(൫) പച്ചുപ്പന്നാനാഗതവാരോ

(ക) അനുലോമപുഗ്ഗലോ

൧൦൮. (ക) യസ്സ കായസങ്ഖാരോ നിരുജ്ഝതി തസ്സ വചീസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന വചീസങ്ഖാരോ നിരുജ്ഝിസ്സതി തസ്സ കായസങ്ഖാരോ നിരുജ്ഝതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം വചീസങ്ഖാരോ നിരുജ്ഝിസ്സതി, നോ ച തേസം കായസങ്ഖാരോ നിരുജ്ഝതി. അസ്സാസപസ്സാസാനം ഭങ്ഗക്ഖണേ തേസം വചീസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝതി.

(ക) യസ്സ കായസങ്ഖാരോ നിരുജ്ഝതി തസ്സ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന ചിത്തസങ്ഖാരോ നിരുജ്ഝിസ്സതി തസ്സ കായസങ്ഖാരോ നിരുജ്ഝതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ നിരുജ്ഝിസ്സതി, നോ ച തേസം കായസങ്ഖാരോ നിരുജ്ഝതി. അസ്സാസപസ്സാസാനം ഭങ്ഗക്ഖണേ തേസം ചിത്തസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝതി.

൧൦൯. (ക) യസ്സ വചീസങ്ഖാരോ നിരുജ്ഝതി തസ്സ ചിത്തസങ്ഖാരോ നിരുജ്ഝിസ്സതീതി?

സവിതക്കസവിചാരപച്ഛിമചിത്തസ്സ ഭങ്ഗക്ഖണേ തേസം വചീസങ്ഖാരോ നിരുജ്ഝതി, നോ ച തേസം ചിത്തസങ്ഖാരോ നിരുജ്ഝിസ്സതി. ഇതരേസം വിതക്കവിചാരാനം ഭങ്ഗക്ഖണേ തേസം വചീസങ്ഖാരോ ച നിരുജ്ഝതി ചിത്തസങ്ഖാരോ ച നിരുജ്ഝിസ്സതി.

(ഖ) യസ്സ വാ പന ചിത്തസങ്ഖാരോ നിരുജ്ഝിസ്സതി തസ്സ വചീസങ്ഖാരോ നിരുജ്ഝതീതി?

സബ്ബേസം ചിത്തസ്സ ഉപ്പാദക്ഖണേ വിനാ വിതക്കവിചാരേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ നിരുജ്ഝിസ്സതി, നോ ച തേസം വചീസങ്ഖാരോ നിരുജ്ഝതി. വിതക്കവിചാരാനം ഭങ്ഗക്ഖണേ തേസം ചിത്തസങ്ഖാരോ ച നിരുജ്ഝിസ്സതി വചീസങ്ഖാരോ ച നിരുജ്ഝതി.

(ഖ) അനുലോമഓകാസോ

൧൧൦. യത്ഥ കായസങ്ഖാരോ നിരുജ്ഝതി…പേ….

(ഗ) അനുലോമപുഗ്ഗലോകാസാ

൧൧൧. (ക) യസ്സ യത്ഥ കായസങ്ഖാരോ നിരുജ്ഝതി തസ്സ തത്ഥ വചീസങ്ഖാരോ നിരുജ്ഝിസ്സതീതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസം തത്ഥ കായസങ്ഖാരോ നിരുജ്ഝതി, നോ ച തേസം തത്ഥ വചീസങ്ഖാരോ നിരുജ്ഝിസ്സതി. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസം തത്ഥ കായസങ്ഖാരോ ച നിരുജ്ഝതി വചീസങ്ഖാരോ ച നിരുജ്ഝിസ്സതി.

(ഖ) യസ്സ വാ പന യത്ഥ വചീസങ്ഖാരോ നിരുജ്ഝിസ്സതി തസ്സ തത്ഥ കായസങ്ഖാരോ നിരുജ്ഝതീതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ രൂപാവചരാനം അരൂപാവചരാനം തേസം തത്ഥ വചീസങ്ഖാരോ നിരുജ്ഝിസ്സതി, നോ ച തേസം തത്ഥ കായസങ്ഖാരോ നിരുജ്ഝതി. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസം തത്ഥ വചീസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝതി.

(ക) യസ്സ യത്ഥ കായസങ്ഖാരോ നിരുജ്ഝതി തസ്സ തത്ഥ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ നിരുജ്ഝിസ്സതി തസ്സ തത്ഥ കായസങ്ഖാരോ നിരുജ്ഝതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ തേസം തത്ഥ ചിത്തസങ്ഖാരോ നിരുജ്ഝിസ്സതി, നോ ച തേസം തത്ഥ കായസങ്ഖാരോ നിരുജ്ഝതി. അസ്സാസപസ്സാസാനം ഭങ്ഗക്ഖണേ തേസം തത്ഥ ചിത്തസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝതി.

൧൧൨. (ക) യസ്സ യത്ഥ വചീസങ്ഖാരോ നിരുജ്ഝതി തസ്സ തത്ഥ ചിത്തസങ്ഖാരോ നിരുജ്ഝിസ്സതീതി?

സവിതക്കസവിചാരപച്ഛിമചിത്തസ്സ ഭങ്ഗക്ഖണേ തേസം തത്ഥ വചീസങ്ഖാരോ നിരുജ്ഝതി, നോ ച തേസം തത്ഥ ചിത്തസങ്ഖാരോ നിരുജ്ഝിസ്സതി. ഇതരേസം വിതക്കവിചാരാനം ഭങ്ഗക്ഖണേ തേസം തത്ഥ വചീസങ്ഖാരോ ച നിരുജ്ഝതി ചിത്തസങ്ഖാരോ ച നിരുജ്ഝിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ നിരുജ്ഝിസ്സതി തസ്സ തത്ഥ വചീസങ്ഖാരോ നിരുജ്ഝതീതി?

സബ്ബേസം ചിത്തസ്സ ഉപ്പാദക്ഖണേ വിനാ വിതക്കവിചാരേഹി ചിത്തസ്സ ഭങ്ഗക്ഖണേ തേസം തത്ഥ ചിത്തസങ്ഖാരോ നിരുജ്ഝിസ്സതി, നോ ച തേസം തത്ഥ വചീസങ്ഖാരോ നിരുജ്ഝതി. വിതക്കവിചാരാനം ഭങ്ഗക്ഖണേ തേസം തത്ഥ ചിത്തസങ്ഖാരോ ച നിരുജ്ഝിസ്സതി വചീസങ്ഖാരോ ച നിരുജ്ഝതി.

(ഘ) പച്ചനീകപുഗ്ഗലോ

൧൧൩. (ക) യസ്സ കായസങ്ഖാരോ ന നിരുജ്ഝതി തസ്സ വചീസങ്ഖാരോ ന നിരുജ്ഝിസ്സതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം കായസങ്ഖാരോ ന നിരുജ്ഝതി, നോ ച തേസം വചീസങ്ഖാരോ ന നിരുജ്ഝിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി തേസം കായസങ്ഖാരോ ച ന നിരുജ്ഝതി വചീസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന വചീസങ്ഖാരോ ന നിരുജ്ഝിസ്സതി തസ്സ കായസങ്ഖാരോ ന നിരുജ്ഝതീതി? ആമന്താ.

(ക) യസ്സ കായസങ്ഖാരോ ന നിരുജ്ഝതി തസ്സ ചിത്തസങ്ഖാരോ ന നിരുജ്ഝിസ്സതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം കായസങ്ഖാരോ ന നിരുജ്ഝതി, നോ ച തേസം ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ തേസം കായസങ്ഖാരോ ച ന നിരുജ്ഝതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

൧൧൪. (ക) യസ്സ വചീസങ്ഖാരോ ന നിരുജ്ഝതി തസ്സ ചിത്തസങ്ഖാരോ ന നിരുജ്ഝിസ്സതീതി?

സബ്ബേസം ചിത്തസ്സ ഉപ്പാദക്ഖണേ വിനാ വിതക്കവിചാരേഹി ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം വചീസങ്ഖാരോ ന നിരുജ്ഝതി, നോ ച തേസം ചിത്തസങ്ഖാരോ ന നിരുജ്ഝിസ്സതി. അവിതക്കഅവിചാരപച്ഛിമചിത്തസ്സ ഭങ്ഗക്ഖണേ തേസം വചീസങ്ഖാരോ ച ന നിരുജ്ഝതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന ചിത്തസങ്ഖാരോ ന നിരുജ്ഝിസ്സതി തസ്സ വചീസങ്ഖാരോ ന നിരുജ്ഝതീതി?

സവിതക്കസവിചാരപച്ഛിമചിത്തസ്സ ഭങ്ഗക്ഖണേ തേസം ചിത്തസങ്ഖാരോ ന നിരുജ്ഝിസ്സതി, നോ ച തേസം വചീസങ്ഖാരോ ന നിരുജ്ഝതി. അവിതക്കഅവിചാരപച്ഛിമചിത്തസ്സ ഭങ്ഗക്ഖണേ തേസം ചിത്തസങ്ഖാരോ ച ന നിരുജ്ഝിസ്സതി വചീസങ്ഖാരോ ച ന നിരുജ്ഝതി.

(ങ) പച്ചനീകഓകാസോ

൧൧൫. യത്ഥ കായസങ്ഖാരോ ന നിരുജ്ഝതി…പേ….

(ച) പച്ചനീകപുഗ്ഗലോകാസാ

൧൧൬. (ക) യസ്സ യത്ഥ കായസങ്ഖാരോ ന നിരുജ്ഝതി തസ്സ തത്ഥ വചീസങ്ഖാരോ ന നിരുജ്ഝിസ്സതീതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ രൂപാവചരാനം അരൂപാവചരാനം തേസം തത്ഥ കായസങ്ഖാരോ ന നിരുജ്ഝതി, നോ ച തേസം തത്ഥ വചീസങ്ഖാരോ ന നിരുജ്ഝിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ കായസങ്ഖാരോ ച ന നിരുജ്ഝതി വചീസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന യത്ഥ വചീസങ്ഖാരോ ന നിരുജ്ഝിസ്സതി തസ്സ തത്ഥ കായസങ്ഖാരോ ന നിരുജ്ഝതീതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസം തത്ഥ വചീസങ്ഖാരോ ന നിരുജ്ഝിസ്സതി, നോ ച തേസം തത്ഥ കായസങ്ഖാരോ ന നിരുജ്ഝതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ വചീസങ്ഖാരോ ച ന നിരുജ്ഝിസ്സതി കായസങ്ഖാരോ ച ന നിരുജ്ഝതി.

(ക) യസ്സ യത്ഥ കായസങ്ഖാരോ ന നിരുജ്ഝതി തസ്സ തത്ഥ ചിത്തസങ്ഖാരോ ന നിരുജ്ഝിസ്സതീതി?

സബ്ബേസം ചിത്തസ്സ ഉപ്പാദക്ഖണേ വിനാ അസ്സാസപസ്സാസേഹി ചിത്തസ്സ ഭങ്ഗക്ഖണേ തേസം തത്ഥ കായസങ്ഖാരോ ന നിരുജ്ഝതി, നോ ച തേസം തത്ഥ ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ അസഞ്ഞസത്താനം തേസം തത്ഥ കായസങ്ഖാരോ ച ന നിരുജ്ഝതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

൧൧൭. (ക) യസ്സ യത്ഥ വചീസങ്ഖാരോ ന നിരുജ്ഝതി തസ്സ തത്ഥ ചിത്തസങ്ഖാരോ ന നിരുജ്ഝിസ്സതീതി?

സബ്ബേസം ചിത്തസ്സ ഉപ്പാദക്ഖണേ വിനാ വിതക്കവിചാരേഹി ചിത്തസ്സ ഭങ്ഗക്ഖണേ തേസം തത്ഥ വചീസങ്ഖാരോ ന നിരുജ്ഝതി, നോ ച തേസം തത്ഥ ചിത്തസങ്ഖാരോ ന നിരുജ്ഝിസ്സതി. അവിതക്കഅവിചാരപച്ഛിമചിത്തസ്സ ഭങ്ഗക്ഖണേ അസഞ്ഞസത്താനം തേസം തത്ഥ വചീസങ്ഖാരോ ച ന നിരുജ്ഝതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ ന നിരുജ്ഝിസ്സതി തസ്സ തത്ഥ വചീസങ്ഖാരോ ന നിരുജ്ഝതീതി?

സവിതക്കസവിചാരപച്ഛിമചിത്തസ്സ ഭങ്ഗക്ഖണേ തേസം തത്ഥ ചിത്തസങ്ഖാരോ ന നിരുജ്ഝിസ്സതി, നോ ച തേസം തത്ഥ വചീസങ്ഖാരോ ന നിരുജ്ഝതി. അവിതക്കഅവിചാരപച്ഛിമചിത്തസ്സ ഭങ്ഗക്ഖണേ അസഞ്ഞസത്താനം തേസം തത്ഥ ചിത്തസങ്ഖാരോ ച ന നിരുജ്ഝിസ്സതി വചീസങ്ഖാരോ ച ന നിരുജ്ഝതി.