(൪) പച്ചുപ്പന്നാതീതവാരോ

(ക) അനുലോമപുഗ്ഗലോ

൪൯. (ക) യസ്സ കായസങ്ഖാരോ ഉപ്പജ്ജതി തസ്സ വചീസങ്ഖാരോ ഉപ്പജ്ജിത്ഥാതി? ആമന്താ.

(ഖ) യസ്സ വാ പന വചീസങ്ഖാരോ ഉപ്പജ്ജിത്ഥ തസ്സ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം വചീസങ്ഖാരോ ഉപ്പജ്ജിത്ഥ, നോ ച തേസം കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം വചീസങ്ഖാരോ ച ഉപ്പജ്ജിത്ഥ കായസങ്ഖാരോ ച ഉപ്പജ്ജതി.

(ക) യസ്സ കായസങ്ഖാരോ ഉപ്പജ്ജതി തസ്സ ചിത്തസങ്ഖാരോ ഉപ്പജ്ജിത്ഥാതി? ആമന്താ.

(ഖ) യസ്സ വാ പന ചിത്തസങ്ഖാരോ ഉപ്പജ്ജിത്ഥ തസ്സ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ ഉപ്പജ്ജിത്ഥ, നോ ച തേസം കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം ചിത്തസങ്ഖാരോ ച ഉപ്പജ്ജിത്ഥ കായസങ്ഖാരോ ച ഉപ്പജ്ജതി.

൫൦. (ക) യസ്സ വചീസങ്ഖാരോ ഉപ്പജ്ജതി തസ്സ ചിത്തസങ്ഖാരോ ഉപ്പജ്ജിത്ഥാതി? ആമന്താ.

(ഖ) യസ്സ വാ പന ചിത്തസങ്ഖാരോ ഉപ്പജ്ജിത്ഥ തസ്സ വചീസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തസങ്ഖാരോ ഉപ്പജ്ജിത്ഥ, നോ ച തേസം വചീസങ്ഖാരോ ഉപ്പജ്ജതി. വിതക്കവിചാരാനം ഉപ്പാദക്ഖണേ തേസം ചിത്തസങ്ഖാരോ ച ഉപ്പജ്ജിത്ഥ വചീസങ്ഖാരോ ച ഉപ്പജ്ജതി.

(ഖ) അനുലോമഓകാസോ

൫൧. യത്ഥ കായസങ്ഖാരോ ഉപ്പജ്ജതി…പേ….

(ഗ) അനുലോമപുഗ്ഗലോകാസാ

൫൨. (ക) യസ്സ യത്ഥ കായസങ്ഖാരോ ഉപ്പജ്ജതി തസ്സ തത്ഥ വചീസങ്ഖാരോ ഉപ്പജ്ജിത്ഥാതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസം തത്ഥ കായസങ്ഖാരോ ഉപ്പജ്ജതി, നോ ച തേസം തത്ഥ വചീസങ്ഖാരോ ഉപ്പജ്ജിത്ഥ. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസം തത്ഥ കായസങ്ഖാരോ ച ഉപ്പജ്ജതി വചീസങ്ഖാരോ ച ഉപ്പജ്ജിത്ഥ.

(ഖ) യസ്സ വാ പന യത്ഥ വചീസങ്ഖാരോ ഉപ്പജ്ജിത്ഥ തസ്സ തത്ഥ കായസങ്ഖാരോ ഉപ്പജ്ജതീതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ രൂപാവചരാനം അരൂപാവചരാനം തേസം തത്ഥ വചീസങ്ഖാരോ ഉപ്പജ്ജിത്ഥ, നോ ച തേസം തത്ഥ കായസങ്ഖാരോ ഉപ്പജ്ജതി. പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഉപ്പാദക്ഖണേ തേസം തത്ഥ വചീസങ്ഖാരോ ച ഉപ്പജ്ജിത്ഥ കായസങ്ഖാരോ ച ഉപ്പജ്ജതി.

(ക) യസ്സ യത്ഥ കായസങ്ഖാരോ ഉപ്പജ്ജതി തസ്സ തത്ഥ ചിത്തസങ്ഖാരോ ഉപ്പജ്ജിത്ഥാതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ ഉപ്പജ്ജിത്ഥ തസ്സ തത്ഥ കായസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ തേസം തത്ഥ ചിത്തസങ്ഖാരോ ഉപ്പജ്ജിത്ഥ, നോ ച തേസം തത്ഥ കായസങ്ഖാരോ ഉപ്പജ്ജതി. അസ്സാസപസ്സാസാനം ഉപ്പാദക്ഖണേ തേസം തത്ഥ ചിത്തസങ്ഖാരോ ച ഉപ്പജ്ജിത്ഥ കായസങ്ഖാരോ ച ഉപ്പജ്ജതി.

൫൩. (ക) യസ്സ യത്ഥ വചീസങ്ഖാരോ ഉപ്പജ്ജതി തസ്സ തത്ഥ ചിത്തസങ്ഖാരോ ഉപ്പജ്ജിത്ഥാതി? ആമന്താ.

(ഖ) യസ്സ വാ പന യത്ഥ ചിത്തസങ്ഖാരോ ഉപ്പജ്ജിത്ഥ തസ്സ തത്ഥ വചീസങ്ഖാരോ ഉപ്പജ്ജതീതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ തേസം തത്ഥ ചിത്തസങ്ഖാരോ ഉപ്പജ്ജിത്ഥ, നോ ച തേസം തത്ഥ വചീസങ്ഖാരോ ഉപ്പജ്ജതി. വിതക്കവിചാരാനം ഉപ്പാദക്ഖണേ തേസം തത്ഥ ചിത്തസങ്ഖാരോ ച ഉപ്പജ്ജിത്ഥ വചീസങ്ഖാരോ ച ഉപ്പജ്ജതി.

(ഘ) പച്ചനീകപുഗ്ഗലോ

൫൪. (ക) യസ്സ കായസങ്ഖാരോ നുപ്പജ്ജതി തസ്സ വചീസങ്ഖാരോ നുപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന വചീസങ്ഖാരോ നുപ്പജ്ജിത്ഥ തസ്സ കായസങ്ഖാരോ നുപ്പജ്ജതീതി? നത്ഥി.

(ക) യസ്സ കായസങ്ഖാരോ നുപ്പജ്ജതി തസ്സ ചിത്തസങ്ഖാരോ നുപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന ചിത്തസങ്ഖാരോ നുപ്പജ്ജിത്ഥ തസ്സ കായസങ്ഖാരോ നുപ്പജ്ജതീതി? നത്ഥി.

൫൫. (ക) യസ്സ വചീസങ്ഖാരോ നുപ്പജ്ജതി തസ്സ ചിത്തസങ്ഖാരോ നുപ്പജ്ജിത്ഥാതി? ഉപ്പജ്ജിത്ഥ.

(ഖ) യസ്സ വാ പന…പേ…? നത്ഥി.

(ങ) പച്ചനീകഓകാസോ

൫൬. യത്ഥ കായസങ്ഖാരോ നുപ്പജ്ജതി…പേ….

(ച) പച്ചനീകപുഗ്ഗലോകാസാ

൫൭. (ക) യസ്സ യത്ഥ കായസങ്ഖാരോ നുപ്പജ്ജതി തസ്സ തത്ഥ വചീസങ്ഖാരോ നുപ്പജ്ജിത്ഥാതി?

പഠമജ്ഝാനം സമാപന്നാനം കാമാവചരാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ രൂപാവചരാനം അരൂപാവചരാനം തേസം തത്ഥ കായസങ്ഖാരോ നുപ്പജ്ജതി, നോ ച തേസം തത്ഥ വചീസങ്ഖാരോ നുപ്പജ്ജിത്ഥ. ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ ചതുത്ഥജ്ഝാനം സമാപന്നാനം സുദ്ധാവാസാനം ദുതിയേ ചിത്തേ വത്തമാനേ അസഞ്ഞസത്താനം തേസം തത്ഥ കായസങ്ഖാരോ ച നുപ്പജ്ജതി വചീസങ്ഖാരോ ച നുപ്പജ്ജിത്ഥ.

(ഖ) യസ്സ വാ പന യത്ഥ വചീസങ്ഖാരോ നുപ്പജ്ജിത്ഥ തസ്സ തത്ഥ കായസങ്ഖാരോ നുപ്പജ്ജതീതി?

ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഉപ്പാദക്ഖണേ തേസം തത്ഥ വചീസങ്ഖാരോ നുപ്പജ്ജിത്ഥ, നോ ച തേസം തത്ഥ കായസങ്ഖാരോ നുപ്പജ്ജതി. ദുതിയജ്ഝാനം തതിയജ്ഝാനം സമാപന്നാനം അസ്സാസപസ്സാസാനം ഭങ്ഗക്ഖണേ തേസംയേവ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ ചതുത്ഥജ്ഝാനം സമാപന്നാനം സുദ്ധാവാസാനം ദുതിയേ ചിത്തേ വത്തമാനേ അസഞ്ഞസത്താനം തേസം തത്ഥ വചീസങ്ഖാരോ ച നുപ്പജ്ജിത്ഥ കായസങ്ഖാരോ ച നുപ്പജ്ജതി.

(ക) യസ്സ യത്ഥ കായസങ്ഖാരോ നുപ്പജ്ജതി തസ്സ തത്ഥ ചിത്തസങ്ഖാരോ നുപ്പജ്ജിത്ഥാതി?

സബ്ബേസം ചിത്തസ്സ ഭങ്ഗക്ഖണേ വിനാ അസ്സാസപസ്സാസേഹി ചിത്തസ്സ ഉപ്പാദക്ഖണേ തേസം തത്ഥ കായസങ്ഖാരോ നുപ്പജ്ജതി, നോ ച തേസം തത്ഥ ചിത്തസങ്ഖാരോ നുപ്പജ്ജിത്ഥ. സുദ്ധാവാസം ഉപപജ്ജന്താനം അസഞ്ഞസത്താനം തേസം തത്ഥ കായസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിത്ഥ.

(ഖ) യസ്സ വാ പന യത്ഥ ചിത്തസങ്ഖാരോ നുപ്പജ്ജിത്ഥ തസ്സ തത്ഥ കായസങ്ഖാരോ നുപ്പജ്ജതീതി? ആമന്താ.

൫൮. (ക) യസ്സ യത്ഥ വചീസങ്ഖാരോ നുപ്പജ്ജതി തസ്സ തത്ഥ ചിത്തസങ്ഖാരോ നുപ്പജ്ജിത്ഥാതി?

സബ്ബേസം ചിത്തസ്സ ഭങ്ഗക്ഖണേ വിനാ വിതക്കവിചാരേഹി ചിത്തസ്സ ഉപ്പാദക്ഖണേ തേസം തത്ഥ വചീസങ്ഖാരോ നുപ്പജ്ജതി, നോ ച തേസം തത്ഥ ചിത്തസങ്ഖാരോ നുപ്പജ്ജിത്ഥ. സുദ്ധാവാസം ഉപപജ്ജന്താനം അസഞ്ഞസത്താനം തേസം തത്ഥ വചീസങ്ഖാരോ ച നുപ്പജ്ജതി ചിത്തസങ്ഖാരോ ച നുപ്പജ്ജിത്ഥ.

(ഖ) യസ്സ വാ പന യത്ഥ…പേ…? ആമന്താ.