(൪) പച്ചുപ്പന്നാതീതവാരോ

(ക) അനുലോമപുഗ്ഗലോ

൧൦൬. (ക) യസ്സ ദുക്ഖസച്ചം നിരുജ്ഝതി തസ്സ സമുദയസച്ചം നിരുജ്ഝിത്ഥാതി? ആമന്താ.

(ഖ) യസ്സ വാ പന സമുദയസച്ചം നിരുജ്ഝിത്ഥ തസ്സ ദുക്ഖസച്ചം നിരുജ്ഝതീതി?

സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം സമുദയസച്ചം നിരുജ്ഝിത്ഥ, നോ ച തേസം ദുക്ഖസച്ചം നിരുജ്ഝതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ തേസം സമുദയസച്ചഞ്ച നിരുജ്ഝിത്ഥ ദുക്ഖസച്ചഞ്ച നിരുജ്ഝതി.

(ക) യസ്സ ദുക്ഖസച്ചം നിരുജ്ഝതി തസ്സ മഗ്ഗസച്ചം നിരുജ്ഝിത്ഥാതി?

അനഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം ദുക്ഖസച്ചം നിരുജ്ഝതി, നോ ച തേസം മഗ്ഗസച്ചം നിരുജ്ഝിത്ഥ. അഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം ദുക്ഖസച്ചഞ്ച നിരുജ്ഝതി മഗ്ഗസച്ചഞ്ച നിരുജ്ഝിത്ഥ.

(ഖ) യസ്സ വാ പന മഗ്ഗസച്ചം നിരുജ്ഝിത്ഥ തസ്സ ദുക്ഖസച്ചം നിരുജ്ഝതീതി?

അഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം മഗ്ഗസച്ചം നിരുജ്ഝിത്ഥ, നോ ച തേസം ദുക്ഖസച്ചം നിരുജ്ഝതി. അഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം മഗ്ഗസച്ചഞ്ച നിരുജ്ഝിത്ഥ ദുക്ഖസച്ചഞ്ച നിരുജ്ഝതി.

൧൦൭. (ക) യസ്സ സമുദയസച്ചം നിരുജ്ഝതി തസ്സ മഗ്ഗസച്ചം നിരുജ്ഝിത്ഥാതി?

അനഭിസമേതാവീനം തണ്ഹായ ഭങ്ഗക്ഖണേ തേസം സമുദയസച്ചം നിരുജ്ഝതി, നോ ച തേസം മഗ്ഗസച്ചം നിരുജ്ഝിത്ഥ. അഭിസമേതാവീനം തണ്ഹായ ഭങ്ഗക്ഖണേ തേസം സമുദയസച്ചഞ്ച നിരുജ്ഝതി മഗ്ഗസച്ചഞ്ച നിരുജ്ഝിത്ഥ.

(ഖ) യസ്സ വാ പന മഗ്ഗസച്ചം നിരുജ്ഝിത്ഥ തസ്സ സമുദയസച്ചം നിരുജ്ഝതീതി?

അഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ നിരോധസമാപന്നാനം തേസം മഗ്ഗസച്ചം നിരുജ്ഝിത്ഥ, നോ ച തേസം സമുദയസച്ചം നിരുജ്ഝതി. അഭിസമേതാവീനം തണ്ഹായ ഭങ്ഗക്ഖണേ തേസം മഗ്ഗസച്ചഞ്ച നിരുജ്ഝിത്ഥ സമുദയസച്ചഞ്ച നിരുജ്ഝതി.

(ഖ) അനുലോമഓകാസോ

൧൦൮. യത്ഥ ദുക്ഖസച്ചം നിരുജ്ഝതി…പേ….

(ഗ) അനുലോമപുഗ്ഗലോകാസാ

൧൦൯. (ക) യസ്സ യത്ഥ ദുക്ഖസച്ചം നിരുജ്ഝതി തസ്സ തത്ഥ സമുദയസച്ചം നിരുജ്ഝിത്ഥാതി?

സുദ്ധാവാസാനം ഉപപത്തിചിത്തസ്സ ഭങ്ഗക്ഖണേ അസഞ്ഞസത്താ ചവന്താനം തേസം തത്ഥ ദുക്ഖസച്ചം നിരുജ്ഝതി, നോ ച തേസം തത്ഥ സമുദയസച്ചം നിരുജ്ഝിത്ഥ. ഇതരേസം ചതുവോകാരാ പഞ്ചവോകാരാ ചവന്താനം പവത്തേ ചിത്തസ്സ ഭങ്ഗക്ഖണേ തേസം തത്ഥ ദുക്ഖസച്ചഞ്ച നിരുജ്ഝതി സമുദയസച്ചഞ്ച നിരുജ്ഝിത്ഥ.

(ഖ) യസ്സ വാ പന യത്ഥ സമുദയസച്ചം നിരുജ്ഝിത്ഥ തസ്സ തത്ഥ ദുക്ഖസച്ചം നിരുജ്ഝതീതി?

ചതുവോകാരം പഞ്ചവോകാരം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം തത്ഥ സമുദയസച്ചം നിരുജ്ഝിത്ഥ, നോ ച തേസം തത്ഥ ദുക്ഖസച്ചം നിരുജ്ഝതി. ചതുവോകാരാ പഞ്ചവോകാരാ ചവന്താനം പവത്തേ ചിത്തസ്സ ഭങ്ഗക്ഖണേ തേസം തത്ഥ സമുദയസച്ചഞ്ച നിരുജ്ഝിത്ഥ ദുക്ഖസച്ചഞ്ച നിരുജ്ഝതി.

(ക) യസ്സ യത്ഥ ദുക്ഖസച്ചം നിരുജ്ഝതി തസ്സ തത്ഥ മഗ്ഗസച്ചം നിരുജ്ഝിത്ഥാതി?

സുദ്ധാവാസാനം ഉപപത്തിചിത്തസ്സ ഭങ്ഗക്ഖണേ അനഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ അസഞ്ഞസത്താ ചവന്താനം തേസം തത്ഥ ദുക്ഖസച്ചം നിരുജ്ഝതി, നോ ച തേസം തത്ഥ മഗ്ഗസച്ചം നിരുജ്ഝിത്ഥ. അഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം തത്ഥ ദുക്ഖസച്ചഞ്ച നിരുജ്ഝതി മഗ്ഗസച്ചഞ്ച നിരുജ്ഝിത്ഥ.

(ഖ) യസ്സ വാ പന യത്ഥ മഗ്ഗസച്ചം നിരുജ്ഝിത്ഥ തസ്സ തത്ഥ ദുക്ഖസച്ചം നിരുജ്ഝതീതി?

അഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം തത്ഥ മഗ്ഗസച്ചം നിരുജ്ഝിത്ഥ, നോ ച തേസം തത്ഥ ദുക്ഖസച്ചം നിരുജ്ഝതി. അഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം തത്ഥ മഗ്ഗസച്ചഞ്ച നിരുജ്ഝിത്ഥ ദുക്ഖസച്ചഞ്ച നിരുജ്ഝതി.

൧൧൦. (ക) യസ്സ യത്ഥ സമുദയസച്ചം നിരുജ്ഝതി തസ്സ തത്ഥ മഗ്ഗസച്ചം നിരുജ്ഝിത്ഥാതി?

അനഭിസമേതാവീനം തണ്ഹായ ഭങ്ഗക്ഖണേ തേസം തത്ഥ സമുദയസച്ചം നിരുജ്ഝതി, നോ ച തേസം തത്ഥ മഗ്ഗസച്ചം നിരുജ്ഝിത്ഥ. അഭിസമേതാവീനം തണ്ഹായ ഭങ്ഗക്ഖണേ തേസം തത്ഥ സമുദയസച്ചഞ്ച നിരുജ്ഝതി മഗ്ഗസച്ചഞ്ച നിരുജ്ഝിത്ഥ.

(ഖ) യസ്സ വാ പന യത്ഥ മഗ്ഗസച്ചം നിരുജ്ഝിത്ഥ തസ്സ തത്ഥ സമുദയസച്ചം നിരുജ്ഝതീതി?

അഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ തേസം തത്ഥ മഗ്ഗസച്ചം നിരുജ്ഝിത്ഥ, നോ ച തേസം തത്ഥ സമുദയസച്ചം നിരുജ്ഝതി. അഭിസമേതാവീനം തണ്ഹായ ഭങ്ഗക്ഖണേ തേസം തത്ഥ മഗ്ഗസച്ചഞ്ച നിരുജ്ഝിത്ഥ സമുദയസച്ചഞ്ച നിരുജ്ഝതി.

(ഘ) പച്ചനീകപുഗ്ഗലോ

൧൧൧. (ക) യസ്സ ദുക്ഖസച്ചം ന നിരുജ്ഝതി തസ്സ സമുദയസച്ചം ന നിരുജ്ഝിത്ഥാതി? നിരുജ്ഝിത്ഥ.

(ഖ) യസ്സ വാ പന സമുദയസച്ചം ന നിരുജ്ഝിത്ഥ തസ്സ ദുക്ഖസച്ചം ന നിരുജ്ഝതീതി? നത്ഥി.

(ക) യസ്സ ദുക്ഖസച്ചം ന നിരുജ്ഝതി തസ്സ മഗ്ഗസച്ചം ന നിരുജ്ഝിത്ഥാതി?

അഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം ദുക്ഖസച്ചം ന നിരുജ്ഝതി, നോ ച തേസം മഗ്ഗസച്ചം ന നിരുജ്ഝിത്ഥ. അനഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ തേസം ദുക്ഖസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝിത്ഥ.

(ഖ) യസ്സ വാ പന മഗ്ഗസച്ചം ന നിരുജ്ഝിത്ഥ തസ്സ ദുക്ഖസച്ചം ന നിരുജ്ഝതീതി?

അനഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ തേസം മഗ്ഗസച്ചം ന നിരുജ്ഝിത്ഥ, നോ ച തേസം ദുക്ഖസച്ചം ന നിരുജ്ഝതി. അനഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ തേസം മഗ്ഗസച്ചഞ്ച ന നിരുജ്ഝിത്ഥ ദുക്ഖസച്ചഞ്ച ന നിരുജ്ഝതി.

൧൧൨. (ക) യസ്സ സമുദയസച്ചം ന നിരുജ്ഝതി തസ്സ മഗ്ഗസച്ചം ന നിരുജ്ഝിത്ഥാതി?

അഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ നിരോധസമാപന്നാനം തേസം സമുദയസച്ചം ന നിരുജ്ഝതി, നോ ച തേസം മഗ്ഗസച്ചം ന നിരുജ്ഝിത്ഥ. അനഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ അസഞ്ഞസത്താനം തേസം സമുദയസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝിത്ഥ.

(ഖ) യസ്സ വാ പന മഗ്ഗസച്ചം ന നിരുജ്ഝിത്ഥ തസ്സ സമുദയസച്ചം ന നിരുജ്ഝതീതി?

അനഭിസമേതാവീനം തണ്ഹായ ഭങ്ഗക്ഖണേ തേസം മഗ്ഗസച്ചം ന നിരുജ്ഝിത്ഥ, നോ ച തേസം സമുദയസച്ചം ന നിരുജ്ഝതി. അനഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ അസഞ്ഞസത്താനം തേസം മഗ്ഗസച്ചഞ്ച ന നിരുജ്ഝിത്ഥ സമുദയസച്ചഞ്ച ന നിരുജ്ഝതി.

(ങ) പച്ചനീകഓകാസോ

൧൧൩. യത്ഥ ദുക്ഖസച്ചം ന നിരുജ്ഝതി…പേ….

(ച) പച്ചനീകപുഗ്ഗലോകാസാ

൧൧൪. (ക) യസ്സ യത്ഥ ദുക്ഖസച്ചം ന നിരുജ്ഝതി തസ്സ തത്ഥ സമുദയസച്ചം ന നിരുജ്ഝിത്ഥാതി?

ചതുവോകാരം പഞ്ചവോകാരം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം തത്ഥ ദുക്ഖസച്ചം ന നിരുജ്ഝതി, നോ ച തേസം തത്ഥ സമുദയസച്ചം ന നിരുജ്ഝിത്ഥ. സുദ്ധാവാസാനം ഉപപത്തിചിത്തസ്സ ഉപ്പാദക്ഖണേ അസഞ്ഞസത്തം ഉപപജ്ജന്താനം തേസം തത്ഥ ദുക്ഖസച്ചഞ്ച ന നിരുജ്ഝതി സമുദയസച്ചഞ്ച ന നിരുജ്ഝിത്ഥ.

(ഖ) യസ്സ വാ പന യത്ഥ സമുദയസച്ചം ന നിരുജ്ഝിത്ഥ തസ്സ തത്ഥ ദുക്ഖസച്ചം ന നിരുജ്ഝതീതി?

സുദ്ധാവാസാനം ഉപപത്തിചിത്തസ്സ ഭങ്ഗക്ഖണേ അസഞ്ഞസത്താ ചവന്താനം തേസം തത്ഥ സമുദയസച്ചം ന നിരുജ്ഝിത്ഥ, നോ ച തേസം തത്ഥ ദുക്ഖസച്ചം ന നിരുജ്ഝതി. സുദ്ധാവാസാനം ഉപപത്തിചിത്തസ്സ ഉപ്പാദക്ഖണേ അസഞ്ഞസത്തം ഉപപജ്ജന്താനം തേസം തത്ഥ സമുദയസച്ചഞ്ച ന നിരുജ്ഝിത്ഥ ദുക്ഖസച്ചഞ്ച ന നിരുജ്ഝതി.

(ക) യസ്സ യത്ഥ ദുക്ഖസച്ചം ന നിരുജ്ഝതി തസ്സ തത്ഥ മഗ്ഗസച്ചം ന നിരുജ്ഝിത്ഥാതി?

അഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം തത്ഥ ദുക്ഖസച്ചം ന നിരുജ്ഝതി, നോ ച തേസം തത്ഥ മഗ്ഗസച്ചം ന നിരുജ്ഝിത്ഥ. സുദ്ധാവാസാനം ഉപപത്തിചിത്തസ്സ ഉപ്പാദക്ഖണേ അനഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അസഞ്ഞസത്തം ഉപപജ്ജന്താനം തേസം തത്ഥ ദുക്ഖസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝിത്ഥ.

(ഖ) യസ്സ വാ പന യത്ഥ മഗ്ഗസച്ചം ന നിരുജ്ഝിത്ഥ തസ്സ തത്ഥ ദുക്ഖസച്ചം ന നിരുജ്ഝതീതി?

സുദ്ധാവാസാനം ഉപപത്തിചിത്തസ്സ ഭങ്ഗക്ഖണേ അനഭിസമേതാവീനം ചവന്താനം പവത്തേ ചിത്തസ്സ ഭങ്ഗക്ഖണേ അസഞ്ഞസത്താ ചവന്താനം തേസം തത്ഥ മഗ്ഗസച്ചം ന നിരുജ്ഝിത്ഥ, നോ ച തേസം തത്ഥ ദുക്ഖസച്ചം ന നിരുജ്ഝതി. സുദ്ധാവാസാനം ഉപപത്തിചിത്തസ്സ ഉപ്പാദക്ഖണേ അനഭിസമേതാവീനം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അസഞ്ഞസത്തം ഉപപജ്ജന്താനം തേസം തത്ഥ മഗ്ഗസച്ചഞ്ച ന നിരുജ്ഝിത്ഥ ദുക്ഖസച്ചഞ്ച ന നിരുജ്ഝതി.

൧൧൫. (ക) യസ്സ യത്ഥ സമുദയസച്ചം ന നിരുജ്ഝതി തസ്സ തത്ഥ മഗ്ഗസച്ചം ന നിരുജ്ഝിത്ഥാതി?

അഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ തേസം തത്ഥ സമുദയസച്ചം ന നിരുജ്ഝതി, നോ ച തേസം തത്ഥ മഗ്ഗസച്ചം ന നിരുജ്ഝിത്ഥ. സുദ്ധാവാസാനം ദുതിയേ ചിത്തേ വത്തമാനേ അനഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ അസഞ്ഞസത്താനം തേസം തത്ഥ സമുദയസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝിത്ഥ.

(ഖ) യസ്സ വാ പന യത്ഥ മഗ്ഗസച്ചം ന നിരുജ്ഝിത്ഥ തസ്സ തത്ഥ സമുദയസച്ചം ന നിരുജ്ഝതീതി?

അനഭിസമേതാവീനം തണ്ഹായ ഭങ്ഗക്ഖണേ തേസം തത്ഥ മഗ്ഗസച്ചം ന നിരുജ്ഝിത്ഥ, നോ ച തേസം തത്ഥ സമുദയസച്ചം ന നിരുജ്ഝതി. സുദ്ധാവാസാനം ദുതിയേ ചിത്തേ വത്തമാനേ അനഭിസമേതാവീനം തണ്ഹായ ഉപ്പാദക്ഖണേ തണ്ഹാവിപ്പയുത്തചിത്തേ വത്തമാനേ അസഞ്ഞസത്താനം തേസം തത്ഥ മഗ്ഗസച്ചഞ്ച ന നിരുജ്ഝിത്ഥ സമുദയസച്ചഞ്ച ന നിരുജ്ഝതി.