ഭാവേതി, നോ ച അഞ്ഞാതാവിന്ദ്രിയം ന സച്ഛികരോതി. അട്ഠമകഞ്ച അരഹന്തഞ്ച ഠപേത്വാ അവസേസാ പുഗ്ഗലാ അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി അഞ്ഞാതാവിന്ദ്രിയഞ്ച ന സച്ഛികരോന്തി.

(ഖ) യോ വാ പന അഞ്ഞാതാവിന്ദ്രിയം ന സച്ഛികരോതി സോ അനഞ്ഞാതഞ്ഞസ്സാമീതിന്ദ്രിയം ന ഭാവേതീതി?

അട്ഠമകോ അഞ്ഞാതാവിന്ദ്രിയം ന സച്ഛികരോതി, നോ ച അനഞ്ഞാതഞ്ഞസ്സാമീതിന്ദ്രിയം ന ഭാവേതി. അട്ഠമകഞ്ച അരഹന്തഞ്ച ഠപേത്വാ അവസേസാ പുഗ്ഗലാ അഞ്ഞാതാവിന്ദ്രിയഞ്ച ന സച്ഛികരോന്തി അനഞ്ഞാതഞ്ഞസ്സാമീതിന്ദ്രിയഞ്ച ന ഭാവേന്തി. (അനഞ്ഞാതഞ്ഞസ്സാമീതിന്ദ്രിയമൂലകം)

൪൪൨. (ക) യോ അഞ്ഞിന്ദ്രിയം ന ഭാവേതി സോ അഞ്ഞാതാവിന്ദ്രിയം ന സച്ഛികരോതീതി?

യോ അഗ്ഗഫലം സച്ഛികരോതി സോ അഞ്ഞിന്ദ്രിയം ന ഭാവേതി, നോ ച അഞ്ഞാതാവിന്ദ്രിയം ന സച്ഛികരോതി. തയോ മഗ്ഗസമങ്ഗിനോ ച അരഹന്തഞ്ച ഠപേത്വാ അവസേസാ പുഗ്ഗലാ അഞ്ഞിന്ദ്രിയഞ്ച ന ഭാവേന്തി അഞ്ഞാതാവിന്ദ്രിയഞ്ച ന സച്ഛികരോന്തി.

(ഖ) യോ വാ പന അഞ്ഞാതാവിന്ദ്രിയം ന സച്ഛികരോതി സോ അഞ്ഞിന്ദ്രിയം ന ഭാവേതീതി?

തയോ മഗ്ഗസമങ്ഗിനോ അഞ്ഞാതാവിന്ദ്രിയം ന സച്ഛികരോന്തി, നോ ച അഞ്ഞിന്ദ്രിയം ന ഭാവേന്തി. തയോ മഗ്ഗസമങ്ഗിനോ ച അരഹന്തഞ്ച ഠപേത്വാ അവസേസാ പുഗ്ഗലാ അഞ്ഞാതാവിന്ദ്രിയഞ്ച ന സച്ഛികരോന്തി അഞ്ഞിന്ദ്രിയഞ്ച ന ഭാവേന്തി. (അഞ്ഞിന്ദ്രിയമൂലകം)