(൩) അനാഗതവാരോ

(ക) അനുലോമപുഗ്ഗലോ

൮൮. (ക) യസ്സ കായസങ്ഖാരോ നിരുജ്ഝിസ്സതി തസ്സ വചീസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന വചീസങ്ഖാരോ നിരുജ്ഝിസ്സതി തസ്സ കായസങ്ഖാരോ നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരേ അരൂപാവചരേ പച്ഛിമഭവികാനം യേ ച രൂപാവചരം അരൂപാവചരം ഉപപജ്ജിത്വാ പരിനിബ്ബായിസ്സന്തി തേസം ചവന്താനം തേസം വചീസങ്ഖാരോ നിരുജ്ഝിസ്സതി, നോ ച തേസം കായസങ്ഖാരോ നിരുജ്ഝിസ്സതി. ഇതരേസം തേസം വചീസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝിസ്സതി.

(ക) യസ്സ കായസങ്ഖാരോ നിരുജ്ഝിസ്സതി തസ്സ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന ചിത്തസങ്ഖാരോ നിരുജ്ഝിസ്സതി തസ്സ കായസങ്ഖാരോ നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരേ അരൂപാവചരേ പച്ഛിമഭവികാനം യേ ച രൂപാവചരം അരൂപാവചരം ഉപപജ്ജിത്വാ പരിനിബ്ബായിസ്സന്തി തേസം ചവന്താനം തേസം ചിത്തസങ്ഖാരോ നിരുജ്ഝിസ്സതി, നോ ച തേസം കായസങ്ഖാരോ നിരുജ്ഝിസ്സതി. ഇതരേസം തേസം ചിത്തസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝിസ്സതി.

൮൯. (ക) യസ്സ വചീസങ്ഖാരോ നിരുജ്ഝിസ്സതി തസ്സ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന ചിത്തസങ്ഖാരോ നിരുജ്ഝിസ്സതി തസ്സ വചീസങ്ഖാരോ നിരുജ്ഝിസ്സതീതി?

അവിതക്കഅവിചാരപച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി തേസം ചിത്തസങ്ഖാരോ നിരുജ്ഝിസ്സതി, നോ ച തേസം വചീസങ്ഖാരോ നിരുജ്ഝിസ്സതി. ഇതരേസം തേസം ചിത്തസങ്ഖാരോ ച നിരുജ്ഝിസ്സതി വചീസങ്ഖാരോ ച നിരുജ്ഝിസ്സതി.

(ഖ) അനുലോമഓകാസോ

൯൦. യത്ഥ കായസങ്ഖാരോ നിരുജ്ഝിസ്സതി…പേ….

(ഗ) അനുലോമപുഗ്ഗലോകാസാ

൯൧. (ക) യസ്സ യത്ഥ കായസങ്ഖാരോ നിരുജ്ഝിസ്സതി തസ്സ തത്ഥ വചീസങ്ഖാരോ നിരുജ്ഝിസ്സതീതി?

ദുതിയജ്ഝാനം തതിയജ്ഝാനം സമാപന്നാനം തേസം തത്ഥ കായസങ്ഖാരോ നിരുജ്ഝിസ്സതി, നോ ച തേസം തത്ഥ വചീസങ്ഖാരോ നിരുജ്ഝിസ്സതി. പഠമജ്ഝാനം സമാപന്നാനം കാമാവചരാനം തേസം തത്ഥ കായസങ്ഖാരോ ച നിരുജ്ഝിസ്സതി വചീസങ്ഖാരോ ച നിരുജ്ഝിസ്സതി.

(ഖ) യസ്സ വാ പന യത്ഥ വചീസങ്ഖാരോ നിരുജ്ഝിസ്സതി തസ്സ തത്ഥ കായസങ്ഖാരോ നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരാനം അരൂപാവചരാനം തേസം തത്ഥ വചീസങ്ഖാരോ നിരുജ്ഝിസ്സതി, നോ ച തേസം തത്ഥ കായസങ്ഖാരോ നിരുജ്ഝിസ്സതി. പഠമജ്ഝാനം സമാപന്നാനം ഇതരേസം കാമാവചരാനം തേസം തത്ഥ വചീസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝിസ്സതി.

(ക) യസ്സ യത്ഥ കായസങ്ഖാരോ നിരുജ്ഝിസ്സതി തസ്സ തത്ഥ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ നിരുജ്ഝിസ്സതി തസ്സ തത്ഥ കായസങ്ഖാരോ നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി ചതുത്ഥജ്ഝാനം സമാപന്നാനം രൂപാവചരാനം അരൂപാവചരാനം തേസം തത്ഥ ചിത്തസങ്ഖാരോ നിരുജ്ഝിസ്സതി, നോ ച തേസം തത്ഥ കായസങ്ഖാരോ നിരുജ്ഝിസ്സതി. പഠമജ്ഝാനം ദുതിയജ്ഝാനം തതിയജ്ഝാനം സമാപന്നാനം ഇതരേസം കാമാവചരാനം തേസം തത്ഥ ചിത്തസങ്ഖാരോ ച നിരുജ്ഝിസ്സതി കായസങ്ഖാരോ ച നിരുജ്ഝിസ്സതി.

൯൨. (ക) യസ്സ യത്ഥ വചീസങ്ഖാരോ നിരുജ്ഝിസ്സതി തസ്സ തത്ഥ ചിത്തസങ്ഖാരോ നിരുജ്ഝിസ്സതീതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ നിരുജ്ഝിസ്സതി തസ്സ തത്ഥ വചീസങ്ഖാരോ നിരുജ്ഝിസ്സതീതി?

അവിതക്കഅവിചാരപച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം ചതുത്ഥജ്ഝാനം സമാപന്നാനം തേസം തത്ഥ ചിത്തസങ്ഖാരോ നിരുജ്ഝിസ്സതി, നോ ച തേസം തത്ഥ വചീസങ്ഖാരോ നിരുജ്ഝിസ്സതി. പഠമജ്ഝാനം സമാപന്നാനം കാമാവചരാനം ഇതരേസം രൂപാവചരാനം അരൂപാവചരാനം തേസം തത്ഥ ചിത്തസങ്ഖാരോ ച നിരുജ്ഝിസ്സതി വചീസങ്ഖാരോ ച നിരുജ്ഝിസ്സതി.

(ഘ) പച്ചനീകപുഗ്ഗലോ

൯൩. (ക) യസ്സ കായസങ്ഖാരോ ന നിരുജ്ഝിസ്സതി തസ്സ വചീസങ്ഖാരോ ന നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരേ അരൂപാവചരേ പച്ഛിമഭവികാനം യേ ച രൂപാവചരം അരൂപാവചരം ഉപപജ്ജിത്വാ പരിനിബ്ബായിസ്സന്തി തേസം ചവന്താനം തേസം കായസങ്ഖാരോ ന നിരുജ്ഝിസ്സതി, നോ ച തേസം വചീസങ്ഖാരോ ന നിരുജ്ഝിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി തേസം കായസങ്ഖാരോ ച ന നിരുജ്ഝിസ്സതി വചീസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

(ക) യസ്സ കായസങ്ഖാരോ ന നിരുജ്ഝിസ്സതി തസ്സ ചിത്തസങ്ഖാരോ ന നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരേ അരൂപാവചരേ പച്ഛിമഭവികാനം യേ ച രൂപാവചരം അരൂപാവചരം ഉപപജ്ജിത്വാ പരിനിബ്ബായിസ്സന്തി തേസം ചവന്താനം തേസം കായസങ്ഖാരോ ന നിരുജ്ഝിസ്സതി, നോ ച തേസം ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ തേസം കായസങ്ഖാരോ ച ന നിരുജ്ഝിസ്സതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

൯൪. (ക) യസ്സ വചീസങ്ഖാരോ ന നിരുജ്ഝിസ്സതി തസ്സ ചിത്തസങ്ഖാരോ ന നിരുജ്ഝിസ്സതീതി?

അവിതക്കഅവിചാരപച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി തേസം വചീസങ്ഖാരോ ന നിരുജ്ഝിസ്സതി, നോ ച തേസം ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ തേസം വചീസങ്ഖാരോ ച ന നിരുജ്ഝിസ്സതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

(ങ) പച്ചനീകഓകാസോ

൯൫. യത്ഥ കായസങ്ഖാരോ ന നിരുജ്ഝിസ്സതി…പേ….

(ച) പച്ചനീകപുഗ്ഗലോകാസാ

൯൬. (ക) യസ്സ യത്ഥ കായസങ്ഖാരോ ന നിരുജ്ഝിസ്സതി തസ്സ തത്ഥ വചീസങ്ഖാരോ ന നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി രൂപാവചരാനം അരൂപാവചരാനം തേസം തത്ഥ കായസങ്ഖാരോ ന നിരുജ്ഝിസ്സതി, നോ ച തേസം തത്ഥ വചീസങ്ഖാരോ ന നിരുജ്ഝിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ കായസങ്ഖാരോ ച ന നിരുജ്ഝിസ്സതി വചീസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന യത്ഥ വചീസങ്ഖാരോ ന നിരുജ്ഝിസ്സതി തസ്സ തത്ഥ കായസങ്ഖാരോ ന നിരുജ്ഝിസ്സതീതി?

ദുതിയജ്ഝാനം തതിയജ്ഝാനം സമാപന്നാനം തേസം തത്ഥ വചീസങ്ഖാരോ ന നിരുജ്ഝിസ്സതി, നോ ച തേസം തത്ഥ കായസങ്ഖാരോ ന നിരുജ്ഝിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ വചീസങ്ഖാരോ ച ന നിരുജ്ഝിസ്സതി കായസങ്ഖാരോ ച ന നിരുജ്ഝിസ്സതി.

(ക) യസ്സ യത്ഥ കായസങ്ഖാരോ ന നിരുജ്ഝിസ്സതി തസ്സ തത്ഥ ചിത്തസങ്ഖാരോ ന നിരുജ്ഝിസ്സതീതി?

കാമാവചരാനം പച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ കാമാവചരാനം പച്ഛിമചിത്തം ഉപ്പജ്ജിസ്സതി ചതുത്ഥജ്ഝാനം സമാപന്നാനം രൂപാവചരാനം അരൂപാവചരാനം തേസം തത്ഥ കായസങ്ഖാരോ ന നിരുജ്ഝിസ്സതി, നോ ച തേസം തത്ഥ ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ അസഞ്ഞസത്താനം തേസം തത്ഥ കായസങ്ഖാരോ ച ന നിരുജ്ഝിസ്സതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ ന നിരുജ്ഝിസ്സതി തസ്സ തത്ഥ കായസങ്ഖാരോ ന നിരുജ്ഝിസ്സതീതി? ആമന്താ.

൯൭. (ക) യസ്സ യത്ഥ വചീസങ്ഖാരോ ന നിരുജ്ഝിസ്സതി തസ്സ തത്ഥ ചിത്തസങ്ഖാരോ ന നിരുജ്ഝിസ്സതീതി?

അവിതക്കഅവിചാരപച്ഛിമചിത്തസ്സ ഉപ്പാദക്ഖണേ യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം ചതുത്ഥജ്ഝാനം സമാപന്നാനം തേസം തത്ഥ വചീസങ്ഖാരോ ന നിരുജ്ഝിസ്സതി, നോ ച തേസം തത്ഥ ചിത്തസങ്ഖാരോ ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ അസഞ്ഞസത്താനം തേസം തത്ഥ വചീസങ്ഖാരോ ച ന നിരുജ്ഝിസ്സതി ചിത്തസങ്ഖാരോ ച ന നിരുജ്ഝിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ ന നിരുജ്ഝിസ്സതി തസ്സ തത്ഥ വചീസങ്ഖാരോ ന നിരുജ്ഝിസ്സതീതി? ആമന്താ.