(൧൩) നിരുദ്ധനിരുജ്ഝമാനവാരോ

൮൨. (ക) നിരുദ്ധം നിരുജ്ഝമാനന്തി? നോ.

(ഖ) നിരുജ്ഝമാനം നിരുദ്ധന്തി? നോ.

(ക) ന നിരുദ്ധം ന നിരുജ്ഝമാനന്തി?

ഭങ്ഗക്ഖണേ ന നിരുദ്ധം, നോ ച ന നിരുജ്ഝമാനം. ഉപ്പാദക്ഖണേ അനാഗതഞ്ച ചിത്തം ന ചേവ നിരുദ്ധം ന ച നിരുജ്ഝമാനം.

(ഖ) ന നിരുജ്ഝമാനം ന നിരുദ്ധന്തി?

അതീതം ചിത്തം ന നിരുജ്ഝമാനം, നോ ച ന നിരുദ്ധം. ഉപ്പാദക്ഖണേ അനാഗതഞ്ച ചിത്തം ന ചേവ നിരുജ്ഝമാനം ന ച നിരുദ്ധം.

(൧൪) അതിക്കന്തകാലവാരോ

൮൩. (ക) യസ്സ ചിത്തം ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം, നിരുജ്ഝമാനം ഖണം ഖണം വീതിക്കന്തം അതിക്കന്തകാലം തസ്സ ചിത്തന്തി?

ഭങ്ഗക്ഖണേ ചിത്തം ഉപ്പാദക്ഖണം വീതക്കന്തം ഭങ്ഗക്ഖണം അവീതിക്കന്തം, അതീതം ചിത്തം ഉപ്പാദക്ഖണഞ്ച വീതിക്കന്തം ഭങ്ഗക്ഖണഞ്ച വീതിക്കന്തം.

(ഖ) യസ്സ വാ പന ചിത്തം നിരുജ്ഝമാനം ഖണം ഖണം വീതിക്കന്തം അതിക്കന്തകാലം, ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം തസ്സ ചിത്തന്തി?

അതീതം ചിത്തം.

(ക) യസ്സ ചിത്തം ന ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം, ന നിരുജ്ഝമാനം ഖണം ഖണം വീതിക്കന്തം അതിക്കന്തകാലം തസ്സ ചിത്തന്തി?

ഉപ്പാദക്ഖണേ അനാഗതം ചിത്തം.

(ഖ) യസ്സ വാ പന ചിത്തം ന നിരുജ്ഝമാനം ഖണം ഖണം വീതിക്കന്തം അതിക്കന്തകാലം, ന ഉപ്പജ്ജമാനം ഖണം ഖണം വീതിക്കന്തം അതിക്കന്തകാലം തസ്സ ചിത്തന്തി?

ഭങ്ഗക്ഖണേ ചിത്തം ഭങ്ഗക്ഖണം അവീതിക്കന്തം നോ ച ഉപ്പാദക്ഖണം അവീതിക്കന്തം, ഉപ്പാദക്ഖണേ അനാഗതഞ്ച ചിത്തം ഭങ്ഗക്ഖണഞ്ച അവീതിക്കന്തം ഉപ്പാദക്ഖണഞ്ച അവീതിക്കന്തം.