(൪) ഉപ്പാദവാരോ

൧൦൮. (ക) യസ്സ യം ചിത്തം ഉപ്പജ്ജതി തസ്സ തം ചിത്തം ഉപ്പജ്ജിത്ഥാതി? നോ.

(ഖ) യസ്സ വാ പന യം ചിത്തം ഉപ്പജ്ജിത്ഥ തസ്സ തം ചിത്തം ഉപ്പജ്ജതീതി? നോ.

(ക) യസ്സ യം ചിത്തം ന ഉപ്പജ്ജതി തസ്സ തം ചിത്തം ന ഉപ്പജ്ജിത്ഥാതി?

അതീതം ചിത്തം ന ഉപ്പജ്ജതി, നോ ച തസ്സ തം ചിത്തം ന ഉപ്പജ്ജിത്ഥ. ഭങ്ഗക്ഖണേ അനാഗതഞ്ച ചിത്തം ന ചേവ ഉപ്പജ്ജതി ന ച ഉപ്പജ്ജിത്ഥ.

(ഖ) യസ്സ വാ പന യം ചിത്തം ന ഉപ്പജ്ജിത്ഥ തസ്സ തം ചിത്തം ന ഉപ്പജ്ജതീതി?

ഉപ്പാദക്ഖണേ ചിത്തം ന ഉപ്പജ്ജിത്ഥ, നോ ച തസ്സ തം ചിത്തം ന ഉപ്പജ്ജതി. ഭങ്ഗക്ഖണേ അനാഗതഞ്ച ചിത്തം ന ചേവ ഉപ്പജ്ജിത്ഥ ന ച ഉപ്പജ്ജതി.

൧൦൯. (ക) യസ്സ യം ചിത്തം ഉപ്പജ്ജതി തസ്സ തം ചിത്തം ഉപ്പജ്ജിസ്സതീതി? നോ.

(ഖ) യസ്സ വാ പന യം ചിത്തം ഉപ്പജ്ജിസ്സതി തസ്സ തം ചിത്തം ഉപ്പജ്ജതീതി? നോ.

(ക) യസ്സ യം ചിത്തം ന ഉപ്പജ്ജതി തസ്സ തം ചിത്തം ന ഉപ്പജ്ജിസ്സതീതി?

അനാഗതം ചിത്തം ന ഉപ്പജ്ജതി, നോ ച തസ്സ തം ചിത്തം ന ഉപ്പജ്ജിസ്സതി. ഭങ്ഗക്ഖണേ അതീതഞ്ച ചിത്തം ന ചേവ ഉപ്പജ്ജതി ന ച ഉപ്പജ്ജിസ്സതി.

(ഖ) യസ്സ വാ പന യം ചിത്തം ന ഉപ്പജ്ജിസ്സതി തസ്സ തം ചിത്തം ന ഉപ്പജ്ജതീതി?

ഉപ്പാദക്ഖണേ ചിത്തം ന ഉപ്പജ്ജിസ്സതി, നോ ച തസ്സ തം ചിത്തം ന ഉപ്പജ്ജതി. ഭങ്ഗക്ഖണേ അതീതഞ്ച ചിത്തം ന ചേവ ഉപ്പജ്ജിസ്സതി ന ച ഉപ്പജ്ജതി.

൧൧൦. (ക) യസ്സ യം ചിത്തം ഉപ്പജ്ജിത്ഥ തസ്സ തം ചിത്തം ഉപ്പജ്ജിസ്സതീതി? നോ.

(ഖ) യസ്സ വാ പന യം ചിത്തം ഉപ്പജ്ജിസ്സതി തസ്സ തം ചിത്തം ഉപ്പജ്ജിത്ഥാതി? നോ.

(ക) യസ്സ യം ചിത്തം ന ഉപ്പജ്ജിത്ഥ തസ്സ തം ചിത്തം ന ഉപ്പജ്ജിസ്സതീതി?

അനാഗതം ചിത്തം ന ഉപ്പജ്ജിത്ഥ, നോ ച തസ്സ തം ചിത്തം ന ഉപ്പജ്ജിസ്സതി. പച്ചുപ്പന്നം ചിത്തം ന ചേവ ഉപ്പജ്ജിത്ഥ ന ച ഉപ്പജ്ജിസ്സതി.

(ഖ) യസ്സ വാ പന യം ചിത്തം ന ഉപ്പജ്ജിസ്സതി തസ്സ തം ചിത്തം ന ഉപ്പജ്ജിത്ഥാതി?

അതീതം ചിത്തം ന ഉപ്പജ്ജിസ്സതി, നോ ച തസ്സ തം ചിത്തം ന ഉപ്പജ്ജിത്ഥ. പച്ചുപ്പന്നം ചിത്തം ന ചേവ ഉപ്പജ്ജിസ്സതി ന ച ഉപ്പജ്ജിത്ഥ.