(൫) പച്ചുപ്പന്നാനാഗതവാരോ

(ക) അനുലോമപുഗ്ഗലോ

൫൯. (ക) യസ്സ കായസങ്ഖാരോ ഉപ്പജ്ജതി തസ്സ വചീസങ്ഖാരോ ഉപ്പജ്ജിസ്സതീതി? ആമന്താ.

(ഖ) യസ്സ വാ പന വചീസങ്ഖാരോ ഉപ്പജ്ജിസ്സതി തസ്സ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം വചീസങ്ഖാരോ ഉപ്പജ്ജിസ്സതി, നോ ച തേസം കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം വചീസങ്ഖാരോ ച ഉപ്പജ്ജിസ്സതി കായസങ്ഖാരോ ച ഉപ്പജ്ജതി.

(ക) യസ്സ കായസങ്ഖാരോ ഉപ്പജ്ജതി തസ്സ ചിത്തസങ്ഖാരോ ഉപ്പജ്ജിസ്സതീതി? ആമന്താ.

(ഖ) യസ്സ വാ പന ചിത്തസങ്ഖാരോ ഉപ്പജ്ജിസ്സതി തസ്സ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ ഉപ്പജ്ജിസ്സതി, നോ ച തേസം കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം ചിത്തസങ്ഖാരോ ച ഉപ്പജ്ജിസ്സതി കായസങ്ഖാരോ ച ഉപ്പജ്ജതി.

൬൦. (ക) യസ്സ വചീസങ്ഖാരോ ഉപ്പജ്ജതി തസ്സ ചിത്തസങ്ഖാരോ ഉപ്പജ്ജിസ്സതീതി?

സവിതക്കസവിചാരപച്ഛിമചിത്തസ്സ ഉപ്പാദക്ഖണേ തേസം വചീസങ്ഖാരോ ഉപ്പജ്ജതി, നോ ച തേസം ചിത്തസങ്ഖാരോ ഉപ്പജ്ജിസ്സതി. ഇതരേസം വിതക്കവിചാരാനം ഉപ്പാദക്ഖണേ തേസം വചീസങ്ഖാരോ ച ഉപ്പജ്ജതി ചിത്തസങ്ഖാരോ ച ഉപ്പജ്ജിസ്സതി.

(ഖ) യസ്സ വാ പന ചിത്തസങ്ഖാരോ ഉപ്പജ്ജിസ്സതി തസ്സ വചീസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ ഉപ്പജ്ജിസ്സതി, നോ ച തേസം വചീസങ്ഖാരോ ഉപ്പജ്ജതി. വിതക്കവിചാരാനം ഉപ്പാദക്ഖണേ തേസം ചിത്തസങ്ഖാരോ ച ഉപ്പജ്ജിസ്സതി വചീസങ്ഖാരോ ച ഉപ്പജ്ജതി.

(ഖ) അനുലോമഓകാസോ

൬൧. യത്ഥ കായസങ്ഖാരോ ഉപ്പജ്ജതി…പേ….

(ഗ) അനുലോമപുഗ്ഗലോകാസാ

൬൨. (ക) യസ്സ യത്ഥ കായസങ്ഖാരോ ഉപ്പജ്ജതി തസ്സ തത്ഥ വചീസങ്ഖാരോ ഉപ്പജ്ജിസ്സതീതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസം തത്ഥ കായസങ്ഖാരോ ഉപ്പജ്ജതി, നോ ച തേസം തത്ഥ വചീസങ്ഖാരോ ഉപ്പജ്ജിസ്സതി. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസം തത്ഥ കായസങ്ഖാരോ ച ഉപ്പജ്ജതി വചീസങ്ഖാരോ ച ഉപ്പജ്ജിസ്സതി.

(ഖ) യസ്സ വാ പന യത്ഥ വചീസങ്ഖാരോ ഉപ്പജ്ജിസ്സതി തസ്സ തത്ഥ കായസങ്ഖാരോ ഉപ്പജ്ജതീതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ രൂപാവചരാനം അരൂപാവചരാനം തേസം തത്ഥ വചീസങ്ഖാരോ ഉപ്പജ്ജിസ്സതി, നോ ച തേസം തത്ഥ കായസങ്ഖാരോ ഉപ്പജ്ജതി. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസം തത്ഥ വചീസങ്ഖാരോ ച ഉപ്പജ്ജിസ്സതി കായസങ്ഖാരോ ച ഉപ്പജ്ജതി.

(ക) യസ്സ യത്ഥ കായസങ്ഖാരോ ഉപ്പജ്ജതി തസ്സ തത്ഥ ചിത്തസങ്ഖാരോ ഉപ്പജ്ജിസ്സതീതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ ഉപ്പജ്ജിസ്സതി തസ്സ തത്ഥ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ തേസം തത്ഥ ചിത്തസങ്ഖാരോ ഉപ്പജ്ജിസ്സതി, നോ ച തേസം തത്ഥ കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം തത്ഥ ചിത്തസങ്ഖാരോ ച ഉപ്പജ്ജിസ്സതി കായസങ്ഖാരോ ച ഉപ്പജ്ജതി.

൬൩. (ക) യസ്സ യത്ഥ വചീസങ്ഖാരോ ഉപ്പജ്ജതി തസ്സ തത്ഥ ചിത്തസങ്ഖാരോ ഉപ്പജ്ജിസ്സതീതി?

സവിതക്കസവിചാരപച്ഛിമചിത്തസ്സ ഉപ്പാദക്ഖണേ തേസം തത്ഥ വചീസങ്ഖാരോ ഉപ്പജ്ജതി, നോ ച തേസം തത്ഥ ചിത്തസങ്ഖാരോ ഉപ്പജ്ജിസ്സതി. ഇതരേസം വിതക്കവിചാരാനം ഉപ്പാദക്ഖണേ തേസം തത്ഥ വചീസങ്ഖാരോ ച ഉപ്പജ്ജതി ചിത്തസങ്ഖാരോ ച ഉപ്പജ്ജിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ ഉപ്പജ്ജിസ്സതി തസ്സ തത്ഥ വചീസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ തേസം തത്ഥ ചിത്തസങ്ഖാരോ ഉപ്പജ്ജിസ്സതി, നോ ച തേസം തത്ഥ വചീസങ്ഖാരോ ഉപ്പജ്ജതി. വിതക്കവിചാരാനം ഉപ്പാദക്ഖണേ തേസം തത്ഥ ചിത്തസങ്ഖാരോ ച ഉപ്പജ്ജിസ്സതി വചീസങ്ഖാരോ ച ഉപ്പജ്ജതി.

(ഘ) പച്ചനീകപുഗ്ഗലോ

൬൪. (ക) യസ്സ കായസങ്ഖാരോ നുപ്പജ്ജതി തസ്സ വചീസങ്ഖാരോ നുപ്പജ്ജിസ്സതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം കായസങ്ഖാരോ നുപ്പജ്ജതി, നോ ച തേസം വചീസങ്ഖാരോ നുപ്പജ്ജിസ്സതി. പച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി തേസം കായസങ്ഖാരോ ച നുപ്പജ്ജതി വചീസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന വചീസങ്ഖാരോ നുപ്പജ്ജിസ്സതി തസ്സ കായസങ്ഖാരോ നുപ്പജ്ജതീതി? ആമന്താ.

(ക) യസ്സ കായസങ്ഖാരോ നുപ്പജ്ജതി തസ്സ ചിത്തസങ്ഖാരോ നുപ്പജ്ജിസ്സതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം കായസങ്ഖാരോ നുപ്പജ്ജതി, നോ ച തേസം ചിത്തസങ്ഖാരോ നുപ്പജ്ജിസ്സതി. പച്ഛിമചിത്തസമങ്ഗീനം തേസം കായസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന…പേ…? ആമന്താ.

൬൫. (ക) യസ്സ വചീസങ്ഖാരോ നുപ്പജ്ജതി തസ്സ ചിത്തസങ്ഖാരോ നുപ്പജ്ജിസ്സതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം വചീസങ്ഖാരോ നുപ്പജ്ജതി, നോ ച തേസം ചിത്തസങ്ഖാരോ നുപ്പജ്ജിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം തേസം വചീസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന ചിത്തസങ്ഖാരോ നുപ്പജ്ജിസ്സതി തസ്സ വചീസങ്ഖാരോ നുപ്പജ്ജതീതി?

സവിതക്കസവിചാരപച്ഛിമചിത്തസ്സ ഉപ്പാദക്ഖണേ തേസം ചിത്തസങ്ഖാരോ നുപ്പജ്ജിസ്സതി, നോ ച തേസം വചീസങ്ഖാരോ നുപ്പജ്ജതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം തേസം ചിത്തസങ്ഖാരോ ച നുപ്പജ്ജിസ്സതി വചീസങ്ഖാരോ ച നുപ്പജ്ജതി.

൪. (ങ) പച്ചനീകഓകാസോ

൬൬. യത്ഥ കായസങ്ഖാരോ നുപ്പജ്ജതി…പേ….

(ച) പച്ചനീകപുഗ്ഗലോകാസാ

൬൭. (ക) യസ്സ യത്ഥ കായസങ്ഖാരോ നുപ്പജ്ജതി തസ്സ തത്ഥ വചീസങ്ഖാരോ നുപ്പജ്ജിസ്സതീതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ രൂപാവചരാനം അരൂപാവചരാനം തേസം തത്ഥ കായസങ്ഖാരോ നുപ്പജ്ജതി, നോ ച തേസം തത്ഥ വചീസങ്ഖാരോ നുപ്പജ്ജിസ്സതി. പച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ കായസങ്ഖാരോ ച നുപ്പജ്ജതി വചീസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന യത്ഥ വചീസങ്ഖാരോ നുപ്പജ്ജിസ്സതി തസ്സ തത്ഥ കായസങ്ഖാരോ നുപ്പജ്ജതീതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസം തത്ഥ വചീസങ്ഖാരോ നുപ്പജ്ജിസ്സതി, നോ ച തേസം തത്ഥ കായസങ്ഖാരോ നുപ്പജ്ജതി. പച്ഛിമചിത്തസമങ്ഗീനം യസ്സ ചിത്തസ്സ അനന്തരാ അവിതക്കഅവിചാരം പച്ഛിമചിത്തം ഉപ്പജ്ജിസ്സതി ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ ചതുത്ഥജ്ഝാനം സമാപന്നാനം അസഞ്ഞസത്താനം തേസം തത്ഥ വചീസങ്ഖാരോ ച നുപ്പജ്ജിസ്സതി കായസങ്ഖാരോ ച നുപ്പജ്ജതി.

(ക) യസ്സ യത്ഥ കായസങ്ഖാരോ നുപ്പജ്ജതി തസ്സ തത്ഥ ചിത്തസങ്ഖാരോ നുപ്പജ്ജിസ്സതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ തേസം തത്ഥ കായസങ്ഖാരോ നുപ്പജ്ജതി, നോ ച തേസം തത്ഥ ചിത്തസങ്ഖാരോ നുപ്പജ്ജിസ്സതി. പച്ഛിമചിത്തസമങ്ഗീനം അസഞ്ഞസത്താനം തേസം തത്ഥ കായസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ നുപ്പജ്ജിസ്സതി തസ്സ തത്ഥ കായസങ്ഖാരോ നുപ്പജ്ജതീതി? ആമന്താ.

൬൮. (ക) യസ്സ യത്ഥ വചീസങ്ഖാരോ നുപ്പജ്ജതി തസ്സ തത്ഥ ചിത്തസങ്ഖാരോ നുപ്പജ്ജിസ്സതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ തേസം തത്ഥ വചീസങ്ഖാരോ നുപ്പജ്ജതി, നോ ച തേസം തത്ഥ ചിത്തസങ്ഖാരോ നുപ്പജ്ജിസ്സതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം അസഞ്ഞസത്താനം തേസം തത്ഥ വചീസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിസ്സതി.

(ഖ) യസ്സ വാ പന യത്ഥ ചിത്തസങ്ഖാരോ നുപ്പജ്ജിസ്സതി തസ്സ തത്ഥ വചീസങ്ഖാരോ നുപ്പജ്ജതീതി?

സവിതക്കസവിചാരപച്ഛിമചിത്തസ്സ ഉപ്പാദക്ഖണേ തേസം തത്ഥ ചിത്തസങ്ഖാരോ നുപ്പജ്ജിസ്സതി, നോ ച തേസം തത്ഥ വചീസങ്ഖാരോ നുപ്പജ്ജതി. സവിതക്കസവിചാരപച്ഛിമചിത്തസ്സ ഭങ്ഗക്ഖണേ അവിതക്കഅവിചാരപച്ഛിമചിത്തസമങ്ഗീനം അസഞ്ഞസത്താനം തേസം തത്ഥ ചിത്തസങ്ഖാരോ ച നുപ്പജ്ജിസ്സതി വചീസങ്ഖാരോ ച നുപ്പജ്ജതി.