(൧൦) ഉപ്പന്നുപ്പാദവാരോ

൭൮. (ക) യസ്സ ചിത്തം ഉപ്പന്നം തസ്സ ചിത്തം ഉപ്പജ്ജിത്ഥാതി? ആമന്താ.

(ഖ) യസ്സ വാ പന ചിത്തം ഉപ്പജ്ജിത്ഥ തസ്സ ചിത്തം ഉപ്പന്നന്തി?

നിരോധസമാപന്നാനം അസഞ്ഞസത്താനം തേസം ചിത്തം ഉപ്പജ്ജിത്ഥ, നോ ച തേസം ചിത്തം ഉപ്പന്നം. ചിത്തസമങ്ഗീനം തേസം ചിത്തം ഉപ്പജ്ജിത്ഥ ചേവ ഉപ്പന്നഞ്ച.

(ക) യസ്സ ചിത്തം ന ഉപ്പന്നം തസ്സ ചിത്തം ന ഉപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന ചിത്തം ന ഉപ്പജ്ജിത്ഥ തസ്സ ചിത്തം ന ഉപ്പന്നന്തി? നത്ഥി.

൭൯. (ക) യസ്സ ചിത്തം ഉപ്പന്നം തസ്സ ചിത്തം ഉപ്പജ്ജിസ്സതീതി?

പച്ഛിമചിത്തസമങ്ഗീനം തേസം ചിത്തം ഉപ്പന്നം, നോ ച തേസം ചിത്തം ഉപ്പജ്ജിസ്സതി. ഇതരേസം ചിത്തസമങ്ഗീനം തേസം ചിത്തം ഉപ്പന്നഞ്ചേവ ഉപ്പജ്ജിസ്സതി ച.

(ഖ) യസ്സ വാ പന ചിത്തം ഉപ്പജ്ജിസ്സതി തസ്സ ചിത്തം ഉപ്പന്നന്തി?

നിരോധസമാപന്നാനം അസഞ്ഞസത്താനം തേസം ചിത്തം ഉപ്പജ്ജിസ്സതി, നോ ച തേസം ചിത്തം ഉപ്പന്നം. ചിത്തസമങ്ഗീനം തേസം ചിത്തം ഉപ്പജ്ജിസ്സതി ചേവ ഉപ്പന്നഞ്ച.

(ക) യസ്സ ചിത്തം ന ഉപ്പന്നം തസ്സ ചിത്തം ന ഉപ്പജ്ജിസ്സതീതി? ഉപ്പജ്ജിസ്സതി.

(ഖ) യസ്സ വാ പന ചിത്തം ന ഉപ്പജ്ജിസ്സതി തസ്സ ചിത്തം ന ഉപ്പന്നന്തി? ഉപ്പന്നം.